ប្រទេសមហាសេដ្ឋីប្រេងនឹងពិចារណាកាត់បន្ថយការផលិតប្រេងបន្ថែមទៀត
ប្រឈមនឹងតម្លៃប្រេងនៅទ្រឹងនៅទីផ្សារអន្តរជាតិ ប្រទេសមហាសេដ្ឋីផលិតប្រេង ដែលជួប្រជុំគ្នា នៅសប្តាហ៍នេះ នឹងពិចារណា ពីការកាត់បន្ថយបរិមាណផលិតប្រេង ក្នុងគោលដៅ ស្រោចស្រង់ឡើងវិញ តម្លៃប្រេង។ ប៉ុន្តែ អ្នកជំនាញជាច្រើនសង្ស័យថា វិធានការកាត់បន្ថយការផលិតប្រេង របស់ក្រុមប្រទេសOPEC នឹងមិនជួយ ជំរុញ តម្លៃប្រេងឆៅ ឡើងថ្លៃ ខ្ពស់ឡើងវិញនោះទេ នៅក្នុងកាលៈទេសៈដែលកំពុងផ្ទុះមានសង្រ្គាមពាណិជ្ជកម្ម រវាងអាមេរិកនិងចិន។
ចុះផ្សាយនៅថ្ងៃ៖
អង្គការនៃក្រុមប្រទេសនាំចេញប្រេង ហៅកាត់ថា OPEP និងប្រទេសមិនមែនជាសមាជិក ដូចជារុស្ស៊ី ជាដើមចង់ទប់តម្លៃប្រេងឆៅ ដែលកាន់តែធ្លាក់ចុះ នៅលើទីផ្សារអន្តរជាតិ។ តម្លៃប្រេងឆៅបានធ្លាក់ចុះតម្លៃ ជាលំដាប់ នោះបើទោះជាក្រុមប្រទេសផលិត និងនាំចេញប្រេង បានសម្រេចកាត់បន្ថយ ការផលិត ហើយការធ្លាក់ថយចុះនៃការនាំចេញប្រេងរបស់អ៊ីរ៉ង់ និងវ៉េណេស៊ុយអេឡា ដោយសារទណ្ឌកម្មសេដ្ឋកិច្ចរបស់អាមេរិក។
នៅមួយថ្ងៃមុន បើកមហាសន្និបាតស្តីពីថាមពលអន្តរជាតិ នៅទីក្រុងអាប៊ូដាប៊ី រដ្ឋមន្រ្តីថាមពលរបស់ប្រទេសអេមីរ៉ា អារ៉ាប់រួម បាននិយាយថា ក្រុមប្រទេសនាំចេញប្រេង នឹងចាត់វិធានការចាំបាច់នានាដើម្បីស្រោចស្រង់ទីផ្សារប្រេងឲ្យមានលំនឹងឡើងវិញ។ យ៉ាងណាក៏ដោយ រដ្ឋមន្រ្តី ថាមពល របស់ប្រទេសជង្រុកប្រេង ដូចជាអេមីរ៉ា អារ៉ាប់រួម ទទួលស្គាល់ថា ជោគវាសនារបស់ទីផ្សារប្រេងឆៅសព្វថ្ងៃ លែងត្រូវកំណត់ ដោយតម្រូវការ និងការផ្គត់ផ្គង់ប្រេងដូចមុនទៀតហើយ ប៉ុន្តែ វាអាស្រ័យទៅលើឥទ្ធិពល ផលប៉ះពាល់ដោយសង្រ្គាមពាណិជ្ជកម្ម ចិនអាមេរិក ហើយនិងកត្តាភូមិសាស្រ្តនយោបាយ។
ដើម្បីជំរុញ ឲ្យតម្លៃប្រេងឆៅ ឡើងខ្ពស់ នៅទីផ្សារ ក្រុមប្រទេសមហាសេដ្ឋីប្រេងតែងអនុវត្តផែនការកាត់បន្ថយបរិមាណផលិតប្រេង។ កាលពីខែធ្នូឆ្នាំមុន អង្គការនៃក្រុមប្រទេសនាំប្រេងចេញហៅកាត់ OPEP និងប្រទេសរុស្ស៊ី ធ្លាប់បានសម្រេចកាត់បន្ថយ ការផលិតប្រេង ប្រមាណ ១លាន ២សែន បារីល ក្នុងមួយថ្ងៃ។ នៅខែមិថុនាកន្លងទៅ គេបានបោះឆ្នោត ពន្យារវិធានការនេះសម្រាប់រយៈពេល៩ខែបន្តទៀត។
ប៉ុន្តែ ការប្រឹងប្រែងនេះមិនបានជួយឲ្យទប់តម្លៃប្រេង ដែលចេះតែធ្លាក់ចុះជាលំដាប់នោះទេ។ នៅថ្ងៃសុក្រ តម្លៃប្រេងឆៅ នៅទីផ្សារអឺរ៉ុបមានតម្លៃ ៦១ដុល្លារ ក្នុងមួយបារីល គឺតិចជាងឆ្នាំមុន នៅក្នុងរយៈពេលដូចគ្នា ដែលមានតម្លៃដល់ទៅ៧៥ដុល្លារ។ សង្រ្គាមពាណិជ្ជកម្មរវាងសហរដ្ឋអាមេរិក និងចិនដែលកំពុងរួបរឹតសេដ្ឋកិច្ចចិន បានធ្វើឲ្យ តម្រូវការប្រេងឆៅ របស់ចិនធ្លាក់ចុះ ដែលនាំឲ្យតម្រូវការប្រេងឆៅក្នុងលោកធ្លាក់ចុះជាលក្ខណៈស្វ័យប្រវត្តិ។ សម្រាប់រដ្ឋមន្រ្តីអេមីរ៉ា អារ៉ាប់រួម ប្រទេសផលិតប្រេង មិនអាចគិតតែកាត់បន្ថយការផលិតប្រេង នៅរាល់ពេលមានភាពតានតឹង នោះទេ។ ការកាត់បន្ថយការផលិត នឹងអាចធ្វើឲ្យក្រុមប្រទេសមហាសេដ្ឋីប្រេង បាត់បង់ចំណែកភាគហ៊ុនរបស់ខ្លួន នៅទីផ្សារ (ពី៣៥%នៅឆ្នាំ ២០១២ មកនៅ៣០% ឆ្នាំ ២០១៩)។ រដ្ឋមន្រ្តីថាមពលអេមីរ៉ា អារ៉ាប់រួមសង្ឃឹមថា នៅក្នុងកិច្ចប្រជុំនៅថ្ងៃចុងក្រោយ នៃមហាសន្និបាត នៅថ្ងៃព្រហស្បតិ៍ខាងមុខ ក្រុមប្រទេសនាំចេញប្រេង នឹងមិនសម្រេចចិត្ត ជ្រើសរើសយកផែនការកាត់បន្ថយការផលិត ដើម្បី ស្រោចស្រង់តម្លៃប្រេងនោះទេ។
ក្រុមអ្នកជំនាញប្រេង ដូចជា Rapidan Energy Group វិញវាយតម្លៃថា សម្ព័ន្ធប្រទេសជង្រុកប្រេង គួរតែកាត់បន្ថយ បរិមាណផលិតប្រេង១លានបារីលបន្ថែមទៀត ដើម្បីរក្សាលំនឹងទីផ្សារប្រេង។ ប៉ុន្តែ អ្វីដែលនឹងអាចចោទឡើងថា តើប្រទេសណាមួយ ដែលនឹងសុខចិត្តទទួលបន្ទុក កាត់បន្ថយការផលិតប្រេងរបស់ខ្លួននោះ។ អារ៉ាប៊ី សាអូឌីត ដែលផលិតប្រេង ច្រើនជាង គេគឺតំណាងឲ្យ១ភាគ៣នៃការផលិតសរុបក្នុងពិភពលោក ហាក់លែងចង់កាត់បន្ថយប្រេង ដែលអារ៉ាប៊ី សាអូឌីតរអ៊ូថា បានធ្វើឲ្យប៉ះពាល់ដល់ប្រាក់ចំណូលជាតិរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ