កូរ៉េខាងត្បូងសម្លឹងឃើញកិច្ចចរចាជាថ្មីឆាប់ៗរវាងសហរដ្ឋអាមេរិក និងកូរ៉េខាងជើង តែកូរ៉េខាងជើងមិនចាប់អារម្មណ៍
នៅឧបទ្វីបកូរ៉េ ក្រុងសេអ៊ូលបានថ្លែងនាថ្ងៃព្រហស្បតិ៍ ទី២២ សីហាដោយបញ្ជាក់ថា កូរ៉េខាងជើង និងសហរដ្ឋអាមេរិកត្រូវផ្តើមកិច្ចចរចារវាងគ្នាជាថ្មីនាពេលឆាប់ៗខាងមុខស្តីពីការរំសាយនុយក្លេអ៊ែរ ព្រមទាំងមានសុទិដ្ឋនិយមថា គម្រោងកិច្ចចរចាឡើងវិញស្តីពីការរំសាយនុយក្លេអ៊ែរកូរ៉េខាងជើងនោះនឹងត្រូវទទួលផលវិជ្ជមាន។ ចំណាប់អារម្មណ៍របស់កូរ៉េខាងត្បូងយ៉ាងដូច្នេះបានធ្វើឡើង បន្ទាប់ពីមានជំនួបរវាងភាគីកូរ៉េខាងត្បូងលោកគីម យុនចុង និងប្រេសិតពិសេសអាមេរិកទទួលបន្ទុកបញ្ហាកូរ៉េខាងជើងលោក Stephen Biegun។ តែក្រុងព្យុងយ៉ាងបានឆ្លើយតបភ្លាមៗថា ខ្លួនមិនចាប់អារម្មណ៍នឹងកិច្ខសន្ទនាជាថ្មីជាមួយភាគីអាមេរិកឡើយ ដរាបណាអាមេរិកមិនបិទបញ្ចប់សកម្មភាពយោធាអរិភាពរបស់ខ្លួនទេនោះ។
ចុះផ្សាយនៅថ្ងៃ៖
ស្តាប់ - ០២:២៥
លោកគីម យុនចុងដែលជាទីប្រឹក្សារងនៃសន្តិសុខជាតិរបស់ប្រធានាធិបតីកូរ៉េខាងត្បូងបានថ្លែងយ៉ាងដូចនេះនៅពីមុខក្រុមអ្នកកាសែត បន្ទាប់ពីលោកបានជួបសន្ទនាជាមួយលោក Stephen Biegun ប្រេសិតពិសេសអាមេរិកាំងទទួលបន្ទុកសំណុំរឿងកូរ៉េខាងជើង។ លោកគីម យុនចុងបានថ្លែងដោយមានសុទិដ្ឋិនិយមថា ការផ្តើមកិច្ចចរចានាពេលឆាប់ៗខាងមុខរវាងក្រុងព្យុងយ៉ាង និងក្រុងវ៉ាស៊ីនតោននឹងទទួលបានផលវិជ្ជមាន។ តែលោកមិនបានបញ្ជាក់ពីផលវិជ្ជមានកម្រិតណា និងថា តើកិច្ចចរចាជាថ្មីនោះនឹងអាចចាប់ផ្តើមនៅពេលណាទេ។
អ្វីដែលគេអាចនិយាយបាន តាំងពីក្រោយជំនួបកំពូលលើកទី២ នាខែកុម្ភៈរវាងប្រធានាធិបតីអាមេរិកលោកដូណាល់ ត្រាំ និងមេដឹកនាំកូរ៉េខាងជើងលោកគីម ជុងអ៊ុនក្នុងទីក្រុងហាណូយ ប្រទេសវៀតណាមមក កិច្ចចរចារវាងក្រុងវ៉ាស៊ីនតោន និងក្រុងព្យុងយ៉ាងកំពុងជាប់គាំង។ កាលពីថ្ងៃទី៣០ មិថុនាកន្លងទៅទៀត លោកត្រាំ និងលោកគីមបានជួបគ្នានៅក្នុងតំបន់គ្មានកងទ័ពដែលខ័ណ្ឌចែករវាងកូរ៉េទាំងពីរ។ នាឱកាសនោះ ឥស្សរជនទាំងពីរបានត្រឹមសន្យាផ្តល់សន្ទុះឡើងវិញនូវកិច្ចចរចារវាងគ្នា។ តែរហូតមកដល់ពេលនេះ គេឃើញមានតែសកម្មភាព និងការឆ្លើយឆ្លងសម្តីដាក់គ្នាដោយនៅម្ខាង សហរដ្ឋអាមេរិកបានបន្តរៀបចំសមយុទ្ធជាមួយកូរ៉េខាងត្បូង និងនៅម្ខាងទៀត កូរ៉េខាងជើងបានបន្តបាញ់សាកល្បងគ្រាប់មីស៊ីល។
ជាចម្លើយតបនឹងសមយុទ្ធរវាងក្រុងសេអ៊ូល និងក្រុងវ៉ាស៊ីនតោន ក្រុងព្យុយ៉ាងបានថ្លែងលែងបន្តកិច្ចចរចាអន្តរកូរ៉េទៀតឡើយ និងទុកទ្វារចំហសម្រាប់កិច្ចសន្ទនាជាមួយសហរដ្ឋអាមេរិក។ តែពេលនេះ កូរ៉េខាងជើងបានប្តូរជំហរដោយបញ្ជាក់ថា ខ្លួនអាចនឹងបើកកិច្ចចរចាឡើងវិញជាមួយសហរដ្ឋអាមេរិកបាន បើសហរដ្ឋអាមេរិកបញ្ឈប់ជាមុននូវរាល់សកម្មភាពយោធាអរិភាព។ នៅក្នុងន័យនេះ អ្នកនាំពាក្យក្រសួងការបរទេសកូរ៉េខាងជើងបានលើកឡើងពីការដែលអាមេរិកទើបបានសាកល្បងគ្រាប់មីស៊ីលចម្ងាយមធ្យម និងមានគម្រោងពង្រាយយន្តហោះចម្បាំង F៣៥ នៅក្នុងតំបន់។ « យើងរក្សាជំហរចង់ដោះស្រាយគ្រប់បញ្ហាដោយសន្តិវិធីតាមកិច្ចសន្ទនា និងការចរចា។ តែយើងមិនចាប់អារម្មណ៍នឹងកិច្ចសន្ទនា និងការចរចាណាដែលមានការគំរាមកំហែងផ្លូវយោធាទេ » នេះជាការបញ្ជាក់របស់រូបអ្នកនាំពាក្យក្រសួងការបរទេសកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ