ព្យុងយ៉ាងបាញ់មីស៊ីស តបនឹងសមយុទ្ធរបស់កូរ៉េខាងត្បូងនិងអាមេរិក
ដូចគ្រោងទុក នៅថ្ងៃចន្ទម្សិលមិញ កូរ៉េខាងត្បូងនិងសហរដ្ឋអាមេរិកបានបើកសមយុទ្ធរួមគ្នា ដោយមិនខ្វល់នឹងការគំរាមម្តងហើយម្តងទៀតរបស់កូរ៉េខាងជើងទេ។ តាំងពីព្រលឹមអុល ក្រោយពីបានបាញ់មីស៊ីលពីរគ្រាប់ ជាលើកទីបួន ក្នុងរយៈពេលតែ១២ថ្ងៃ សំដៅទៅសមុទ្ទខាងកើត ព្យុងយ៉ាងបានស្រែកបរិហារលំហាត់សឹករបស់កូរ៉េខាងត្បូងជាមួយអាមេរិក ដោយព្រមាននឹងមានការបាញ់សាកល្បងអាវុធជាច្រើនផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
សមយុទ្ធរបស់កូរ៉េខាងត្បូងនិងអាមេរិក មានរយៈពេល១៥ថ្ងៃ ក្នុងទម្រង់ជាការហាត់សមយោធាតាមប្រព័ន្ធកុំព្យូទ័រ និងជាការផ្ទៀងផ្ទាត់សមត្ថភាពគ្រប់គ្រងប្រតិបត្តិការសង្គ្រាម របស់កងទ័ពកូរ៉េខាងត្បូង (បច្ចុប្បន្ននេះអាមេរិកជាមេ)។ សម្ព័ន្ធមិត្តទាំងពីរ មិនទាំងបញ្ជាក់អំពីទំហំនៃលំហាត់សឹកនេះទេ ដើម្បីកុំឱ្យកូរ៉េខាងជើងថែមលេសរករឿង ក្នុងអំឡុងពេលធ្វើសមយុទ្ធ។ តែព្យុងយ៉ាងនៅខឹងសម្បារខ្លាំង។
នៅព្រឹកថ្ងៃអង្គារនេះ កូរ៉េខាងជើងបានបាញ់មីស៊ីលពីរគ្រាប់ ពីឆ្នេរខាងលិច ហោះរំលងឧបទ្វីប ទៅធ្លាក់ក្នុងសមុទ្ទខាងកើត (ឬសមុទ្ទជប៉ុន)។ កូរ៉េខាងជើងបានហៅការបាញ់នេះថា ជាការសាកល្បងប្រព័ន្ធបង្ហោះកាំជ្រួចពហុគ្រាប់ធំ។ តែបើតាមសេចក្តីថ្លែងការណ៍របស់ទីបញ្ជាការដ្ឋានអន្តរយោធាកូរ៉េខាងត្បូង គេសង្ស័យថាជាគ្រាប់មីស៊ីលបាលីស្ទិករយៈមធ្យម ដែលអាចហោះក្នុងល្បឿន យ៉ាងហោច Mach៦,៩ (៨៥២០គីឡូម៉ែត្រក្នុងមួយម៉ោង) ក្នុងរយៈចម្ងាយ៤៥០គីឡូម៉ែត្រ និងក្នុងរយៈកម្ពស់ខ្ពស់បំផុត ៣៧គីឡូម៉ែត្រ។ ពោលគឺដូចការសាកល្បងបីលើកមុនដែរ។
ថ្វីបើជារៀងរាល់លើក កូរ៉េខាងជើងតែបញ្ចេញប្រតិកម្មប្រឆាំងនឹងសមយុទ្ធនៅកូរ៉េខាងត្បូងមែន តែវាជាការកម្រណាស់ ដែលព្យុងយ៉ាងបានបាញ់មីស៊ីលតបក្នុងអំឡុងពេលសម្ព័ន្ធមិត្តទាំងពីរកំពុងធ្វើលំហាត់សឹកនោះ។ ហើយកាន់តែភ្ញាក់ផ្អើល និងពុំធ្លាប់កើតមានទៅទៀត គឺនៅលើកនេះកូរ៉េខាងជើងបានសេចក្តីថ្លែងការណ៍យ៉ាងលឿន។ មិនដល់មួយម៉ោងក្រោយការបាញ់សាកល្បងផង (តាមទម្លាប់អាជ្ញាធរព្យុងយ៉ាងបង្អូសពេល២៤ម៉ោងធ្វើបញ្ចេញប្រតិកម្ម) អ្នកទទួលខុសត្រូវក្រសួងការបរទេសកូរ៉េខាងជើង បានបរិហារសមយុទ្ធកូរ៉េខាងត្បូង-អាមេរិកថា ជាការរំលោភ យ៉ាងច្បាស់ក្រលែត កិច្ចខិតខំប្រឹងប្រែងស្វែងរកសន្តិភាពឱ្យឧបទ្វីបកូរ៉េ និងប្រកាសថាកូរ៉េខាងជើងកំពុងបង្ខំរកមធ្យោបាយថ្មី បើវ៉ាស៊ីនតោននិងសេអូល ប្រើអាវុធធ្វើឱ្យព្យុងយ៉ាងឈឺ។ កូរ៉េខាងជើងត្រូវបង្ខំអភិវឌ្ឍ សាកល្បង និងពង្រាយអាវុធដ៏មានអំណាចដើម្បីការពារជាតិ។ នេះបើតាមការអះអាងរបស់ក្រសួងការបរទេសកូរ៉េខាងជើងដដែល ក្នុងអត្ថន័យថា កងសម្ព័ន្ធមិត្ត មានហានិភ័យនឹងបានឃើញកូរ៉េខាងជើង ធ្វើការបាញ់សាកល្បងមីស៊ីលជាច្រើនលើកទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ