ចិនផ្តាច់កិច្ចសហប្រតិបត្តិការផ្នែកសន្តិសុខ ជាមួយបារាំង
បើតាមព័ត៌មានទើបទទួលបាន និងចុះផ្សាយនៅព្រឹកថ្ងៃសៅរ៍នេះ ចិននិងបារាំងលែងមានកិច្ចសហប្រតិបត្តិការផ្នែកប៉ូលិសទៀតហើយ។ សេចក្តីសម្រេចរបស់ចិន ទំនងជាមានពាក់ព័ន្ធនឹងសេចក្តីសម្រេចរបស់ប៉ារីស ដែលបានផ្តល់សិទ្ធិជ្រកកោននយោបាយដល់ភរិយារបស់អតីតប្រធានអាំងទែរប៉ូល។
ចុះផ្សាយនៅថ្ងៃ៖ កែប្រែថ្ងៃទី៖
ចិនបានផ្តល់សារប្រាប់ទៅស្ថានទូតបារាំងប្រចាំក្រុងប៉េកាំង តាំងពីសប្តាហ៍មុនមកម្ល៉េះ ថាប៉េកាំង សម្រេចជាឯកតោភាគី ផ្តាច់កិច្ចសហប្រតិបត្តិការ ផ្នែកប៉ូលិស ដែលរួមមានទាំងវិស័យសន្តិសុខជាច្រើនផ្នែកផង ជាមួយនឹងរដ្ឋបារាំង។ នេះបើតាមប្រភពការទូត។
គ្មានការបញ្ជាក់ជាផ្លូវការអំពី មូលហេតុនៃការផ្តាច់ទំនាក់ទំនងគ្នានេះឡើយ ប៉ុន្តែសេចក្តីសម្រេចរបស់ប៉េកាំងទំនងជាមានពាក់ព័ន្ធទៅនឹងសេចក្តីសម្រេចរបស់ប៉ារីស កាលពីថ្ងៃទី ១៥កក្កដា២០១៩ ផ្តល់សិទ្ធិជ្រកកោននយោបាយ ដល់ក្រុមគ្រួសាររបស់អតីតប្រធានអាំងទែរប៉ូល លោក ម៉េងហុងវៃ (Meng Hongwei)។ លោក ម៉េងហុងវៃ បានបាត់ខ្លួនកាលពីចុងខែកញ្ញាឆ្នាំ២០១៨ ពីទីស្នាក់ការប៉ូលិសអន្តរជាតិ អាំងទែរប៉ូល នៅទីក្រុងលីយ៉ុង ប្រទេសបារាំង មុននឹងលេចមុខជាសាធារណៈមកវិញទៅខែមិថុនា នៅចំពោះមុខតុលាការក្រុងជៀនជីន Tianjin ប្រទេសចិន ដើម្បីឱ្យតុលាការជំនុំជំរះពីបទប្រព្រឹត្តអំពើពុករលួយ។
ប៉េកាំង ក៏បានបង្ហាញចេតនាចង់ឃើញអ្នកស្រី Grace Meng ជាភរិយា ត្រលប់ចូលប្រទេសវិញ ដើម្បីអាចបញ្ជូនទៅតុលាការដែរ ពីបទផ្សំគំនិតជាមួយស្វាមី។ ប៉ុន្តែការប៉ុនប៉ងរបស់ចិនមិនសម្រេច អ្នកស្រី Grace Meng បានបដិសេធមិនវិលទៅចិន និងបានសម្រេចស្នាក់នៅក្នុងប្រទេសបារាំងជាមួយកូនពីរនាក់។ ពេលនេះ អ្នកស្រីត្រូវស្ថិតនៅ ក្រោមការពាររបស់ប៉ូលិសបារាំង ដែលបានពង្រឹងការការពារបន្ថែមទៀត យ៉ាងខ្លាំងក្លា ក្រោយមានលេចសញ្ញាចង់ប្រើវិធីចាប់ជំរិតគួរឱ្យព្រួយបារម្ភមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ