សមុទ្ទចិនខាងត្បូង ៖ វៀតណាមទាមទារឱ្យចិនដកនាវាចេញពីតំបន់ជាប់ជម្លោះជាបន្ទាន់
នៅថ្ងៃព្រហស្បតិ៍នេះ វៀតណាមបានទាមទារឱ្យនាវារបស់រដ្ឋាភិបាលចិន ថយចេញជាបន្ទាន់ ពីតំបន់ដែនទឹកជាប់ជម្លោះ ក្នុងសមុទ្ទចិនខាងត្បូង។ វៀតណាមបានផ្ញើសារតវ៉ា ជាច្រើនលើកច្រើនសាហើយ កាលតាមផ្លូវការទូត ពីសប្តាហ៍មុន តែចិនហាក់ដូចជាធ្វើដឹងឮសោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
Haiyang-៨ ជានាវារបស់ស្ថាប័នភូគព្ភសាស្ត្រចិន បានចេញមកបំពេញបេសកកម្មស្រាវជ្រាវរុករក នៅជុំវិញតំបន់ប្រជុំកោះស្ព្រាតលី តាំងពីថ្ងៃទី ៣ កក្កដា ២០១៩មក។ នេះបើតាមមជ្ឈមណ្ឌលយុទ្ធសាស្ត្រនិងសិក្សាអន្តរជាតិ (CSIS) របស់សហរដ្ឋអាមេរិក។
នៅសប្តាហ៍មុនមក ហាណូយបានផ្ញើសាតវ៉ា ជាច្រើនទៅប៉េកាំង សុំឱ្យនាវាហៃយ៉ង់៨ ចាកចេញពីតំបន់ដែលវៀតណាមចាត់ទុកជាដែនដីរបស់ខ្លួន តែចិនក៏ទាមទារថាជាម្ចាស់ដែរ។ ហើយនៅថ្ងៃព្រហស្បតិ៍នេះ ហាណូយបានផ្តោះប្តូរសំដី តាមបែបការទូត ដោយសុំឱ្យនាវាចិនដកខ្លួនចេញជាបន្ទាន់ពីតំបន់សេដ្ឋកិច្ចផ្តាច់មុខរបស់វៀតណាម។ នេះបើតាមសេចក្តីប្រកាសរបស់អ្នកនាំពាក្យក្រសួងការបរទេសវៀតណាម លោក Le Thi Thu Hang ដោយពន្យល់ថាវៀតណាមការពារនិងគោរពបូរណភាពដែនដី ស្របតាមច្បាប់អន្តរជាតិ និងដោយប្រើមធ្យោបាយបែបសន្តិវិធី តែបដិសេធមិនបញ្ជាក់អំពីទីតាំងពិតប្រាកដរបស់នាវាចិននោះទេ។
មុននឹងនាវារុករកមកដល់សមុទ្ទចិនខាងត្បូងនេះ នាវារបស់ឆ្មាំសមុទ្ទចិនក៏បានមកត្បាតដល់កៀកនាវាវៀតណាម ដែលមកចាក់ប្រេងនៅស្ថានីយ៍បូមប្រេង។ បើតាមមជ្ឈមណ្ឌលយុទ្ធសាស្រ្តនិងសិក្សាអន្តរជាតិអាមេរិក ឆ្មាំសមុទ្ទចិន បានបញ្ចេញសកម្មភាពបែបគំរាម កំញើញនាវាវៀតណាមតែម្តង។ សកម្មភាពរបស់ចិនដែលជំរុញឱ្យអាមេរិកបញ្ចេញប្រតិកម្មតបវិញកាលពីចុងសប្តាហ៍មុន អំពាវនាវឱ្យចិន និងយោធាសមុទ្ទចិន បញ្ឈប់សកម្មភាពឈ្លានពាន ប្រទេសជិតខាងក្នុងតំបន់ ក្នុងសមុទ្ទចិនខាងត្បូង។
សំអាងលើវត្តមានដ៏យូរលង់ក្នុងតំបន់ ចិនមានជម្លោះជាមួយប្រទេសជិតខាងជាច្រើន ដូចជាវៀតណាម ហ្វីលីពីន ម៉ាឡេស៊ី ព្រុយណេ ដណ្តើមគ្រប់គ្រងតំបន់ប្រជុំកោះស្ព្រាតលីនិងប៉ារ៉ាសែលដ៏មហាសាល ក្នុងសមុទ្ទចិនខាងត្បូង។ ជាជម្លោះដែនដីដ៏ធំនិងកំពុងពុះកញ្ជ្រោលខ្លាំងជាងគេមួយនៅលើពិភពលោក ព្រោះតំបន់នេះស្ថិតនៅចំផ្លូវតំបន់ផ្តោះប្តូរពាណិជ្ជកម្មអន្តរជាតិដ៏សំខាន់ផង និងជាតំបន់ដែលសម្បួរទៅដោយធនធានធម្មជាតិ ក្នុងទឹកក្រោមដី និងជាទីស្តុកប្រភពថាមពលហ្វូស៊ីលដ៏ច្រើនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ