ជប៉ុន និងកូរ៉េខាងត្បូងឈ្លោះគ្នារឿងផែនទីប្រើក្នុងកម្មវិធីកីឡាអូឡាំពិក២០២០
ការប្រកួតកីឡាអូឡាំពិកកាន់តែខិតមកដល់ ភាពតានតឹងមានកាន់តែខ្លាំងរវាងជប៉ុននិងកូរ៉េខាងត្បូង។ នៅថ្ងៃពុធទី ២៤កក្កដា ២០១៩ នេះ រដ្ឋាភិបាលជប៉ុនបានឆ្លើយបដិសេធ ថាមិនទទួលធ្វើតាមសំណើរបស់កូរ៉េខាងត្បូងឡើយ។ កូរ៉េខាងត្បូងបានទាមទារឱ្យតូក្យូ លុបកូនកោះតូចៗពីរដែលជាប់ជម្លោះគ្នា ចេញពីផែនទីប្រើសម្រាប់ការប្រកួតកីឡាអូឡាំពិកឆ្នាំ២០២០។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
នៅលើផែនទីបញ្ជាក់អំពីដំណើរហែ ភ្លើងគប់អូឡាំពិកឆ្នាំ២០២០ នៅតូក្យូ គេសង្កេតឃើញមានចំណុចតូចល្អិតមួយ ដែលតំណាងឱ្យប្រជុំកូនកោះ Takeshima។ តាកេស្ហ៊ីម៉ា ជាកូនកោះដុំថ្មពីរ នៅដាច់ស្រយាលក្នុងមហាសាគរ ភាគខាងលិចប្រទេសជប៉ុន និងគ្មានមនុស្សរស់នៅទេ។ កូនកោះទាំងពីរដែលមានផ្ទៃក្រលាបូកបញ្ចូលគ្នា មិនដល់០,២០គីឡូម៉ែត្រការ៉េផងនោះ ស្ថិតនៅក្រោមការគ្រប់គ្រងដោយជាក់ស្តែងដោយកូរ៉េខាងត្បូង តែជប៉ុនតែងទាមទារថាជាបូរណភាពដែនដីរបស់ខ្លួនជានិច្ច។
នៅក្នុងសន្និសីទកាសែតព្រឹកមិញ អ្នកនាំពាក្យរដ្ឋាភិបាលជប៉ុន បានបញ្ជាក់ថា កូរ៉េខាងត្បូងពិតបានធ្វើការតវ៉ាទៅស្ថានទូតជប៉ុនប្រចាំទីក្រុងសេអូល សុំឱ្យលុបចំណុចកូនកោះនោះចេញពីផែនទីមែន ប៉ុន្តែជប៉ុនអាចឆ្លើយតបជាវិជ្ជមានបានឡើយ ព្រោះ តាកេស្ហ៊ីម៉ា គឺជារបស់ជប៉ុន។ មិនតែប៉ុណ្ណោះ ជប៉ុនក៏បានច្រានចោលការតវ៉ារបស់សេអូល ដែលប្រឆាំងនឹងការហៅឈ្មោះមហាសាគរដែលព័ទ្ធកូនកោះថា “សមុទ្ទជប៉ុន” ទៀត។ នេះបើតាមការអះអាងរបស់អ្នកនាំពាក្យដដែល។
សូមបញ្ជាក់ថាកូរ៉េខាងត្បូង បានហៅសមុទ្ទនេះថាសមុទ្ទខាងកើត ព្រោះវាស្ថិតនៅភាគខាងកើតនេះប្រទេស។ ចំណែកកូនកោះជាប់ជម្លោះវិញ មានឈ្មោះថា ដុកដូ និង ផ្ទាំងថ្មLiancourt សម្រាប់ក្រុមបស្ចឹមលោក។ ដុកដូ ជាផ្នែកមួយនៃដែនដីរបស់កូរ៉េខាងត្បូង បើយោលទៅលើប្រវត្តិសាស្ត្រ ទីតាំងភូមិសាស្ត្រ និងច្បាប់អន្តរជាតិ។ នេះជាការទទូចបញ្ជាក់របស់រដ្ឋាភិបាលក្រុងសេអ៊ូល ដែលបើតាមសារព័ត៌មានជប៉ុន បានចាត់ទុកភាពមានៈរបស់តូក្យូជាទង្វើប្រឆាំងនឹងស្មារតីកីឡាអូឡាំពិក។
ជម្លោះតវ៉ាបែបនេះធ្លាប់កើតមានម្តងហើយកាលក្នុងពិធីប្រកួតកីឡាអូឡាំពិករដូវរងារ នៅព្យុងឆាំង ដើមឆ្នាំ២០១៨។ កាលណោះ ដើម្បីបន្ធូរបន្ថយភាពតានតឹង សេអូលសុខចិត្តមិនប្រើទង់ជាតិដែលមានចុចកោះតាកេស្ហ៊ីម៉ាឬដុកដូ។ ថ្វីបើប្រទេសទាំងពីរធ្លាប់មានជម្លោះប្រវត្តិសាស្ត្រ និងជំហរជាតិនិយមដាច់ខាតដូចគ្នាមែន តែកូរ៉េខាងត្បូងនិងជប៉ុន កម្រធ្លាក់ក្នុងភាពតានតឹងភាពតានតឹងដាក់គ្នាបែបនេះណាស់។ កាលពីថ្ងៃអង្គារម្សិលមិញ ប្រទេសទាំងពីរ បានប្រទាក់សំដីគ្នាយ៉ាងខ្លាំង ទាក់ទងនឹងការរំលោភដែនអាកាសរបស់យន្តហោះចម្បាំងរុស្ស៊ី។ តូក្យូបានបន្ទោសសេអ៊ូលដែលបានបាញ់គំរាមយន្តហោះ រុស្ស៊ី ថាជាទង្វើគួរឱ្យសោកស្តាយមែនទែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ