ចិនថានឹងពង្រាយកម្លាំងទ័ពនៅហុងកុង បើចាំបាច់
ដើម្បីរក្សាសណ្តាប់ធ្នាប់ យោធាប្រជាជនចិនអាចនឹងត្រូវដាក់ពង្រាយនៅតាមផ្លូវហុងកុង ប្រសិនបើអាជ្ញាធរក្រុងស្នើសុំ។ នេះជាបើតាមការប្រកាសរំលឹករបស់ក្រុងប៉េកាំង នៅថ្ងៃពុធទី ២៤កក្កដា២០១៩។ សេចក្តីប្រកាសរបស់ចិន ធ្វើឡើងក្រោយពីបាតុកម្មនៅហុងកុងរាលដាលទៅជាអំពើហិង្សាកាន់តែខ្លាំងឡើងៗ។
ចុះផ្សាយនៅថ្ងៃ៖ កែប្រែថ្ងៃទី៖
អតីតដែនដីក្រោមអាណានិគមអង់គ្លេស ទើបប្រគល់មកឱ្យចិនវិញនៅឆ្នាំ ១៩៩៧ ហុងកុងមានស្វ័យភាពធំទូលាយជាចិនដីគោគខ្លាំងណាស់។ ប៉ុន្តែតាំងពីខែមិថុនាមក ហុងកុងបានក្លាយជាទីលានតវ៉ាប្រឆាំងនឹងរដ្ឋាភិបាលហុងកុងស្និទ្ធនឹងប៉េកាំង។
ចលនាប្រឆាំង បានចាប់កំរើកឡើង ក្នុងបំណងតវ៉ាប្រឆាំងនឹងគម្រោងច្បាប់ធ្វើបត្យាប័នជនសង្ស័យទៅកាត់ទោសនៅចិនដីគោក ទីដែលតុលាការស្ថិតក្រោមឥទ្ធិពលបក្សកុម្មុយនិស្ត។ ប៉ុន្តែបន្តិចម្តងៗ សកម្មជនប្រឆាំងខ្លះបានទាមទារឱ្យរដ្ឋាភិបាលហុងកុងធ្វើកំណែទម្រង់ប្រជាធិបតេយ្យតែម្តង។
កាលពីថ្ងៃអាទិត្យ ក្រុមប្រឆាំងបានវាយលុកចូលការិយាល័យទំនាក់ទំនងរដ្ឋាភិបាលប៉េកាំង នៅហុងកុង និងបានចោលពងមាន់ពងទា គូសវាសក្រវេមក្រវាមលើជញ្ជាំងអគារ។ កាលពីថ្ងៃទី១ កក្កដា២០១៩ សកម្មជនប្រឆាំងបានចូលលុកលុយវាយបំផ្លិចបំផ្លាញសភាហុងកុងម្តងហើយ។
នេះជាទម្រង់វាយប្រហារបែបថ្មី ដែលប៉េកាំងចង់បង្ក្រាប។ រដ្ឋាភិបាលកណ្តាល បានធ្វើការថ្កោលទោសអំពើហិង្សាដែលមិនអាចអនុគ្រោះបាន និងបានអំពាវនាវឱ្យដាក់ទោសជនដៃដល់ឱ្យបាន។ តាំងពីហេតុការណ៍បានផ្ទុះឡើង អាជ្ញាធរមូលដ្ឋានជាអ្នកចាត់ចែងដោះស្រាយវិបត្តិដោយខ្លួនឯងទេ។ ប៉ុន្តែមិនយូរមិនឆាប់ ប្រសិនបើហុងកុងធ្វើសំណើ ទាហានចិនអាចនឹងប្រតិបត្តិតាមមាត្រា១៤នៃច្បាប់ដាក់ទ័ពចិននៅហុងកុង។ អ្នកនាំពាក្យក្រសួងការពារជាតិមិនបានបញ្ជាក់ឱ្យចំៗថាចិនគិតចាត់ចែងយ៉ាងណាប្រសិនបើអំពើហិង្សានៅហុងកុងនៅតែបន្តទេ តែមាត្រា១៤នៃច្បាប់យោធាចិនបានអនុញ្ញាតឱ្យអាជ្ញាធរមូលដ្ឋាន “ក្នុងករណីចាំបាច់” ដើម្បី “រក្សាសណ្តាប់ធ្នាប់សង្គម” សុំជំនួយពីកងទ័ពបាន ប្រសិនបើមានការយល់ព្រមពីប៉េកាំង។
នេះគឺជាលើកទីមួយហើយ ដែលប៉េកាំង លើកឡើងជាសាធារណៈអំពីលទ្ធភាពនៃការបញ្ជូនទ័ពទៅពង្រាយនៅតាមផ្លូវកណ្តាលក្រុងហុងកុង។ អ្នកវិភាគជាច្រើនយល់ថាសម្មតិកម្មនេះមិនអាចទៅរួចទេ តែប៉េកាំងចង់បង្ហាញពីជំហររឹងតឹងរបស់ខ្លួនច្រើនជាង។
តាំងពីឆ្នាំ១៩៩៧មក យោធាប្រជាជនចិន បានមកប្រចាំការនៅក្នុងទឹកដីហុងកុង តែទាហានទាំងនោះមិនសូវចេញមុខ និងកម្រឃើញជាសាធារណៈណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ