យន្តហោះ MH17៖ នាយករដ្ឋមន្រ្តីម៉ាឡេស៊ី មិនសប្បាយចិត្តនឹងការសន្និដ្ឋានរបស់ក្រុមស៊ើបអង្កេតអន្តរជាតិ
នាយករដ្ឋមន្រ្តីម៉ាឡេស៊ី លោកមហាម៉េដ មហាធៀរ នៅថ្ងៃព្រហស្បតិ៍នេះ បានបដិសេធទាត់ចោល សេចក្តីសន្និដ្ឋានរបស់ក្រុមអ្នកស៊ើបអង្កេត អន្តរជាតិ ដែលបានសម្រេចចោទប្រកាន់ ជនជាតិរុស្ស៊ី ៣នាក់ និងជនជាតិអ៊ុយក្រែនម្នាក់ ពីបទទទួលខុសត្រូវ លើការបាញ់ទម្លាក់យន្តហោះម៉ាឡេស៊ី ដែលបានសម្លាប់អ្នកដំណើរ ២៨៩នាក់ កាលពី៥ឆ្នាំ មុន នៅភាគខាងកើតអ៊ុយក្រែន។ សម្រាប់នាយករដ្ឋមន្រ្តីម៉ាឡេស៊ី រុស្ស៊ី ជាអ្នកកំពុងទទួលរងថ្មបាក់ នៅក្នុងសំណុំរឿងស៊ើបអង្កេតដែលមានលក្ខណៈនយោបាយ។
ចុះផ្សាយនៅថ្ងៃ៖
ស្តាប់ - ០២:៤៣
ក្រុមអ្នកស៊ើបអង្កេតអន្តរជាតិ ទៅលើការបាញ់ធ្លាក់យន្តហោះ ម៉ាឡេស៊ី MH17 ដែលមានការចូលរួមផងដែរពីខាងអាជ្ញាធរម៉ាឡេស៊ី បានសម្រេច កាលពីថ្ងៃពុធ ចោទប្រកាន់ជាផ្លូវការ ជនជាតិរុស្ស៊ី ៣នាក់ និងជនជាតិអ៊ុយក្រែនម្នាក់ ថាជាអ្នកទទួលខុសត្រូវលើការបាញ់ទម្លាក់យន្តហោះម៉ាឡេស៊ី កាលពីឆ្នាំ ២០១៤។
តាមក្រុមអ្នកស៊ើបអង្កេតអន្តរជាតិ ដែលដឹកនាំដោយរដ្ឋអាជ្ញាហូឡង់ ទោះជា ជនសង្ស័យរុស្ស៊ីនិងអ៊ុយក្រែន ទាំង៤នាក់ មិនបានចុចប៊ូតុងដោយផ្ទាល់ ប៉ុន្តែ ពួកគេបានចូលរួមចំណែកឲ្យមានការដឹកជញ្ជូន យកប្រព័ន្ធមីស៊ីលរុស្ស៊ី ប្រភេទ ប៊ូកBuk ទៅបាញ់ទម្លាក់យន្តហោះដឹកអ្នកដំណើរម៉ាឡេស៊ី MH17 ពីទឹកដីភាគខាងកើតអ៊ុយក្រែន។
តាមក្រុមអ្នកស៊ើបអង្កេត ក្នុងចំណោម ជនសង្ស័យរុស្ស៊ី ទាំង៣រូប ដែលគេចោទប្រកាន់ មាន១នាក់ ធ្លាប់មានតួនាទីជាមេបញ្ជាការ ដឹកនាំក្រុមទាមទារបំបែកទឹកដី ភាគខាងកើតអ៊ុយក្រែន និង២នាក់ ទៀត ជាប្រធាន ហើយនិងអនុប្រធាន ទទួលខុសត្រូវផ្នែកចារកម្មរបស់ក្រុមឧទ្ទាម ដែលជាអ្នកទាមទារឲ្យមានខែលមីស៊ីលរុស្ស៊ី នៅប៉ែកខាងកើតអ៊ុយក្រែន។
វិមានក្រេមឡាំងបានបដិសេធ ទាត់ចោលរួចហើយ ការចោទប្រកាន់ របស់ក្រុមអ្នកស៊ើបអង្កេត អន្តរជាតិ កាលពីថ្ងៃពុធម្សិលមិញ។ ចំណែក នាយករដ្ឋមន្រ្តីម៉ាឡេស៊ី លោកមហាម៉េដ មហាធៀរវិញ នៅថ្ងៃព្រហស្បតិ៍នេះ បានសំដែងការមិនសប្បាយចិត្តនឹងការសម្រេចរបស់ក្រុមសង្កេតអន្តរជាតិ ព្រោះថា តាំងពីដើមរហូតមក សំណុំរឿងដែលមានលក្ខណៈនយោបាយ មានទិសដៅ រកមធ្យោបាយ ចោទប្រកាន់រុស្ស៊ី។ សម្រាប់ប្រមុខរដ្ឋាភិបាល ម៉ាឡេស៊ី ក្រុមអ្នកស៊ើបអង្កេត អន្តរជាតិ មិនបានធ្វើការងារ ដើម្បីស្វែងរកការពិតនោះទេ។ ផ្ទុយទៅវិញ គឺមានតែស្វែងរកអំណះអំណាងដើម្បី បញ្ជាក់ការចោទប្រកាន់ទៅលើរុស្ស៊ី។
ឆ្លើយទៅនឹងអ្នកកាសែត នៅថ្ងៃព្រហស្បតិ៍នេះ ប្រមុខរដ្ឋាភិបាលម៉ាឡេស៊ីបានអះអាងបន្ថែមថា លោកមិនជឿថា រុស្ស៊ី មានចូលពាក់ព័ន្ធនៅក្នុងសំណុំរឿងបាញ់ទម្លាក់យន្តហោះ ម៉ាឡេស៊ី MH17 នោះទេ។
នៅក្នុងសន្និសីទកាសែត កាលពីថ្ងៃពុធ អ្នកស៊ើបអង្កេត អន្តរជាតិ ដឹកនាំដោយប្រទេសហូឡង់ អះអាងថា គេបានចេញដីការចាប់ខ្លួន ជនសង្ស័យរុស្ស៊ី និងអ៊ុយក្រែនទាំង៤នាក់ និងបានប្រកាស បើកសវនាការ ជំនុំជម្រះ ជនសង្ស័យ ទាំង៤នាក់ នៅខែមីនា ឆ្នាំក្រោយ នៅប្រទេសហូឡង់។ ជាសវនាការកាត់ទោស កំបាំងមុខ ព្រោះថា ជនសង្ស័យជាតិរុស្ស៊ីទាំង៣នាក់កំពុងរស់នៅក្នុងទឹកដីរុស្ស៊ី ចំណែកជនសង្ស័យអ៊ុយក្រែន កំពុងស្ថិតនៅក្នុងតំបន់គ្រប់គ្រងរបស់ក្រុមទាមទារបំបែកខ្លួន នៅភាគខាងកើតអ៊ុយក្រែន។ សម្រាប់ រដ្ឋអាជ្ញាហូឡង់ គេនឹងមិនទាមទារការធ្វើបត្យាប័ន ជនសង្ស័យទាំង៤នាក់នោះទេ ដោយសារតែ រុស្ស៊ី និងអ៊ុយក្រែន មានច្បាប់ ហាមឃាត់ការធ្វើបត្យាប័នពលរដ្ឋរបស់ខ្លួន ប៉ុន្តែ គេបានទាមទារឲ្យរុស្ស៊ី សហការជាមួយក្រុមអ្នកស៊ើបអង្កេត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ