ក្រៅពីសង្រ្គាមពាណិជ្ជកម្ម និងបច្ចេកវិទ្យា តៃវ៉ាន់កំពុងបន្តក្លាយជាសង្រ្គាមពាក្យសម្តីយ៉ាងផុសផុលរវាងចិន និងអាមេរិក
នៅថ្ងៃព្រហស្បតិ៍ ទី៣០ ឧសភា ចិនបានចោទអាមេរិកពីបទលេងជាមួយភ្លើងនៅក្នុងរឿងតៃវ៉ាន់ដោយបានបន្តបង្កើនទំនាក់ទំនងកាន់តែស្អិតរមួតជាមួយកោះតៃវ៉ាន់ ពិសេសការបញ្ជូននាវាចម្បាំងទៅកាន់ច្រកសមុទ្រតៃវ៉ាន់។ ការចោទប្រកាន់នេះបានធ្វើឡើងតាមរយៈអ្នកនាំពាក្យក្រសួងការពារជាតិចិនដោយបន្ថែមថាជានិច្ចកាល អាមេរិកតែងព្យាយាមប្រើសន្លឹកបៀរតៃវ៉ាន់ដើម្បីវាយប្រហារលើចិន។ ការបន្តប៉ះទង្គិចរវាងក្រុងវ៉ាស៊ីនតោន និងក្រុងប៉េកាំងជុំវិញរឿងតៃវ៉ាន់បានកើតមានឡើង ក្នុងពេលដែលប្រមុខការពារជាតិស្តីទីអាមេរិកលោកប៉ាទ្រីក ស្ហាណាហានបានផ្តើមទស្សនកិច្ចមួយជុំតំបន់អាស៊ីក្នុងថ្ងៃពុធ ទី២៩ ឧសភា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
ទោះបីជាអាមេរិកបានព្យួរទំនាក់ទំនងការទូតជាមួយចិនតៃវ៉ាន់តាំងពីឆ្នាំ ១៩៧៩ ដើម្បីទទួលស្គាល់ចិនដីគោកជាអ្នកតំណាងចិនតែមួយក៏ដោយ ក៏ក្រុងវ៉ាស៊ីតោននៅបន្តជាសម្ព័ន្ធមិត្តដ៏មានឥទ្ធិពល និងជាអ្នកផ្គត់ផ្គង់គ្រឿងសព្វាវុធដ៏សំខាន់របស់ក្រុងតៃប៉ិក។ គឺជំហរ និងទង្វើរបស់អាមេរិករបៀបនេះហើយដែលបានធ្វើឲ្យចិនក្តៅក្រហាយ និងបញ្ចេញប្រតិកម្មប្រឆាំងគ្រប់ពេល។ នៅក្នុងសន្និសីទកាសែតប្រចាំថ្ងៃ អ្នកនាំពាក្យក្រសួងការពារជាតិចិនលោកវូ ជាំងបានថ្លែងថានារយៈពេលចុងក្រោយនេះ អាមេរិកបានប្រើសន្លឹកបៀរតៃវ៉ាន់ដើម្បីវាយប្រហារចិន។
តាមលោកវូ ជាំង អាមេរិកកំពុងលេងជាមួយភ្លើងដោយបានធ្វើសកម្មភាពមួយចំនួនដែលអាចជះផលវិបាកធ្ងន់ធ្ងរដល់ទំនាក់ទំនងរវាងប្រទេសអាមេរិក ចិន រវាងកងទ័ពប្រទេសទាំងពីរ រួមទាំងការបំផ្លាញសន្តិភាព និងស្ថិរភាពនៅច្រកសមុទ្រតៃវ៉ាន់ផង។ គួររម្លឹកថានាសប្តាហ៍កន្លងទៅ នាវាសង្រ្គាមរបស់អាមេរិក US Navy បានធ្វើដំណើរចូលច្រកសមុទ្រតៃវ៉ាន់ ហើយទង្វើដូចគ្នានេះបានកើតមានញឹកញាប់ក្នុងរយៈពេលប៉ុន្មានខែចុងក្រោយនេះ។ បន្ទាប់មក នៅមានទង្វើផ្សេងទៀតដែលចិនមិនអាចទប់កំហឹងនឹងអាមេរិកបានដូចយ៉ាងការអនុម័តច្បាប់មួយគាំទ្រតៃវ៉ាន់ពីសភាអាមេរិក និងជំនួបរវាងប្រមុខសន្តិសុខតៃវ៉ាន់លោកដាវីដ លី និងទីប្រឹក្សាសន្តិសុខជាតិអាមេរិកលោកចន បុលតុនក្នុងខែឧសភានេះ។
ការបន្តប៉ះទង្គិចរវាងក្រុងវ៉ាស៊ីនតោន និងក្រុងប៉េកាំងជុំវិញរឿងតៃវ៉ាន់បានកើតមានឡើង ក្នុងពេលដែលប្រមុខការពារជាតិស្តីទីអាមេរិកលោកប៉ាទ្រីក ស្ហាណាហានបានផ្តើមទស្សនកិច្ចមួយជុំតំបន់អាស៊ីនាថ្ងៃពុធ ទី២៩ ឧសភា។ ឥណ្ឌូណេស៊ីជាប្រទេសដែលលោកស្ហាណាហានបានទៅដល់ក្នុងថ្ងៃព្រហស្បតិ៍ ទី៣០ ឧសភា និងបានទទួលជួបដោយប្រធានាធិបតី ប្រមុខការទូត និងប្រមុខការពារជាតិឥណ្ឌូណេស៊ី។ បន្ទាប់មក លោកស្ហាណាហានទៅចូលរួមនៅក្នុងវេទិកាសន្តិសុខតំបន់រៀបចំក្នុងប្រទេសសិង្ហបុរីពីថ្ងៃទី៣១ ដល់ថ្ងៃទី២ មិថុនា។ នាឱកាសនោះ លោកស្ហាណាហានត្រូវជួបជាមួយសមភាគីចិនឧត្តមសេនីយ Wei Fenghe នៅថ្ងៃសៅរ៍ ទី១ មិថុនា។
« ខ្ញុំចង់បង្ហាញសំណុំរឿងមួយចំនួនដែលយើងរួមសហការណ៍ជាមួយចិន។ តែខ្ញុំក៏ចង់មានកិច្ចសន្ទនាត្រង់ទៅ ត្រង់មកជាមួយចិនស្តីពីការលួចកម្មសិទ្ធិបញ្ញា ឬមួយយោធូបនីយកម្មនៅក្នុងសមុទ្រចិនខាងត្បូង » នេះជាការថ្លែងរបស់លោកស្ហាណាហាននៅចំពោះហ្វូងអ្នកកាសែតដែលអមដំណើរជាមួយលោក។ បន្ទាប់ពីសិង្ហបុរី ប្រមុខការពារជាតិអាមេរិកនឹងបន្តដំណើរទៅកាន់កូរ៉េខាងត្បូង និងប្រទេសជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ