ម៉ាឡេស៊ីប្រកាសបញ្ជូនសំរាមប្លាស្ទីកទៅប្រទេសដើមវិញ
“ម៉ាឡេស៊ីនឹងមិនមែនជាកន្លែងចាក់សំរាមរបស់ពិភពលោក”។ នេះជាប្រសាសន៍របស់ រដ្ឋមន្រ្តីក្រសួងបរិស្ថានម៉ាឡេស៊ី។ នៅថ្ងៃអង្គារម្សិលមិញ នៅពេលចុះទៅត្រួតពិនិត្យ កុងតឺន័រ ផ្ទុកសំរាមប្លាស្ទិក នៅកំពង់ផែKlang ដែលជាកំពង់ផែ ដ៏មមាញឹកមួយ នៅភាគខាងលិចប្រទេស រដ្ឋមន្រ្តីក្រសួងថាមពល បរិស្ថាន និងការបែ្រប្រួលអាកាសធាតុ ម៉ាឡេស៊ីបានប្រកាសថា ម៉ាឡេស៊ីនឹងបញ្ជូនសំរាមប្លាស្ទីក ប្រមាណ ៣ពាន់តោន ទៅឲ្យប្រទេសដើមវិញ ដែលនៅក្នុងនោះ មានបារាំង សហរដ្ឋអាមេរិក ចិន ជប៉ុន និងអារ៉ាប៊ី សាអូឌីតជាដើម។
ចុះផ្សាយនៅថ្ងៃ៖
ម៉ាឡេស៊ីនឹងបញ្ជូនសំរាមប្លាស្ទិក ប្រមាណ៣ពាន់តោនទៅឲ្យប្រទេសម្ចាស់ដើមវិញ។ តាមរដ្ឋមន្រ្តី ក្រសួងបរិស្ថាននិងថាមពលម៉ាឡេស៊ី កុងតឺន័រផ្ទុកសំរាមប្លាស្ទិក ចំនួន៦០ ដែលនាំចូលដោយខុសច្បាប់ ចូលប្រទេសម៉ាឡេស៊ី នឹងត្រូវបង្វែរ បញ្ជូនទៅឲ្យប្រទេសម្ចាស់ ដើមវិញ។ រដ្ឋមន្រ្តីបរិស្ថានម៉ាឡេស៊ី បានអំពាវនាវឲ្យប្រទេសអភិវឌ្ឍឈប់បញ្ជូនសំរាមទៅម៉ាឡេស៊ី និងថា ម៉ាឡេស៊ី មិនមែនជាប្រទេសទទួលសំរាមរបស់ពិភពលោកនោះទេ។
ទៅតាមការប្រកាសរបស់រដ្ឋមន្រ្តីបរិស្ថាន ម៉ាឡេស៊ី ប្រទេសចំនួន ១៤ ដូចជា អាមេរិក បារាំង ជប៉ុន កាណាដា អូស្ត្រាលី ចិន អារ៉ាប៊ីសាអូឌីតអង់គ្លេសជាដើមនឹងត្រូវទទួលយកសំរាមប្លាស្ទិករបស់ខ្លួនវិញ។
នៅខែមេសាមុននេះ ម៉ាឡេស៊ីធ្លាប់បានបញ្ជូនរួចហើយ កុងតឺន័រ ផ្ទុកសំរាមប្លាស្ទិក ចំនួន៥កុងតឺន័រ ទៅឲ្យប្រទេសម្ចាស់ដើម អេស្ប៉ាញ។ អាជ្ញាធរម៉ាឡេស៊ីកំពុងត្រួតពិនិត្យស៊ើបអង្កេតលើកុងតឺន័រសំរាមប្លាស្ទិកចំនួន៥០ផ្សេងទៀត ដែលនាំចូលទៅម៉ាឡេស៊ី ដោយខុសច្បាប់។
ចាប់តាំងពីឆ្នាំ ២០១៦ ការដឹកជញ្ជូននាំចូលសំរាមប្លាស្ទិកទៅម៉ាឡេស៊ីបានកើនឡើង៣ដង គឺក្នុងបរិមាណ ៨៧០ ០០០តោន ក្នុងមួយឆ្នាំៗ។ នេះបើតាមតួលេខរបស់រដ្ឋាភិបាលម៉ាឡេស៊ី។ និន្នាការនាំចូលសំរាមប្លាស្ទិកទៅបណ្តាប្រទេស តំបន់អាស៊ាន ដូចជាម៉ាឡេស៊ី ជាដើម បានកើតមានឡើង បន្ទាប់ពីប្រទេសចិន ដែលជាកន្លែងទទួលសំរាមអេឡិចត្រូនិក ដ៏ធំជាងគេនៅក្នុងពិភពលោក បានប្រកាសបិទកំពង់ផែរបស់ខ្លួន ក្នុងហេតុផល ការពារបរិស្ថាន។ ជាលទ្ធផល រោងចក្រកែច្នៃសំរាមប្លាស្ទិក បានរីកដុះដាលដូចផ្សិត នៅម៉ាឡេស៊ី។ តាមក្រសួងបរិស្ថាន នៅពេលការកែច្នៃ សំរាមប្លាស្ទិកនាំចូលពីបរទេស ក្លាយជាអាជីវកម្មយ៉ាងគគ្រឹកគគ្រេង នៅម៉ាឡេស៊ី សំរាមប្លាស្ទិក មួយចំនួនជាសំរាមដែលពុលខ្លាំង បំផ្លាញបរិស្ថាន ចំណែក រោងចក្រជាច្រើនគ្មានបច្ចេកវិទ្យាគ្រប់គ្រាន់ដើម្បីកែច្នៃ ឡើងវិញនោះទេ។ រដ្ឋមន្រ្តីក្រសួងបរិស្ថានម៉ាឡេស៊ីវិញ នៅថ្ងៃអង្គារម្សិលមិញបាននិយាយថា រហូតមក រដ្ឋាភិបាលបានបិទរោងចក្រកែច្នៃសំរាមខុសច្បាប់ ចំនួន ១៥០ និងថា គេត្រូវការពេលវេលារហូតដល់ដាច់ឆ្នាំនេះ ដើម្បីដោះស្រាយបញ្ហាសំរាមប្លាស្ទិក នាំចូលទៅម៉ាឡេស៊ី។
នៅមុនម៉ាឡេស៊ី ហ្វីលីពីន ដែលមានបញ្ហាដូចគ្នា គឺសំរាមប្លាស្ទិក នាំចូលពីបរទេស បានប្រកាស កាលពីសប្តាហ៍មុន ស្វែងរកក្រុមហ៊ុនដឹកជញ្ជូន ឯកជន ណា ដែលអាចដឹកកុងតឺន័រ ដែលមានសំរាមប្លាស្ទិក ចំនួន ៦៩ កុងតឺន័រ ឲ្យត្រលប់ទៅប្រទេសកាណាដាវិញ បន្ទាប់ពីកាណាដា យឺតយ៉ាវ មិនចង់ទទួលយកសំរាមប្លាស្ទិករបស់ខ្លួនវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ