លោកលីវ ហឺថា ចិន និងអាមេរិកព្រមព្រៀងបន្តការចរចាពាណិជ្ជកម្ម ហើយថា ចិនមិនភ័យខ្លាចទេ
ការចរចាពាណិជ្ជកម្មរវាងចិន និងអាមេរិករយៈពេល ២ថ្ងៃ គឺថ្ងៃព្រហស្បតិ៍ និងថ្ងៃសុក្រ ទី១០ ឧសភាក្នុងទីក្រុងវ៉ាស៊ីតោនបានបិទបញ្ចប់ដោយគ្មានកិច្ចព្រមព្រៀង។ គួររម្លឹកថាក្នុងរយៈពេល ៥ខែចុងក្រោយនេះ ក្រុមអ្នកចរចាចិន និងអាមេរិកបានធ្វើដំណើរទៅមករវាងក្រុងវ៉ាស៊ីតោន និងក្រុងប៉េកាំងដើម្បីជួបចរចាគ្នា ហើយការចរចារយៈពេល ២ថ្ងៃចុងក្រោយជាការចរចាលើកទី១១។ ទោះជាប្រធានាធិបតីអាមេរិកលោកដូណាល់ ត្រាំបានសម្រេចដំឡើងពន្ធពី ១០ ទៅ ២៥% លើទឹកប្រាក់ ២០០ ០០០លានដុល្លារនៃការនាំទំនិញចិននាំចូលអាមេរិកចាប់ពីថ្ងៃសុក្រ ទី១០ ឧសភាក៏ដោយ ក៏ចិននៅតែបន្តប្រកាន់ជំហររបស់ខ្លួនដដែល។ លោកលីវ ហឺ ឧបនាយករដ្ឋមន្រ្តីចិន និងជាអ្នកដឹកនាំក្រុមអ្នកចរចាចិនបានដឹកនាំគណៈប្រតិភូត្រឡប់ទៅប្រទេសចិនវិញ។ តែមុននឹងឡើងយន្តហោះចេញពីក្រុងវ៉ាស៊ីតោនទៅក្រុងប៉េកាំង លោកលីវ ហឺបានជួបក្រុមអ្នកកាសែតចិន រួចបានថ្លែងជាមួយនឹងសម្លេងធ្ងន់ថា ភាគីទាំងពីរចិន និងអាមេរិកបានព្រមព្រៀងជួបគ្នានាពេលខាងមុខក្នុងទីក្រុងប៉េកាំង។ តែលោកលីវ ហឺមិនភ្លេចបញ្ជាក់ទេថា ចិននឹងបន្តប្រកាន់លើគោលការណ៍របស់ខ្លួនដោយគ្មានផ្លាស់ប្តូរ និងថា ចិនមិនភ័យខ្លាចទេ។
ចុះផ្សាយនៅថ្ងៃ៖
ស្តាប់ - ០១:៣៥
« ការចរចាមិនត្រូវបានបញ្ឈប់ត្រឹមនេះទេ។ ភាគីទាំងពីរបានបញ្ជាក់ពីជំហររៀងៗខ្លួនលើប្រធានរឿងទាំងអស់។ យើងបានជជែកគ្នាពីខ្លឹមសារដែលនឹងត្រូវលើកយកទៅពិភាក្សាគ្នានាពេលខាងមុខ ហើយយើងនៅតែមានសុទិដ្ឋិនិយម។ ប្រទេសនីមួយៗមានគោលការណ៍របស់ខ្លួន ហើយចិនក៏មានគោលការណ៍ដាច់ដោយឡែក និងមិនបោះបង់ចោលគោលការណ៍របស់ខ្លួនទេ។
ប្រសិនបើអាមេរិកប្រើគំនាបរបាំងគយដាក់លើយើង ក្នុងនាមជាប្រទេសយើងពិតជាមិនអាចឈរឱបដៃនៅស្ងៀមបានឡើយ។ យើងប្រឆាំងដាច់ខាតនឹងការប្រើនយោបាយដំឡើងពន្ធ។ វាមិនល្អសម្រាប់ចិន វាមិនល្អសម្រាប់អាមេរិក វាមិនល្អសម្រាប់ពិភពលោក ហើយវានឹងមិនធ្វើឲ្យចម្រើននៅក្នុងការដោះស្រាយលើភាពខ្វែងគំនិតគ្នារវាងចិន និងអាមេរិកបានទេ។
អ្វីដែលយើងចង់បាន គឺចង់ឲ្យភាគីអាមេរិកមានភាពអត់ធ្មត់ឲ្យបានច្រើនជាងនេះដើម្បីចៀសវាងកុំឲ្យមានការប្រឈមមុខដាក់គ្នា។ យើងចង់ឲ្យមានកិច្ចព្រមព្រៀងមួយស្មើភាពដែលអាចទទួលយកបានទាំងអស់គ្នា។ គឺជាកិច្ចព្រៀងមួយដ៏ថ្លៃថ្នូររវាងរដ្ឋទាំងពីរដែលគិតពីកិច្ចសហប្រតិបត្តិការរវាងគ្នាទៅថ្ងៃអនាគត។ ដើម្បីអាចឈានដល់ចំណុចនេះបាន យើងត្រូវបោះមួយជំហានម្តងៗ និងត្រូវដោះស្រាយបញ្ហាដោយផ្អែកលើហេតុផលត្រឹមត្រូវ។ តែប្រទេសចិនមិនភ័យខ្លាច រដ្ឋចិនមិនភ័យខ្លាចទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ