១សប្តាហ៍ក្រោយអំពើភេរវកម្ម ប្រទេសស្រីលង្កាកំពុងបន្តទទួលការគំរាមកំហែងថ្មីទៀត
នៅក្នុងប្រទេសស្រីលង្កា មួយសប្តាហ៍ក្រោយភេរវកម្មលើវិហារគ្រិស្តសាសនា និងសណ្ឋាគារទំនើបៗក្នុងទីក្រុងកូឡុំបូដែលសម្លាប់មនុស្សចំនួន ២៥៣នាក់មក ប្រមុខគ្រិស្តសាសនាលោកម៉ាល់កូម រ៉ានហ្ស៊ីបានរៀបចំពិធីសូត្រធម៌ជាលក្ខណៈឯកជនមួយនាថ្ងៃអាទិត្យ ទី២៨ មេសា។ នាឱកាសនោះ ព្រះអង្គបានថ្កោលទោសដោយបានចាត់ទុកទង្វើប្រមាថលើមនុស្សជាតិ។ ប្រតិកម្មរបស់ប្រមុខគ្រិស្តសាសនាអង្គនេះបានធ្វើឡើង ខណៈពេលដែលរដ្ឋាភិបាលកំពុងបន្តការស៊ើបអង្កេត និងកំពុងបន្តប្រតិបត្តិការបោសសំអាតទីតាំងរបស់ពួកភេរវជន។ រដ្ឋអំណាចបានទទួលស្គាល់ថា នៅមានភេរវជនជាច្រើននាក់ទៀតកំពុងគេចខ្លួន និងពួនសំងំ។ លោកអារីយេ គ្រូឡានស្គី សាស្រ្តាចារ្យនៅសាកលវិទ្យា Maryland សហរដ្ឋអាមេរិកបានបញ្ជាក់ថា សក្តានុពលនៃអំពើភេរវកម្ម និងវត្តមានភេរវជនយ៉ាងច្រើនជាសក្ខីកម្មមួយដែលបញ្ជាក់ពីវិសាលភាពនៃការជ្រៀតចូលរបស់ពួកជីហាតអង្គការរដ្ឋអ៊ីស្លាមនៅក្នុងប្រទេសស្រីលង្កា និង នៅទូទាំងអាស៊ីខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២១
« វាជាព្រឹត្តិការណ៍ទូទៅមួយដែលបានចាប់ផ្តើមតាំងពីមុនការធ្លាក់ចុះឥទ្ធិពលរបស់ក្រុមអង្គការរដ្ឋអ៊ីស្លាមទៅទៀត។ តែវាបានស្ទុះកាន់តែខ្លាំងឡើងនៅពេលដែលកាលីហ្វាបានទទួលបរាជ័យនៅក្នុងប្រទេសអ៊ីរ៉ាក់ និងស៊ីរី។ នៅពេលនោះ អង្គការរដ្ឋអ៊ីស្លាមផ្តើមជ្រៀតកម្លាំងរបស់ខ្លួនទៅកាន់តំបន់អាស៊ីខាងត្បូង ចាប់ដៃជាមួយក្រុមអង្គការជ្រុលនិយមក្នុងស្រុក និងជ្រើសរើសសមាជិកជីហាតថ្មីនៅទីនោះ។
ករណីនេះបានកើតមានឡើងនៅក្នុងប្រទេសហ្វីលីពីន នៅក្នុងប្រទេសឥណ្ឌូណេស៊ី នៅបង់ក្លាដែស និងនៅក្នុងប្រទេសផ្សេង ហើយបើរាប់ទៅ គឺវែងអន្លាយក្នុងនោះក៏មានប្រទេសស្រីលង្កាមួយដែរ។ ក្នុងឆ្នាំ ២០១៥ មានពលរដ្ឋស្រីលង្កាអ្នកកាន់សាសនាអ៊ីស្លាមចំនួន ៤៥នាក់បានធ្វើដំណើរទៅចូលរួមជាមួយអង្គការរដ្ឋអ៊ីស្លាមនៅក្នុងប្រទេសស៊ីរី។
បន្ទាប់មក ក្រុមភេរវនិយមក្នុងស្រុកដូចយ៉ាង NTJ ដែលត្រូវបានគេលើកយកទៅនិយាយច្រើនក្នុងសប្តាហ៍នេះបានដាក់ខ្លួនជាអ្នកបម្រើសេវាឲ្យអង្គការរដ្ឋអ៊ីស្លាម។ នេះហើយជាហេតុផលដែលការវាយប្រហារក្នុងពេលបុណ្យគ្រិស្តសាសនាទទួលបានជោគជ័យដ៍ធំមហិមា និងអស្ចារ្យនៃគំរូផែនការដែលរៀបចំដោយក្រុមអង្គការរដ្ឋអ៊ីស្លាម »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ