រុស្ស៊ី-កូរ៉េខាងជើង ៖ ជំនួបកំពូល លើកដំបូង រវាង លោក គីម ជុង អ៊ុន និងលោក ពូទីន
រថភ្លើងក្រោះ ជិះដោយ អគ្គមគ្គុទេសក៏ កូរ៉េខាងជើង លោក គីម ជុង អ៊ុន ថ្ងៃពុធម្សិលមិញ បានបើកដល់ ក្រុង Vladivostok នៅឯចុងបូព៌ាប្រទេសរុស្ស៊ី ជាទីដែល ថ្ងៃ ២៥ មេសានេះ ចាប់ផ្តើមប្រព្រឹត្ត ទៅ កិច្ចចរចាកំពូល របស់ មេដឹកនាំកូរ៉េខាងជើងនេះ ជាមួយ លោកប្រធានាធិបតីរុស្ស៊ី វ៉្លាឌីមៀរ ពូទីន។
ចុះផ្សាយនៅថ្ងៃ៖
កិច្ចចរចា រវាង មេដឹកនាំទាំងពីរ ប្រព្រឹត្តទៅ នៅក្រុង Vladivostok ដែលជាក្រុងផែរុស្ស៊ី ស្ថិតនៅ មាត់មហាសមុទ្រប៉ាស៊ីហ្វិក ។ លោក គីម ជុង អ៊ុន ដែលលើកនេះ ធ្វើជំនួប ជាមួយមេដឹកនាំរុស្ស៊ី គឺ ក្រោយពី គាត់បានជួប ជាមួយប្រធានាធិបតីសរអា លោក ដូណាល់ ត្រាំ អស់ពីរលើកទៅហើយ ៖ មុនដំបូង នៅក្រុង សិង្ហបុរី រួច បន្ទាប់មក នៅក្រុង ហាណូយ ប៉ុន្តែ មិនសម្រេចបានជោគជ័យអ្វីណាទេ។
ក្នុងជំនួប នៅក្រុង Vladivostok លោក គីម ជុង អ៊ុន និង លោក វ៉្លាឌីមៀរ ពូទីន ផ្តោតការពិភាក្សា គឺ ទៅលើ ការខំប្រឹងប្រែងផ្នែកនយោបាយ និង ការទូត ដើម្បីសាកល្បង ដោះស្រាយបញ្ហានុយក្លេអ៊ែរ នៅឧបទ្វីបកូរ៉េ - សេចក្តីនេះ ថ្លែងដោយ ទីប្រឹក្សាប្រមុខរដ្ឋរុស្ស៊ី ខាងកិច្ចការអន្តរជាតិ លោក Yuri Ushakov ។
ក្នុងសម្ភាសន៍ទៅ ទូរទស្សន៍រុស្ស៊ី ក្រោយពីឆ្លងកាត់ព្រំដែនចូលដល់ដីរុស្ស៊ី លោក គីម បានលើកឡើងជាអាទិ៍៖ ខ្ញុំសង្ឃឹមថា កិច្ចចរចា នឹងសម្រេចបានដូចចិត្ត ហើយនឹងមានប្រយោជន៍។ ខ្ញុំសង្ឃឹមថា គូភាគី អាចពិភាក្សាបញ្ហាជាក់លាក់ទាក់ទងនឹងកិច្ចចរចាសន្តិភាព នៅឧបទ្វីបកូរ៉េ និងអំពីទំនាក់ទំនង រុស្ស៊ី-កូរ៉េខាងជើង។
ថ្ងៃពុធម្សិលមិញ វិមានក្រេមឡាំង បានបញ្ចេញយោបល់ថា កិច្ចចរចា ៦ ភាគី ដែលមានចាប់ផ្តើមកាលពី ជាង ១៥ ឆ្នាំ មុន ហើយបច្ចុប្បន្ន ស្ថិតនៅជាប់គាំងទៅហើយ អាចក្លាយជា មធ្យោបាយគាប់ប្រសើរ សម្រាប់ ធ្វើការងារ ដើម្បីរំសាយធាតុនុយក្លេអ៊ែរ នៅឧបទ្វីបកូរ៉េ។
តាមអ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ ៖ សម្រាប់សំណុំរឿងនេះ ក្នុងដំណាក់ឥឡូវ គ្មាន យន្តការអន្តរជាតិណា ដែលប្រកបដោយប្រសិទ្ធភាពជាង កិច្ចចរចា ៦ ភាគីនោះឡើយ ពោលគឺ ចូលរួម ដោយ កូរ៉េទាំងពីរ សរអា ចិន រុស្ស៊ី និង ជប៉ុន។
ព្រមជាមួយនេះ លោក ពេស្កូវ បន្ថែមថា ៖ ចំណែក ការខំប្រឹងប្រែង ធ្វើដោយបណ្តាប្រទេសឯទៀត សក្តិសមនឹងទទួលការគាំទ្រ ប្រសិនបើវាតម្រង់ទៅរំសាយធាតុនុយក្លេអ៊ែរ ពិតប្រាកដមែន និង ទៅ ដោះស្រាយបញ្ហារវាងប្រទេសកូរ៉េទាំងពីរ។
ដោយបារម្ភខ្លាចក្រែងនាំឲ្យក្រុង វ៉ាស៊ីនតោន ថ្នាំងថ្នាក់ រុស្ស៊ី ប្រកាន់ឥរិយាបថជា “អ្នកជួយសម្រួល” មិនមែន ជាគូប្រជែងឡើយ ក្នុងកិច្ចចរចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ