លោកកាឡូស ហ្គោន៖ខ្ញុំគ្មានកំហុស និងជាជនរងគ្រោះដោយការឃុបឃិតពីថ្នាក់ដឹកនាំខ្លះរបស់ក្រុមហ៊ុននីសាន់
នៅក្នុងប្រទេសជប៉ុន អតីតអគ្គនាយកសម្ព័ន្ធក្រុមហ៊ុនផលិតរថយន្តបារាំង-ជប៉ុនម៉ាករ៉ឺណូ នីសាន់បានថ្លែងបញ្ជាក់ជាថ្មីថា លោកជាជនគ្មានកំហុសទេ។ ការថ្លែងរបស់លោកហ្គោននេះបានធ្វើឡើងនៅក្នុងខ្សែអាត់វីដេអូមួយផ្សព្វផ្សាយដោយក្រុមមេធាវីរបស់លោកនៅក្នុងសន្និសីទកាសែតក្នុងទីក្រុងតូក្យូនាថ្ងៃអង្គារ ទី៩ មេសា។ គឺជាសារដែលលោកហ្គោនបានថ្លែងជាភាសាអង់គ្លេស និងបានថតទុកក្នុងពេលដែលលោកកំពុងជាប់ឃុំក្នុងផ្ទះ ពោលមុនពេលដែលលោកត្រូវបានតុលាការចាប់ខ្លួនឃុំជាថ្មីកាលពីថ្ងៃទី៤ មេសា។ លោកយូនីស្ហ៊ីរ៉ូ ហ៊ីរ៉ូណាកាដែលជាមេធាវីម្នាក់របស់លោកហ្គោនបានប្រាប់ឲ្យដឹងថា លោកនឹងដាក់បណ្តឹងទៅតុលាការកំពូលដើម្បីទទួលបានការដោះលែងកូនក្តីរបស់លោក។ ទន្ទឹមនឹងបញ្ជាក់ពីការគ្មានកំហុស ជនជាតិបារាំងដើមកំណើតលីបង់ និងអ៊ីស្រាអែលវ័យ ៦៥ឆ្នាំរូបនេះក៏បានប្រាប់ឲ្យដឹងថា លោកជាជនរងគ្រោះដោយការឃុបឃិត ក្បត់ពីថ្នាក់ដឹកនាំមួយចំនួននៅក្នុងក្រុមហ៊ុននីសាន់។ តែលោកហ្គោនមិនបានប្រាប់ឈ្មោះថ្នាក់ដឹកនាំទាំងនោះទេ។
ចុះផ្សាយនៅថ្ងៃ៖
ស្តាប់ - ០១:៤៤
« សារទី១ របស់ខ្ញុំគឺថា ខ្ញុំគ្មានកំហុសទេ គ្មានកំហុសលើរាល់ការចោទទាំងអស់ប្រឆាំងលើរូបខ្ញុំ ហើយក៏គ្មានកំហុសលើរាល់ការចោទប្រកាន់ជាច្រើនផ្សេងទៀតដែរ។ ខ្ញុំត្រូវបានគេចាត់ទុកជាបុគ្គលម្នាក់ដែលស្រឡាញ់លុយ និងជាអ្នកដឹកនាំក្រុមហ៊ុនផ្តាច់ការម្នាក់។
សារទី២ ដែលខ្ញុំចង់និយាយប្រាប់លោកអ្នកគឺថា ខ្ញុំស្រឡាញ់ និងចូលចិត្តប្រទេសជប៉ុន ហើយខ្ញុំស្រឡាញ់ក្រុមហ៊ុននីសាន់។ លើសពីនេះទៅទៀត តាំងពីខ្ញុំបានផ្តើមធ្វើការជាមួយក្រុមហ៊ុននីសាន់កាលពី ២០ឆ្នាំមុន យើងបានទទួលជោគជ័យច្រើនណាស់ និងទទួលបានលទ្ធផលយ៉ាងប្រសើរទៀតផង។
ខ្ញុំក៏ចង់បរិហារនៅទីនេះពីការរួមគំនិតក្បាត់ខ្ញុំពីសំណាក់ថ្នាក់ដឹកនាំមួយចំនួននៅក្នុងក្រុមហ៊ុននីសាន់។ មានការបារម្ភ ភ័យខ្លាចថា ជំហានបន្ទាប់នៅក្នុងសម្ព័ន្ធក្រុមហ៊ុនរ៉ឺណូ នីសាន់ គឺការច្របាច់បញ្ចូលគ្នាជាក្រុមហ៊ុនតែមួយ។ កម្មវត្ថុមួយនេះអាចនឹងគំរាមកំហែងដល់មនុស្សមួយចំនួន និងអាចប៉ះពាល់ដល់ស្វ័យភាពរបស់ក្រុមហ៊ុននីសាន់ផង។
ចុងក្រោយខ្ញុំសង្ឃឹមថា នឹងទទួលបានការជំនុំជម្រះមួយប្រកបដោយយុត្តិធម៌ និងសមធម៌។ អរគុណចំពោះការយកចិត្តទុកដាក់ស្តាប់របស់ខ្ញុំ ហើយសុំទោសដែលមិនអាចដោះដូរ ឆ្លើយឆ្លងគ្នាបាន។ អស់លោកពិតជាមានសំណួរច្រើនណាស់ដែលខង់សួរខ្ញុំ។ ខ្ញុំគិតថា យើងនឹងអាចឆ្លើយឆ្លងគ្នានាពេលឆាប់ៗខាងមុខ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ