នៅហ្វីលីពីន ប៉ូលិសបានរងការចោទប្រកាន់ពីបទសម្លាប់កសិករចំនួន ១៤នាក់
នៅថ្ងៃអាទិត្យ ទី៣១ មីនា ក្រុមអង្គការការពារសិទ្ធិមនុស្សបានចោទប៉ូលិសហ្វីលីពីនពីបទសម្លាប់រង្គាលលើកសិករចំនួន ១៤នាក់នៅប៉ែកកណ្តាលប្រទេសដែលបានចេញមុខការពារដីស្រែរបស់ខ្លួន។ ចំណែករដ្ឋអំណាចមិនបានបដិសេធពីការស្លាប់មនុស្សទាំង ១៤នាក់នោះទេ តែបានបញ្ជាក់ថា ប៉ូលិសបានអន្តរាគមន៍វាយបកលើការវាយប្រហាររបស់ក្រុមឧទ្ទាមកុម្មុយនិស្ត និងទទួលស្គាល់ថា មានអ្នកស្លាប់ខ្លះក្នុងចំណោមអ្នកស្លាប់ទាំង ១៤នាក់ជាកសិករ។ តើឧប្បត្តិហេតុមួយនេះបានកើតឡើងយ៉ាងដូចម្តេចខ្លះ?។
ចុះផ្សាយនៅថ្ងៃ៖
ស្តាប់ - ០១:៥៩
ឧប្បត្តិហេតុមួយនេះបានកើតមានក្នុងថ្ងៃសៅរ៍ ទី៣០ មីនាដោយអ្នកនាំពាក្យប៉ូលិសហ្វីលីពីនលោកអេឌីលប៊ែរតូ អឺរ៉ាវបាបានបញ្ជាក់ថា បុរសទាំង ១៤នាក់បានបើកការបាញ់រះលើកម្លាំងសន្តិសុខដែលកំពុងចុះអន្តរាគមន៍ឆែកឆេរស្វែងរកអាវុធ។ តាមលោកអេឌីលប៊ែរតូ កម្លាំងសន្តិសុខបានបង្ខំចិត្តបាញ់តបវិញដោយសម្លាប់បុរសទាំង ១៤នាក់នោះ និងទទួលស្គាល់ថាក្នុងចំណោមអ្នកទាំង ១៤នាក់ ពិតជាមានខ្លះជាកសិករ តែមិនដឹងមានគ្នាប៉ុន្មាននាក់ទេ។ ក្រៅពីសម្លាប់មនុស្សបាន ១៤នាក់ ប៉ូលិសក៏បានប្រាប់ពីការចាប់ខ្លួនមនុស្សបាន ១២នាក់ និងមានប៉ូលិសម្នាក់រងរបួសនៅក្នុងឧប្បត្តិហេតុនោះ។
តែក្រុមអង្គការការពារសិទ្ធិមនុស្ស និងក្រុមសមាគមបានអះអាងផ្ទុយពីនេះដោយបញ្ជាក់ថា បុរសស្លាប់ទាំង ១៤នាក់សុទ្ធសឹងជាកសិករដែលគ្មានអាវុធ និងដែលអ្នកខ្លះមានវ័យចំណាស់។ បើទង្វើនេះមិនមែនជាការសម្លាប់រង្គាល តើវាជាទង្វើអី នេះជាការចោទសួររបស់សកម្មជនសិទ្ធិមនុស្សម្នាក់លោកស្រីម៉ារីយ៉ា សុល តូឡេ។ តាមលោកស្រីម៉ារីយ៉ា មនុស្សទាំង ១៤នាក់បានតាំងខ្លួនជាសកម្មជន ឬមួយជាអ្នកដែលមានសមានចិត្តជាមួយក្រុមឧទ្ទាមកុម្មុយនិស្តមែន តែពួកគេជាកសិករសុទ្ធសាធដែលបានចេញមុខការពារដីស្រែរបស់ពួកគេ។
គួររម្លឹកថា តាំងពីកន្លះសតវត្សមកហើយដែលហ្វីលីពីនបានប្រឈមមុខនឹងការងើបបះបោររបស់ក្រុមឧទ្ទាមកុម្មុយនិស្ត។ ក្រោយការជាប់ឆ្នោតប្រធានាធិបតីក្នុងឆ្នាំ ២០១៦ លោកឌុយទែរតេបានផ្តើមកិច្ចចរចាសន្តិភាពជាមួយពួកឧទ្ទាម តែបានដកខ្លួនចេញពីតុចរចាវិញ រួចចេញបញ្ជាឲ្យកម្ទេចចលនាកងទ័ពថ្មីនៃប្រជាជនដែលជាសាខាយោធារបស់គណបក្សកុម្មុយនិស្តហ្វីលីពីន។ ទន្ទឹមគ្នានេះ ជម្លោះដីធ្លីក៏កំពុងបន្តជាជំងឺរុំាំរ៉ៃដែលរដ្ឋាភិបាលបានរងការចោទប្រកាន់ពីបទយឺតយ៉ាវក្នុងការចែកដីស្រែឲ្យពលរដ្ឋរបស់ខ្លួន។ បច្ចុប្បន្ន ហ្វីលីពីនមានកសិករចំនួន ២០លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ