គណបក្សរបស់លោកប្រាយុទ្ធមានសំឡេងនាំមុខគេក្នុងការបោះឆ្នោតនៅថៃ
ការបោះឆ្នោតថៃបានបិទបញ្ចប់ទៅ កាលពីល្ងាចថ្ងៃអាទិត្យម្សិលមិញ ជាមួយនឹងការភ្ញាក់ផ្អើលមួយចំនួន ដែលគេមិនបានគិតដល់។ ក្រៅពីអត្រាអ្នកចេញទៅបោះឆ្នោតទាប ត្រឹម ៦៤% អ្វីដែលកាន់តែភ្ញាក់ផ្អើលយ៉ាងខ្លាំងទៅទៀតនោះ គឺគណបក្សផាឡាំងប្រាឆារ៉ាត់ របស់លោកប្រាយុទ្ធ ចាន់អូចា ដែលជាអ្នកទទួលសំឡេងនាំមុខគេ។
ចុះផ្សាយនៅថ្ងៃ៖ កែប្រែថ្ងៃទី៖
គ្រប់គ្នាដឹងថា ការបោះឆ្នោតថៃនៅពេលនេះ គឺត្រូវធ្វើឡើងទៅតាមច្បាប់ ដែលរបបសឹកជាអ្នកតាក់តែងឡើងដោយខ្លួនឯង ហើយធ្វើតម្រូវប្រយោជន៍ខ្លួនឯង។ ក៏ប៉ុន្តែ អ្នកវិភាគជាទូទៅ មិនដែលនឹកស្មានដល់ទេថា គណបក្សផាឡាំងប្រាឆារ៉ាត់ អាចនឹងមានសំឡេងនាំមុខគេបែបនេះ។
នៅប្រមាណជា ម៉ោង ១០យប់ ថ្ងៃបោះឆ្នោត នៅក្នុងពេលដែលការរាប់សន្លឹកឆ្នោតនៅទូទាំងប្រទេសត្រូវបានគេធ្វើចប់ជាង ៩០% ហើយនោះ លទ្ធផលក្រៅផ្លូវការ ដែលបានមកពីគណៈកម្មាធិការជាតិរៀបចំការបោះឆ្នោត បង្ហាញថា គណបក្សផាឡាំងប្រាឆារ៉ាត់ទទួលបានសន្លឹកឆ្នោតគាំទ្រនាំមុខគេ គឺបានរហូតដល់ទៅ ៧លាន៦សែនសន្លឹក នាំមុខគណបក្សភឿថៃ ដែលទទួលបានតែជាង ៧លានសន្លឹក។
ជាការពិតណាស់ថា ដោយសារតែវិធីគណនានៅក្នុងប្រព័ន្ធបោះឆ្នោត ដែលកែប្រែដោយរបបសឹក ចំនួនអាសនៈដែលគណបក្សនីមួយៗត្រូវទទួលបាន អាចមិនស្របទៅតាមលំដាប់លំដោយនៃទំហំសន្លឹកឆ្នោតដែលគេទទួលបាននោះទេ។ គណៈកម្មាធិការជាតិរៀបចំការបោះឆ្នោតថៃគ្រោងនឹងបញ្ចប់ការរាប់សន្លឹកឆ្នោត នៅត្រឹមព្រឹកថ្ងៃចន្ទនេះ ដើម្បីអាចឈានទៅធ្វើការគណនាកំណត់ចំនួនអាសនៈរបស់គណបក្សនីមួយៗ។
លទ្ធផលដែលគួរឲ្យកត់សម្គាល់មួយទៀត គឺគណបក្សអណាខុតម៉ៃ ដែលទើបនឹងបង្កើតថ្មី បានទទួលសំឡេងឆ្នោតគាំទ្រច្រើនជាងគេលំដាប់ទី៣ (៥លានសន្លឹក) ពោលគឺ បានច្រើនជាងគណបក្សប្រជាធិបតេយ្យរបស់លោកអាភិស៊ីតទៅទៀត ដែលជាគណបក្សដ៏ចំណាស់បំផុតនៅក្នុងប្រទេសថៃ ហើយដែលស្ថិតនៅលំដាប់ទី៤ (ជាង ៣លានសន្លឹក) ស្ទើរតែស្មើគ្នាជាមួយនឹងគណបក្សភូមិចៃថៃ (ជាង ៣លានសន្លឹក)។
កាន់តែធ្ងន់ធ្ងរជាងនេះទៅទៀត គឺគណបក្សប្រជាធិបតេយ្យទំនងជានឹងមិនទទួលបានអាសនៈណាមួយសោះ នៅក្នុងចំណោមអាសនៈទាំង ៣០ នៅក្នុងទីក្រុងបាងកក ដែលធ្លាប់តែជាសម្បុកនៃអ្នកគាំទ្រគណបក្សប្រជាធិបតេយ្យតាំងពីដើមមក។ ភ្លាមៗក្រោយពីបានឃើញលទ្ធផលដ៏គួរឲ្យខកចិត្តនេះ លោកអាភិស៊ីតក៏បានប្រកាសលាឈប់ពីមុខតំណែងជាមេដឹកនាំគណបក្សប្រជាធិបតេយ្យ ដូចអ្វីដែលលោកធ្លាប់បានសន្យាកាលពីមុន ដែលថា លោកនឹងលាឈប់ប្រសិនបើគណបក្សប្រជាធិបតេយ្យទទួលបានតិចជាង ១០០អាសនៈ នៅក្នុងការបោះឆ្នោតនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ