រដ្ឋាភិបាលបារាំងកំពុងដោះដៃពីលោក ការឡូស ហ្គោន ប្រធានក្រុមហ៊ុនរថយន្តរឺណូឬ ?
សម្រាប់បារាំង ពុំសូវចេញស្តីទេ ទោះបីជាត្រូវចាប់ខ្លួន និងជាប់ឃុំនៅក្នុងប្រទេសជប៉ុន ពីបទសង្ស័យកេងបន្លំថវិកា តាំងពីថ្ងៃទី ១៩វិច្ឆិកា២០១៨មកក៏ដោយ ក៏លោក ការឡូសហ្គោន នៅតែមានឈ្មោះជាប្រធានក្រុមហ៊ុនរថយន្តរឺណូ ដដែល។ ប៉ុន្តែនៅពេលនេះរដ្ឋាភិបាលបារាំង ទំនងជាកំពុងចង់ដោះដៃពីលោក ការឡូស ហ្គោនហើយ។ រដ្ឋមន្ត្រីក្រសួងសេដ្ឋកិច្ចបានស្នើសុំឱ្យក្រុមហ៊ុនរឺណូជ្រើសរើសប្រធានថ្មី។
ចុះផ្សាយនៅថ្ងៃ៖
ស្តាប់ - ០២:០៤
រដ្ឋបារាំងដែលជាម្ចាស់ភាគហ៊ុនមួយចំណែករបស់ក្រុមហ៊ុនរថយន្តរឺណូ មិនដែលចេញស្តី អ្វីទេតាំងពីរឿងអាស្រូវបានផ្ទុះឡើង ! បារាំងតែងរំលឹកនិងគិតដល់ភាពគ្មានទោសរបស់លោក ការឡូស ហ្គោន ជានិច្ច ដរាបណាតុលាការពុំទាន់ចេញសាលក្រមដាក់ទោសទេ។ ហេតុដូច្នេះហើយបានជាលោក ការឡូស ហ្គោន នៅតែមានឈ្មោះជាប្រធានក្រុមហ៊ុន និងមានការតែងតាំងប្រធានស្តីទីសម្រាប់ដឹកនាំជំនួស។
ប៉ុន្តែអវត្តមានរបស់លោក ការឡូស ហ្គោន ពីក្រុមហ៊ុន អាចនឹងត្រូវអូសបន្លាយពេលយូរទៀត ព្រោះលោករងការចោទប្រកាន់ដល់ទៅបីករណី និងបន្តស្ថិតនៅក្នុងការឃុំឃាំងនៅជប៉ុន មិនដឹងពេលណាអាចចេញមករួចទេ។ ដោយសារមូលហេតុនេះ ទើបបានជារដ្ឋាភិបាលបារាំង យល់ថាល្មមដល់ពេលត្រូវប្តូរផ្លាស់ ឆ្លងទៅដំណាក់កាលថ្មីហើយ។ ក្រុមហ៊ុនត្រូវការមានអភិបាលកិច្ចប្រកបដោយនិរន្តរភាព ដូច្នេះក្រុមហ៊ុនត្រូវកោះប្រជុំក្រុមប្រឹក្សា ដើម្បីតែងតាំងប្រមុខដឹកនាំក្រុមហ៊ុនដែលមានបុគ្គលិកកម្មការរាប់ពាន់នាក់។ នេះជាប្រសាសន៍របស់រដ្ឋមន្ត្រីក្រសួងសេដ្ឋកិច្ច។
កិច្ចប្រជុំក្រុមប្រឹក្សាទំនងជាត្រូវរៀបចំឡើងនៅរវាងប៉ុន្មានថ្ងៃខាងមុខ ឬទំនងនៅថ្ងៃអាទិត្យទី ២០មករានេះ។ អ្នកដែលនឹងអាចក្លាយជាប្រមុខដឹកនាំក្រុមហ៊ុនថ្មី ទំនងជារូបលោក Jean-Dominique Sénard ម្ចាស់ក្រុមហ៊ុនផលិតកង់ឡានMichelin។
ប៉ុន្តែរដ្ឋាភិបាលបារាំងមិនសើរើអ្វីដែលជាសម្ព័ន្ធក្រុមហ៊ុនរឺណូ-នីសាន់ ដែលជាមរតករបស់លោក ការឡូស ហ្គោនទេ។ ក្នុងពេលជាមួយគ្នានេះ អន្តរការីជាច្រើនរដ្ឋាភិបាល បានធ្វើដំណើរទៅកាន់ក្រុងតូក្យូ ដើម្បីជជែកអំពីសម្ព័ន្ធក្រុមហ៊ុនរឺណូ-នីសាន់។ ចំណែកលោក ការឡូស ហ្គោន ដែលជាប់ចោទពីបទរំលោភទំនុកចិត្ត និងកេងបន្លំថវិកា ទំនងជាត្រូវបន្តជាប់ឃុំឃាំងរាប់ខែទៀត។ តុលាការតូក្យូ ទើបបានច្រានចោលសំណើសុំឱ្យនៅក្រោយឃុំ របស់លោក ការឡូស ហ្គោន។ មេធាវីរបស់លោក គ្រោងនឹងធ្វើបណ្តឹងឧទ្ធរណ៍បន្តទៅតុលាការកំពូលទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ