ថៃ៖នារីជនជាតិអារ៉ាប៊ីសាអូឌីតម្នាក់ត្រូវបានចាប់ខ្លួនក្នុងទីក្រុងបាងកក
នៅក្នុងប្រទេសថៃ កញ្ញាជនជាតិអារ៉ាប៊ីសាអូឌីតម្នាក់ឈ្មោះរ៉ាហា ម៉ូហាម៉េត អាល់គូណាន់ត្រូវបានចាប់ខ្លួននៅព្រលានយន្តហោះសុវណ្ណភូមិក្នុងទីក្រុងបាងកកនាថ្ងៃអាទិត្យ ទី៦ មករា។ មានអាយុ ១៨ឆ្នាំ កញ្ញារ៉ាហាបានប្រាប់ពីក្តីបារម្ភចំពោះជីវិត ប្រសិនបើរដ្ឋអំណាចអន្តោប្រវេសន៍ថៃចាប់បញ្ជូនគាត់ឲ្យត្រឡប់ទៅប្រទេសអារ៉ាប៊ីសាអូឌីតវិញ។ កញ្ញាអារ៉ាប៊ីសាអូឌីតរូបនេះដដែលបាននិយាយប្រាប់រដ្ឋអំណាចអន្តោប្រវេសន៍ថៃនៅព្រលានយន្តហោះថា រូបគាត់បានបដិសេធត្រឡប់ទៅអារ៉ាប៊ីសាអូឌីតវិញនាពេលធ្វើដំណើរដល់ព្រលានយន្តហោះនៃប្រទេសកូវ៉ែត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
កញ្ញាជនជាតិអារ៉ាប៊ីសាអូឌីតរ៉ាហា ម៉ូហាម៉េត អាល់គូណាន់បាននិយាយប្រាប់ AFP ថា រូបគាត់ត្រូវបានក្រុមអ្នកទទួលខុសត្រូវជនជាតិអារ៉ាប៊ីសាអូឌីត និងកូវ៉ែតចាប់ខ្លួននៅព្រលានយន្តហោះសុវណ្ណភូមិក្នុងទីក្រុងបាងកក ហើយបានរឹបអូសយកលិខិតឆ្លងដែនរបស់គាត់។ ការលើកឡើងរបស់កញ្ញារ៉ាហាដូចនេះក៏ត្រូវបានបញ្ជាក់ដោយអង្គការការពារសិទ្ធិមនុស្ស Human Rights Watch ដែរ។ កញ្ញារ៉ាហាបានអះអាងថា បុរសម្នាក់ដែលជាអ្នកជូនដំណើរ និងមើលការខុសត្រូវលើរូបគាត់បានរាយការណ៍ប្រាប់ប៉ូលិសថា រូបកញ្ញាបានធ្វើដំណើរដោយគ្មានការអនុញ្ញាតទេ។
តែកញ្ញាបានពន្យល់បកស្រាយថា កញ្ញាបានព្យាយាមរត់ចេញពីផ្ទះដើម្បីគេចពីការតាមធ្វើទុកបុកម្នេញពីក្រុមគ្រួសារ។ ក្រុមគ្រួសារដែលបានចាប់កញ្ញាឃុំនៅក្នុងបន្ទប់មួយបិទទ្វារចាក់សោរជាប់រយៈពេល ៦ខែ ដោយសារតែនាងបដិសេធមិនព្រមកាត់សក់ នេះជាការពន្យល់បន្ថែមរបស់កញ្ញារ៉ាហា។ កញ្ញាវ័យ ១៨ឆ្នាំរូបនេះដដែលបានបន្ថែមដោយសុទិដ្ឋិនិយមថា រូបនាងនឹងត្រូវគេចាប់ដាក់គុក បើត្រូវគេបញ្ជូនត្រឡប់ទៅអារ៉ាប៊ីសាអូឌីតវិញ ហើយថា រូបនាងនឹងត្រូវគេសម្លាប់ចោលនៅពេលចេញពីគុកវិញ។
លោកស៊ូរ៉ាឆាត ហាក់ប៉ាន ប្រធានការិយាល័យអន្តោប្រវេសន៍ថៃបានប្រាប់ឲ្យដឹងថា កញ្ញារ៉ាហាត្រូវបានចាប់ខ្លួនក្នុងពេលដែលយន្តហោះដឹកកញ្ញាពីប្រទេសកូវ៉ែតបានចុះចតនៅព្រលានយន្តហោះសុវណ្ណភូមិក្នុងទីក្រុងបាងកក និងថាខណៈនេះ កញ្ញាកំពុងស្នាក់នៅក្នុងសណ្ធាគារមួយនៅព្រលាន រួចបន្ថែមថា កញ្ញាគ្មានលុយ និងសំបុត្រយន្តហោះជាប់នឹងខ្លួនទេ។ តាមលោកស៊ូរ៉ាឆាត កញ្ញារ៉ាហាបានរត់ចេញពីគ្រួសារដើម្បីគេចពីការរៀបការ និងបារម្ភពិជីវិត បើនាងត្រឡប់ចូលស្រុកវិញ។ តែកញ្ញារ៉ាហាបានបដិសេធចំពោះការលើកឡើងនេះដោយអះអាងថា នាងចុះចតនៅក្រុងបាងកកដើម្បីបន្តដំណើរទៅសុំសិទ្ធិជ្រកកោនក្នុងប្រទេសអូស្រា្តលី។
លោកស៊ូរ៉ាឆាត ហាក់ប៉ានបានបញ្ជាក់ពីការបញ្ជូនកញ្ញារ៉ាហាទៅអារ៉ាប៊ីសាអូឌីតវិញនៅថ្ងៃចន្ទ ទី៧ មករា។ តើអ្វីទៅជាមូលហេតុពិតនៃការចាប់ខ្លួនកញ្ញាអារ៉ាប៊ីសាអូឌីតកញ្ញារ៉ាហាពេលនេះ?។ គេនៅមិនទាន់មានប្រតិកម្មយ៉ាងណាពីស្ថានទូតអារ៉ាប៊ីសាអូឌីតប្រចាំប្រទេសថៃ ឬពីរដ្ឋអំណាចអារ៉ាប៊ីសាអូឌីតនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ