កំណើនសេដ្ឋកិច្ចចិនធ្លាក់ចុះទាបខ្លាំង នៅត្រីមាសទី ៣ ឆ្នាំនេះ
កំណើនសេដ្ឋកិច្ចចិន បានធ្លាក់ថយចុះ មកនៅត្រឹម ៦,៥%សម្រាប់ត្រីមាសទី ៣ ឆ្នាំនេះ។ នេះបើតាមការចុះផ្សាយរបស់ការិយាល័យស្ថិតិជាតិចិន នៅថ្ងៃសុក្រនេះ។ ៦,៥%ជាអត្រាកំណើនដ៏ទាប ដែលចិនមិនធ្លាប់ ជួបប្រទះ ចាប់តាំងពីវិបត្តិហិរញ្ញវត្ថុសកល កាលពីឆ្នាំ ២០០៨។ កំណើនសេដ្ឋកិច្ចរបស់មហាអំណាចសេដ្ឋកិច្ចពិភពលោក ទី២ ធ្លាក់ចុះ នៅពេលដែលអាមេរិក ចិនកំពុងធ្វើសង្រ្គាមពាណិជ្ជកម្មនឹងគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
កំណើនសេដ្ឋកិច្ចចិន នៅឆ្នាំនេះ បានធ្លាក់ថយចុះបន្តបន្ទាប់ ពី៦,៨% នៅត្រីមាសទី១ មកនៅត្រឹម ៦,៥% សម្រាប់ត្រីមាសទី៣។ កំណើនសេដ្ឋកិច្ចតែ៦,៥% ធ្លាប់ជាការព្យាករទុក របស់រដ្ឋាភិបាលក្រុងប៉េកាំង ប៉ុន្តែ ៦,៥% ជាអត្រាកំណើនដ៏ទាប ដែលប្រទេសចិន មិនធ្លាប់មានចាប់តាំង ពីឆ្នាំ ២០០៩ មក (ចាប់តាំងចិនធ្វើនយោបាយជំរុញសេដ្ឋកិច្ច នៅក្រោយវិបត្តិហិរញ្ញវត្ថុ សកល នៅឆ្នាំ ២០០៨)។
អ្នកនាំពាក្យរបស់ការិយាល័យស្ថិតិចិន ដែលជាអ្នកបង្ហាញតួលេខ នៅថ្ងៃសុក្រនេះ ទទួលស្គាល់ថា បរិយាកាសដ៏ស្មុគស្មាញ នៅបរទេស ហើយនិងនយោបាយកំណែទម្រង់ ក្នុងស្រុក កំពុងធ្វើឲ្យកំណើនសេដ្ឋកិច្ចរបស់ចិន នៅថេរនឹងថ្កល់។
នៅមួយរយៈចុងក្រោយនេះ រដ្ឋាភិបាលចិន ដែលព្រួយបារម្ភពីការកើនឡើងនៃបរិមាណ ប្រាក់បំណុលក្នុងប្រទេស បានរឹតបន្តឹងលក្ខខណ្ឌខ្ចីប្រាក់ កាត់បន្ថយការចំណាយសាធារណៈ ហើយនិងការវិនិយោគ នៅតាមទីមូលដ្ឋាន។ នយោបាយរឹតបន្តឹងកំពុងបង្កភាពស្មុគស្មាញដល់ក្រុមហ៊ុនវិនិយោគ ប៉ះពាល់ទៅដល់គម្រោងការដា្ឋនសាងសង់ហេដ្ឋារចនាសម្ព័ន្ធ ហើយនិងផ្ទះសម្បែង ដែលតាមពិតជាសរសរគ្រឹះ នៃផលិតផលក្នុងស្រុកសរុបរបស់ចិន។
កំណើនសេដ្ឋកិច្ច របស់មហាអំណាចចិន ធ្លាក់ថយចុះ នៅចំពេលដែលចិនកំពុងសង្រ្គាមពាណិជ្ជកម្មអាមេរិក។ អ្នកជំនាញ មួយចំនួនបាននិយាយប្រាប់ប្រព័ន្ធផ្សព្វផ្សាយអង់គ្លេស BBC ថា ខណៈពេលសេដ្ឋកិច្ចរបស់ចិនកំពុងតឹងតែង ដោយសារតែនយោបាយកាត់បន្ថយ ប្រាក់បំណុល ក្នុងស្រុក សង្រ្គាមពាណិជ្ជកម្មជាមួយអាមេរិក ជាអ្វីដែលប្រទេសចិន មិនបានគិតស្មានដល់នោះទេ។ ការសម្រេចរបស់លោកដូណាល់ ត្រាំ ក្នុងការដំឡើងពន្ធលើទំនិញចិន នាំចូលទៅអាមេរិក ក្នុងទំហំទឹកប្រាក់២៥០ពាន់លានដុល្លារ កំពុងពិន័យទំនិញនាំចេញរបស់ចិន ដែលជាម៉ាស៊ីនសេដ្ឋកិច្ចសំខាន់របស់ចិន។ ទោះបីជាការនាំចេញរបស់ចិន ប្រចាំត្រីមាសទី ៣ មិនទាន់រងជាប់ដង្កាប់ពន្ធគយរបស់អាមេរិក ប៉ុន្តែ គេវាយតម្លៃថា ផលប៉ះពាលជាអវិជ្ជមានទៅលើការនាំចេញរបស់ចិន ដោយសារសង្រ្គាមពាណិជ្ជកម្មអាមេរិក ចិន នឹងស្តែងឲ្យឃើញ នៅឆ្នាំក្រោយ។
ការស្ទង់មតិជាច្រើនបានបង្ហាញថា ដោយសារតែជម្លោះ ពាណិជ្ជកម្មចិន និងអាមេរិក ក្រុមហ៊ុនអាមេរិក និងអឺរ៉ុបជាច្រើន បានផ្អាក ទៅវិញ គម្រោងវិនិយោគរបស់ខ្លួន នៅប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ