តើលោកអាន់វ៉ា អ៊ីប្រាហ៊ីមកំពុងឆ្ពោះទៅកាន់តំណែងនាយករដ្ឋមន្រ្តីម៉ាឡេស៊ី?
ចុះផ្សាយនៅថ្ងៃ៖
ស្តាប់ - ០៦:៥១
នៅម៉ាឡេស៊ី អតីតឧបនាយករដ្ឋមន្រ្តី និងអ្នកទោស ដែលទើបត្រូវដោះលែងចេញពីពន្ធនាគារ លោកអាន់វ៉ា អ៊ីប្រាហ៊ីម បានជាប់ឆ្នោត ជាអ្នកតំណាងរាស្រ្ត នៅក្នុងការបោះឆ្នោតសភា មួយភាគ កាលពីថ្ងៃសៅរ៍ម្សិលមិញ។ ការទទួលបានអាសនៈអ្នកតំណាងរាស្រ្ត ជាសក្ខីកម្មនៃការវិលត្រលប់ចូលឆាកនយោបាយសាជាថ្មី និងដំណើរឆ្ពោះទៅកាន់តំណែងនាយករដ្ឋមន្រ្តីម៉ាឡេស៊ី របស់លោកអាន់វ៉ា អ៊ីប្រាហ៊ីម។ តើអតីតមេបក្សប្រឆាំងម៉ាឡេស៊ី ដែលធ្លាប់ជាប់ពន្ធនាគារដល់ទៅ២ នឹងអាចក្លាយខ្លួនជាអនាគតមេដឹកនាំម៉ាឡេស៊ី ដូចការរំពឹងទុករបស់ក្រុមគាំទ្ររបស់លោកដែរឬទេ ?
នៅបន្ទាប់ពីឈ្នះឆ្នោត កាលពីថ្ងៃសៅរ៍ ទី ១៣តុលា លោកអាន់វ៉ា អ៊ីប្រាហ៊ីមនឹងស្បថ ចូលធ្វើការ ក្នុងនាមជាអ្នកតំណាងរាស្រ្ត នៅសភា ម៉ាឡេស៊ី នៅថ្ងៃចន្ទទី ១៥ តុលា។ ការទទួលបានអាសនៈ នៅសភា គឺប្រៀបបាននឹងការបោះ១ ជំហានទៅមុខ របស់លោកអ៊ីប្រាហ៊ីមសម្រាប់ទៅកាន់តំណែងជានាយករដ្ឋមន្រ្តី ម៉ាឡេស៊ី ព្រោះថា លោក មហាធៀរ មហាម៉ាត់ នាយករដ្ឋមន្រ្តី បច្ចុប្បន្ន ដែលបានចាប់ដៃគូជាមួយ លោកអាន់វ៉ា អ៊ីប្រាហ៊ីម ក្នុងគណបក្សកាន់អំណាច បាននិយាយរួចហើយថា លោកនឹងប្រគល់តំណែងទៅឲ្យលោកអ៊ីប្រាហ៊ីម នៅក្រោយលោកអ៊ីប្រាហ៊ីមត្រូវដោះលែងចេញពីពន្ធនាគារ។
គេមិនរំពឹងថា លោកអ៊ីប្រាហ៊ីមនឹងចូលទៅកាន់តំណែងនាយករដ្ឋមន្រ្តី ជំនួសលោកមហាធៀរភ្លាមៗដែរ ព្រោះថា លោកនាយករដ្ឋមន្រ្តី មហាធៀរ ដែលឥលូវនេះ មានអាយុ ៩៣ឆ្នាំ ធ្លាប់បានបញ្ជាក់ហើយថា លោកនឹងកាន់អំណាចយ៉ាងតិច ២ឆ្នាំ និងអាចចូលនិវត្តន៍នៅអាយុ៩៥ឆ្នាំ។
សូមអាន៖ ម៉ាឡេស៊ី៖ មេដឹកនាំបក្សប្រឆាំង អាន់វ៉ា អ៊ីប្រាហ៊ីម ត្រូវដោះលែងចេញពីគុក
តើលោកមហាធៀរ ពិតជាប្រគល់តំណែងនាយករដ្ឋមន្រ្តី ទៅឲ្យលោកអ៊ីប្រាហ៊ីម តាមការសន្យា?
សម្រាប់អ្នកតាមដាននយោបាយម៉ាឡេស៊ី ទោះបីជាលោកមហាធៀរសន្យាថា នឹងប្រគល់តំណែងនាយករដ្ឋមន្រ្តី ទៅឲ្យលោកអាន់វ៉ា អ៊ីប្រាហ៊ីម ប៉ុន្តែ រឿងនេះមិនប្រាកដថា នឹងអាចកើតឡើង១០០ភាគរយនោះទេ។ មន្រ្តីក្នុងរដ្ឋាភិបាលម៉ាឡេស៊ី ជាច្រើន ធ្លាប់បាននិយាយថា គេចង់ឲ្យលោកមហាធៀរ នៅបន្តកាន់តំណែង នាយករដ្ឋមន្រ្តី ដឹកនាំប្រទេសយូរទៀត ព្រោះ លោកមហាធៀរ មានបទពិសោធន៍ និងចេះស្គាល់ ដោះស្រាយបញ្ហាដែលប្រទេសកំពុងប្រឈមបច្ចុប្បន្ននេះ។
ម្យ៉ាងទៀត បើសិនគេមើលទៅប្រវត្តិទាក់ទងរបស់អ្នកនយោបាយទាំងពីរ គឺលោកអាន់វ៉ា អ៊ីប្រាហ៊ីម និងលោកមហាធៀរ ធ្លាប់មានទំនាក់ទំនងល្អក់កករនឹងគ្នា នៅក្នុងអតីតកាល។ លោកអាន់វ៉ា អ៊ីប្រាហ៊ីម ធ្លាប់ជាសម្ព័ន្ធមិត្ត ជាឧបនាយករដ្ឋមន្រ្តីរបស់លោកមហាធៀរ នៅទសវត្សរ៍ ឆ្នាំ ១៩៩០។ ប៉ុន្តែ ក្រោយមក អ្នកទាំងពីរបានក្លាយជាសត្រូវនឹងគ្នា ព្រោះថា ក្នុងអាណត្តិដឹកនាំរបស់លោកមហាធៀរ លោកអ៊ីប្រាហ៊ីម ត្រូវលោកមហាធៀរ បណ្តេញចេញពីតំណែង និងបានធ្លាក់ខ្លួនជាប់ពន្ធនាគារ ដោយសារបទចោទប្រកាន់ រឿងពុករលួយ ហើយនិងការស្រឡាញ់មនុស្សភេទដូចគ្នា (នៅឆ្នាំ ១៩៩៨ និងឆ្នាំ ២០១៥)។ ឥលូវនេះ ដើម្បីផ្តួលគណបក្សកាន់អំណាច របស់អតីតនាយករដ្ឋមន្រ្តី រ៉ាហ្សាក់ លោកអ៊ីប្រាហ៊ីម និងលោកមហាធៀរ បានត្រលប់មកចាប់ដៃរួមគ្នា ក្នុងសម្ព័ន្ធបក្សប្រឆាំងរហូតដល់ឈ្នះឆ្នោត ដ៏ធំធេង កាលពីខែឧសភាមុន។ ដោយសារតែទំនាក់ទំនងម្តងល្អ ម្តងអាក្រក់នេះហើយ ដែលធ្វើឲ្យគេពិបាកនឹងស្មានថា តើលោកមហាធៀរ នឹងព្រមប្រគល់តំណែងនាយករដ្ឋមន្រ្តី ទៅឲ្យអ៊ីប្រាហ៊ីម តាមការសន្យាដែរឬទេ នៅពីរឆ្នាំខាងមុខនោះ។ លោកអ៊ីប្រាហ៊ីមវិញ និយាយថា លោកមិនសម្រុក ចង់ប្រញាប់ក្លាយជានាយករដ្ឋមន្រ្តីនោះទេ។ កិច្ចការចំបងដែលលោកធ្វើនៅសភា ម៉ាឡេស៊ី គឺ ជំរុញជាពិសេស ឲ្យមានកំណែទម្រង់ប្រព័ន្ធតុលាការ ដែលលោកធ្លាប់រងគ្រោះផ្ទាល់ និងកែទម្រង់ ស្ថាប័ន គ្រប់គ្រងហិរញ្ញវត្ថុជាតិ ដើម្បីជៀសវាងកុំឲ្យមានការកេងបន្លំលុយរដ្ឋ ដូចក្នុងសំណុំរឿងពុករលួយកន្លងមក។
សម្រាប់អ្នកវិភាគមួយចំនួន វិញ លោកអាន់វ៉ា អ៊ីប្រាហ៊ីមអាចនិយាយដូច្នេះ ប៉ុន្តែ ការពិត គឺលោកមិនចង់នៅធ្វើជាសមាជិកសភា យូរនោះទេ។ ដំណើរ ក្រឡាវិវឌ្ឍនយោបាយ ដ៏រហ័ស របស់លោក ជាភស្តុតាងស្រាប់។ លោកត្រូវបានព្រះមហាក្សត្រលើកលែងទោសភ្លាមៗ នៅក្រោយសម្ព័ន្ធបក្សប្រឆាំងរបស់លោកឈ្នះឆ្នោត។ បន្ទាប់មក ស្រាប់តែអ្នកតំណាងរាស្រ្តម្នាក់ចុះចេញពីតំណែង ដើម្បីឲ្យមានការបោះឆ្នោតសភា មុនអាណត្តិ និងដើម្បីឲ្យបើកផ្លូវឲ្យលោកអ៊ីប្រាហ៊ីមឈ្នះឆ្នោត ក្លាយជាសមាជិកសភាទៀតចំណែកភរិយារបស់លោកក៏ជាឧបនាយករដ្ឋមន្រ្តីទៀត។
លោកអ៊ីប្រាហ៊ីម អាយុ ៧១ឆ្នាំ បានសន្យាហើយថា លោកនឹងជំរុញឲ្យមានកំណែទម្រង់ ផ្នែកតុលាការ ហើយនិងសេរីភាពបញ្ចេញមតិ នៅម៉ាឡេស៊ី។ ទោះជាលោក និងលោកនាយករដ្ឋមន្រ្តីមហាធៀរ ធា្លប់ជាសត្រូវនឹងគ្នា ប៉ុន្តែ ស្ថានភាពបច្ចុប្បន្ន ជាពិសេស នៅពេលប្រទេសកំពុងកើតមានបញ្ហាសេដ្ឋកិច្ចយ៉ាងដូច្នេះ ដូចជារឿងកើនប្រាក់បំណុលជាតិ ហើយនិងប្រាក់ខែរបស់ប្រជាជននៅតែទាប លោកអ៊ីប្រាហ៊ីមនិយាយថា លោកមានទិសដៅដូចគ្នានឹងលោកមហាធៀរ។ អ្នកទាំងពីរមានគោលដៅតែមួយ គឺស្រោចស្រង់ប្រទេសពីវិបត្តិប្រាក់បំណុល និងលុបបំបាត់អំពើពុករលួយដែលកំពុងស៊ីរូងក្នុង និងបន្ទុចបង្អាក់មិនឲ្យម៉ាឡេស៊ី រីកចម្រើន សព្វថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ