អាមេរិកចោទកងទ័ពភូមាថា មានផែនការច្បាស់លាស់ក្នុងការធ្វើទុក្ខបុកម្នេញជនជាតិរ៉ូហ៊ីងយ៉ា
នៅក្នុងរបាយការណ៍ចេញផ្សាយនៅថ្ងៃចន្ទម្សិលមិញ ក្រសួងការបរទេសអាមេរិកបានវាយតម្លៃថា អំពើហិង្សា និងការធ្វើទុក្ខបុកម្នេញរបស់កងទ័ពភូមា ទៅលើជនជាតិរ៉ូហ៊ីងយ៉ានៅរដ្ឋរ៉ាឃីន ភាគខាងជើងភូមា ធ្វើឡើងដោយមានផែនការគ្រោងទុកជាមុន និងមានការសម្របសម្រួលគ្នា ដោយផ្ចិតផ្ចង់បំផុត។ ក្រុងវ៉ាស៊ីនតោនបានព្រមានរួចហើយថា ការសន្និដ្ឋានណាមួយ របស់ក្រសួងការបរទេសអាមេរិក នឹងអាចធ្វើឲ្យមានការដាក់ទណ្ឌកម្មសេដ្ឋកិច្ចពីអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
របាយការណ៍របស់ក្រសួងការបរទេសអាមេរិក ត្រូវបានចងក្រងឡើង ដោយពឹងផ្អែកលើសក្ខីកម្មរបស់ជនជាតិរ៉ូហ៊ីងយ៉ារាប់ពាន់នាក់ ដែលបានរត់ភៀសខ្លួនពីរដ្ឋរ៉ាឃីន ទៅរស់នៅក្នុងជំរំភៀសខ្លួនក្នុងទឹកដីបង់ក្លាដែស។ របាយការណ៍កម្រាស ២០ទំព័រ បានបង្ហាញថា អំពើហិង្សាដ៏ធ្ងន់ធ្ងរ ទៅលើជនជាតិរ៉ូហ៊ីងយ៉ា នៅរដ្ឋរ៉ាឃីន ត្រូវបានធ្វើឡើងក្នុងទ្រង់ទ្រាយធំ និងជាទូទៅ។ ទិសដៅគឺដើម្បី បំភិតបំភ័យ និងតាមប្រមាញ់ បណ្តេញប្រជាជនរ៉ូហ៊ីងយ៉ា។ តាមអ្នកសរសេររបាយការណ៍របស់ក្រសួងការបរទេសអាមេរិក ការអនុវត្ត ហើយនិងវិសាលភាពនៃប្រតិបត្តិការរបស់ក្រុមយោធាភូមា បានបង្ហាញដែរថា អំពើហិង្សា ហើយនិងការធ្វើទុក្ខបុកម្នេញទៅលើជនជាតិភាគតិចរ៉ូហ៊ីងយ៉ា ធ្វើឡើងដោយមានការរៀបចំផែនការទុកជាមុន និងយ៉ាងច្បាស់លាស់។
នៅក្នុងរបាយការណ៍ ជនជាតិរ៉ូហ៊ីងយ៉ា ដែលរួចរស់មានជីវិត ដែលគេបានជួបសម្ភាសន៍ បានលើកនិយាយពីការសម្លាប់ទារក កុមារតូចៗ ការប្រហារជីវិតដោយព្រៃផ្សៃ ការកប់សម្លាប់មនុស្សទាំងរស់ ហើយនិងការចាប់រំលោភផ្លូវភេទលើជនជាតិរ៉ូហ៊ីងយ៉ាជាទូទៅ មិនថា នៅកន្លែងសាធារណៈ។
នៅក្នុងរបាយការណ៍ ដែលចេញផ្សាយដោយស្ងាត់ នៅលើវិបសៃតិ៍របស់ក្រសួងការបរទេសអាមេរិក គេមិនបានប្រើពាក្យ ប្រល័យពូជសាសន៍ លើជនជាតិរ៉ូហ៊ីងយ៉ា ឬពាក្យឧក្រិដ្ឋកម្មប្រឆាំងមនុស្សជាតិនោះទេ។ សម្រាប់ក្រសួងការបរទេសអាមេរិក គោលដៅនៃ របាយការណ៍ មិនមែនដើម្បីកំណត់ថា ការធ្វើទុក្ខបុកម្នេញទៅលើជនជាតិភាគតិចរ៉ូហ៊ីងយ៉ា គឺជាអំពើប្រល័យពូជសាសន៍នោះទេ។ គោលដៅរបស់របាយការណ៍អាមេរិក គឺដើម្បីស្រង់បទល្មើសជាក់ស្តែងរបស់ឧក្រិដ្ឋជន ដែលត្រូវប្រឈមនឹងការជំនុំជម្រះនៅតុលាការ។ តាមអ្នកនិពន្ធរបាយការណ៍ គឺរដ្ឋមន្រ្តីក្រសួងការបរទេសអាមេរិក លោកMike Pompeo ដែលជាអ្នកសម្រេចថា តើគួរមានចំណាត់ការផ្លូវច្បាប់ នៅក្នុងសំណុំរឿងជនជាតិរ៉ូហ៊ីងយ៉ាដែរឬទេ។
របាយការណ៍របស់ក្រសួងការបទេសស្តីពីជនជាតិរ៉ូហ៊ីងយ៉ាត្រូវបានចេញផ្សាយ នៅមួយខែក្រោយរបាយការណ៍របស់អង្គការសហប្រជាជាតិ ដែលនៅក្នុងនោះ គេបានចោទប្រកាន់កងទ័ពភូមា ថាមានចេតនាប្រព្រឹត្តអំពើប្រល័យពូជសាសន៍ប្រឆាំងជនភាគតិចរ៉ូហ៊ីងយ៉ា។ អង្គការសហប្រជាជាតិបានទាមទារឲ្យមានការជំនុំជម្រះ មេទ័ព និងមេបញ្ជាការកងទ័ពភូមា៥រូប នៅតុលាការអន្តរជាតិ។ អាមេរិកវិញ រហូតមកដល់ពេលនេះ បានត្រឹមលើកឡើងពីការបោសសម្អាតជាតិពិន្ធុប៉ុណ្ណោះ ប៉ុន្តែ មិនបានប្រើពាក្យប្រល័យពូជសាសន៍នោះទេ។ នៅក្នុងសំណុំរឿងរ៉ូហ៊ីងយ៉ា រដ្ឋបាលអាមេរិកកំពុងពិចារណាថ្លឹងថ្លែងណាស់ ព្រោះថា ការប្រើពាក្យប្រល័យពូជសាសន៍ នឹងអាចធ្វើឲ្យអាមេរិកសម្រេចដាក់ទណ្ឌកម្មធ្ងន់ធ្ងរប្រឆាំងភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ