អាជ្ញាធរហុងកុងបិទគណបក្សមួយដែលមាននិន្នាការឯករាជ្យនិយម
អាជ្ញាធរហុងកុង ទើបនឹងសម្រេចបិទគណបក្សមួយ ឈ្មោះថា គណបក្សជាតិហុងកុង នៅថ្ងៃចន្ទម្សិលមិញ។ គណបក្សជាតិដែលធ្វើសកម្មភាពដើម្បីឯករាជ្យនៅក្នុងដែនដីហុងកុង -ហុងកុងដែលជាអតីតអាណានិគមរបស់អង់គ្លេស។ ការបិទគណបក្សជាតិនេះ ក៏ជាលើកទីមួយដែរ ចាប់តាំងពីហុងកុង បានក្លាយជាដែនដីរបស់ចិនវិញនៅក្នុងឆ្នាំ ១៩៩៧មក ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
គណបក្សជាតិហុងកុង (HKNP) ដែលមានសមាជិកសកម្មចំនួនតែជាង១០នាក់នោះ ជាគណបក្សដ៏តូចមួយ បើយោងទៅលើចំនួនសមាជិករបស់ខ្លួន ក៏ប៉ុន្តែ បក្សនេះ បានធ្វើអោយមតិមហាជន មានការចាប់អារម្មណ៍មិនតិចទេមកលើគណបក្សខ្លួន ជាអាទិ័នៅលើជំហរដាច់ខាតនៅក្នុងសុន្ទរកថារបស់គណបក្សនេះ។
កាលពីខែកក្កដាមុន ប៉ូលីសនៅហុងកុង បានទាមទារអោយបិទគណបក្សជាតិនេះ ដែលជាវិធានការលើកលើកដំបូងបង្អស់មួយដែរចាប់តាំងពីហុងកុង បានវិលត្រឡប់មកនៅក្រោមការគ្រប់គ្រងរបស់ចិនវិញនៅក្នុងឆ្នាំ ១៩៩៧។ ការទាមទាររបស់ប៉ូលីសហុងកុងក្នុងការបិទទ្វារគណបក្សជាតិហុងកុងនេះ បានជំរុញឲ្យមានការរិះគន់ទិតៀនយ៉ាងខ្លាំងក្លាពីសំណាក់អង្គការការពារសិទ្ធិមនុស្ស រួមទាំងក្រសួងការបរទេសរបស់ប្រទេសអង់គ្លេសផងដែរដែលបានទាមទារឲ្យមានការគោរពសិទ្ធិសេរីភាពនៅក្នុងការបញ្ចេញមតិនៅហុងកុង។
កាលពីថ្ងៃចន្ទម្សិលមិញ អាជ្ញាធរហុងកុង ក៏បានជូនដំណឹងដែរអំពីការយល់ព្រមរបស់ខ្លួន ចំពោះសេចក្តីស្នើរបស់ប៉ូលីសហុងកុងនៅក្នុងការបិទគណបក្សជាតិ ដោយយោងទៅលើច្បាប់មួយដែលអនុញ្ញាតដល់ការបិទបញ្ចប់សកម្មភាពរបស់សមាគមខ្លះៗ នៅហុងកុង ក្នុងហេតុផលដើម្បីការពារសន្តិសុខជាតិឬក៏សណ្តាប់ធ្នាប់សាធារណៈ។
លោក John Lee ដែលជារដ្ឋមន្ត្រីទទួលបន្ទុកផ្នែកសន្តិសុខនៅហុងកុង បានថ្លែងថា គណបក្សជាតិ មានគោលដៅដ៏ច្បាស់លាស់មួយ គឺចង់ធ្វើឲ្យហុងកុង ក្លាយទៅជាសាធារណៈរដ្ឋឯករាជ្យមួយ ដែលផ្ទុយនឹងរដ្ឋធម្មនុញ្ញរបស់ហុងកុង។
នៅក្នុងការបិទគណបក្សជាតិនៅហុងកុងនេះ អង្គការសិទ្ធមនុស្ស Human Rights Watch បានវិនិច្ឆ័យថា ជាវិធានការរបស់ទីក្រុងប៉េកាំងនិងរដ្ឋាភិបាលហុងកុងនៅក្នុងការបំបិទសិទ្ធិសេរីភាពរបស់ប្រជាជនហុងកុង ។ មិនតែប៉ុណ្ណោះ អង្គការ Human Rights Watch ថែមទាំង បានរិះគន់ផងដែរទៅលើរូបលោក John Lee រដ្ឋមន្ត្រីទទួលបន្ទុកផ្នែកសន្តិសុខនៅហុងកុង ថាការបិទទ្វារគណបក្សជាតិនៅហុងកុងនេះ គឺជាការពុំសមហេតុសមផលឡើយ ដោយហេតុថា គណបក្សមួយនេះ ពុំដែលបានបង្កនូវអំពើហិង្សាឬក៏បង្កជាគ្រោះថ្នាក់ណាមួយឡើយនៅក្នុងសង្គមហុងកុង រហូតមកទល់ពេលនេះ។ ចំពោះ Human Rights Watch ការបិទទ្វារគណបក្សជាតិនៅហុងកុងនេះ ក៏ អាចនឹងជំរុញឲ្យមានការហាមឃាត់គណបក្សនយោបាយនានាផ្សេងៗទៀតដែរនៅក្នុងទឹកដីហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ