ហុងកុងបើកស្ថានីយ៍ថ្មីភ្ជាប់ខ្សែរថភ្លើងទៅមកក្រុងប៉េកាំង
នៅថ្ងៃអាទិត្យទី ២៣កញ្ញានេះ ហុងកុងបានបើកស្ថានីយ៍អយស្ម័យយានថ្មី ឈ្មោះថា West Kowloon ។ ជាស្ថានីយ៍ដ៏ធំ ដែលមានកម្មវត្ថុបើកទូលាយចរន្តធ្វើដំណើរតាមផ្លូវដែក ឱ្យកាន់តែរលូន តភ្ជាប់កោះហុងកុង ជាអតីតដែនដីក្រោមអាណានិគមអង់គ្លេស ទៅរដ្ឋធានីប៉េកាំង តាមរយៈរថភ្លើងល្បឿនលឿនខ្សែថ្មី ក្នុងរយៈពេលតែ២ម៉ោង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
រថភ្លើងចេញពីក្រុងប៉េកាំងបានមកដល់ ! រថភ្លើងទីមួយក៏បានចាកចេញពីហុងកុងសំដៅចិនដីគោកដែរ នៅថ្ងៃអាទិត្យនេះពីស្ថានីយ៍ West Kowloon ដ៏ធំទូលាយ ដ៏មហាទំនើប ដែលមានសមត្ថភាពទទួលអ្នកដំណើរបានដល់២សែននាក់ក្នុងមួយថ្ងៃ។
ជាគម្រោងសាងសង់ដែលផ្តួចផ្តើមឡើងតាំងពីឆ្នាំ២០០៨ ដោយចំណាយថវិកាអស់ប្រមាណ៤ពាន់លានអឺរ៉ូ។ អ្នកដំណើរដំបូងៗបានសម្តែងការរីករាយ ចំពោះខ្សែរថភ្លើងថ្មី ដែលអនុញ្ញាតឱ្យពួកគេ ផ្លាស់ទីពីក្រុងដែនកោះ ទៅដែនដីគោកក្នុងរយៈពេលតែពីរម៉ោង ទល់នឹងបីកន្លះ បើប្រៀបទៅនឹងមធ្យោបាយចាស់។
ប៉ុន្តែគម្រោងនេះ មានភាពចម្រូងចម្រាសខ្លាំង នៅពេលចាប់ដំណើរការដោយការបញ្ឈរការិយាល័យត្រួតពិនិត្យពន្ធគយ និងព្រំដែន នៅប្រមាណពីរបីម៉ែត្រពីស្ថានីយ៍ ដែលបង្កបង្កើតឱ្យមានគំនិតគិតដល់ការវាតទីដី។ ពីព្រោះរដ្ឋាភិបាលហុងកុង សុខចិត្តចែករំលែកទីស្នាក់ការរបស់ខ្លួន កណ្តាលក្រុង ទៅឱ្យអាជ្ញាធរចិនគ្រប់គ្រងជាតំបន់ពិសេស ស្ថិតក្រោមអធិបតេយ្យភាពប៉េកាំង។ ភ្នាក់ងារសន្តិសុខចិន ត្រូវបានដាក់ពង្រាយនៅក្នុងតំបន់ពិសេសនៃស្ថានីយ៍។
សម្រាប់បក្សប្រឆាំងនិងអ្នកវិភាគ នេះជាចំណែកមួយនៃយុទ្ធសាស្ត្រនយោបាយដ៏ស្មុគស្មាញរបស់ចិន ដែលចង់ត្រួតត្រា និងកំរិតសេរីភាពហុងកុង តាមរយៈរដ្ឋាភិបាលហុងកុងដែលគាំទ្រប៉េកាំង ឬដោយផ្ទាល់តែម្តង។ តាំងពីឆ្នាំមុនមក គេចិនសម្រុកខ្លាំងគួរឱ្យព្រួយបារម្ភ ខ្លាចតែទម្រង់កិច្ចព្រមព្រៀងចិន-អង់គ្លេស “ប្រទេសមួយប្រព័ន្ធដឹកនាំពីរ” មិនអាចធន់បានយូរ។
ចេញផុតពីអាណានិគមអង់គ្លេសនៅឆ្នាំ១៩៩៧ ហុងកុងបានប្រគល់មកឱ្យចិន តែរក្សាប្រព័ន្ធដឹកនាំ និងច្បាប់ដាច់ដោយឡែក ខុសពីចិនដីគោក។ ប៉ុន្តែជាមួយនឹងការបង្កើតស្ថានីយ៍រថភ្លើងថ្មី អ្នកវិភាគយល់ថា ការសាកល្បងបិទខ្ទប់សេរីភាព អាចនឹងមានឥទ្ធិពលកាន់ច្បាស់ ជាពិសេសសេរីភាពនៃការបញ្ចេញមតិ ព្រោះដោយជាក់ស្តែង កាសែត និងសៀវភៅដែលដាក់លក់នៅក្នុងស្ថានីយ៍ មានកំរិតមិនដូចនៅកន្លែងនៃហុងកុងឡើយ។
បើតាមភ្នាក់ងារសារព័ត៌មានបារាំង ដែលមានវត្តមាននៅស្ថានីយ៍រថភ្លើងនាថ្ងៃអាទិត្យនេះ គេអាចប្រើប្រាស់ប្រព័ន្ធអ៊ីនធ័រនែត ប្រព័ន្ធសង្គមដែលហាមឃាត់នៅចិនបាន។ តើសេរីភាពនេះនឹងត្រូវបានរក្សាជានិរន្តរ៍ទៅឬយ៉ាងណា ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ