ឥណ្ឌូណេស៊ី ចាប់បើកយុទ្ធនាការឃោសនាបោះឆ្នោតប្រធានាធិបតី

យុទ្ធនាការឃោសនាបោះឆ្នោតប្រធានាធិបតីឥណ្ឌូណេស៊ី ត្រូវចាប់ផ្តើម ចាប់ពីថ្ងៃអាទិត្យទី ២៣កញ្ញាទៅ។ បេក្ខជនដែលចូលប្រកួតប្រជែងគ្នា នៅថ្ងៃទី ១៧ មេសា២០១៩ យកតំណែងជាប្រមុខដឹកនាំប្រទេសប្រជាធិបតេយ្យដ៏ធំលំដាប់ទីបីពិភពលោក គឺលោក Joko Widodo ប្រធានាធិបតីផុតអាណត្តិ និងលោក Prabowo Subianto អតីតឧត្តមសេនីយ៍សម័យស៊ូហាតូ។ យុទ្ធនាការឃោសនាបោះឆ្នោតឆ្នាំនេះ ប្រព្រឹត្តទៅក្នុងបរិបទដែលពលរដ្ឋកំពុងព្រួយបារម្ភយ៉ាងខ្លាំងអំពីបញ្ហាសុខភាពសេដ្ឋកិច្ចជាតិ។

ចុះផ្សាយនៅថ្ងៃ៖ 22/09/2018 - 16:11កែប្រែថ្ងៃទី៖ 23/09/2018 - 10:20

លោក Joko Widodo និងMa'ruf Amin (ខាងស្តាំ) ជជែកជាមួយគូប្រជែងលោក Prabowo Subianto និងលោក Sandiaga Uno ក្នុងពិធីប្រកាសបេក្ខភាពប្រធានាធិបតី © Reuters

ដោយ៖ អៀង សុខម៉ិញ

ផ្សាយពាណិជ្ជកម្ម

នៅថ្ងៃទី ១៧ មេសា ឥណ្ឌូណេស៊ីមានរៀបចំការបោះឆ្នោតជ្រើសរើសប្រធានាធិបតីថ្មីផង សភាជាតិផង និងសភាតំបន់ផង ដោយមានការចូលរួមពីសំណាក់ប្រជាពលរដ្ឋប្រមាណជាង ១៨៦លាននាក់។ យុទ្ធនាការឃោសនា ដែលចាប់ផ្តើម នៅថ្ងៃអាទិត្យនេះ ផ្តោតជាសំខាន់ទៅលើបញ្ហាសេដ្ឋកិច្ច វិសមភាពសង្គម អត្តសញ្ញាណជាតិ និងការស្ទុះឡើងនៃភាពមិនអនុគ្រោះគ្នា នៅក្នុងប្រទេសអ៊ីស្លាមដ៏ធំជាងគេបំផុតនៅលើពិភពលោកដែលមានប្រជាជនសរុបជាង២៦០លាននាក់។

បើការស្ទង់មតិ ប្រធានាធិបតីផុតអាណត្តិ នៅតែមានប្រជាប្រិយភាពខ្ពស់ រហូតមានរហ័សនាមថាលោក Jokowi នាំមុខខ្លាំង ជាមួយស្ទីលដឹកនាំស្និទ្ធនឹងប្រជាពលរដ្ឋ លើកស្ទួយហេដ្ឋារចនាសម្ព័ន្ធ ដោយមានពលរដ្ឋចង់បោះឆ្នោតឱ្យដល់ទៅ ៥២%ទល់នឹង៣០%សម្រាប់គូប្រជែង។ ប៉ុន្តែបេក្ខជនប្រធានាធិបតីផុតអាណត្តិរូបនេះ ត្រូវប្រឹងធ្វើយុទ្ធនាការជំនះឧបសគ្គថ្មីៗជាច្រើនដូចត្រូវប្រឈម ការបំប៉ោងបង្វិលមតិសាធារណៈតាមរយៈការផ្តល់ព័ត៌មានមិនពិត (Fake News) តាមប្រព័ន្ធសង្គម -ប្រឈមនឹងបញ្ហាសេដ្ឋកិច្ច ប្រាក់រូពីរូបិយបណ្ណជាតិធ្លាក់ខ្លាំងមិនធ្លាប់គិតចាប់តាំងពី២០ឆ្នាំមក ជាដើម។ល។

ជម្រើសយកលោក Ma’ruf Amin ប្រមុខសាសនាអ៊ីស្លាម ជាអ្នកអភិរក្សនិយមមកធ្វើជាអនុប្រធានាធិបតីសម្រាប់អាណត្តិថ្មី អាចជាយុទ្ធសាស្ត្រមួយរបស់លោកJoko Widodoសម្រាប់ទាក់ទាញម្ចាស់ឆ្នោតជាអ្នកអភិរក្សខ្លាំង តែអាចធ្វើឱ្យអ្នកជឿនលឿនកើតរោគសង្ស័យ។

បេក្ខជនទាំងពីរត្រូវប្រកួតប្រជែងនឹងលោក Prabowo Subianto ដែលបានជ្រើសរើសអតីតអភិបាលរងក្រុងហ្សាការតា លោកមហាសេដ្ឋី Sandiaga Uno ជាបេក្ខជនអនុប្រធានាធិបតី។ លោក Prabowo Subianto ធ្លាប់ចាញ់ឆ្នោតប្រធានាធិបតីកាលពីឆ្នាំ២០១៤ ទល់នឹងលោកវីដូដូនេះផ្ទាល់ និងធ្លាប់មានប្រវត្តិជាឧត្តមសេនីយ៍ក្នុងសម័យដឹកនាំរបស់លោកស៊ូហាតូ។ ក្រោយរបបផ្តាច់ការបានដួលរលំទៅ លោក Subianto បានទទួលស្គាល់ទំនួលខុសត្រូវក្នុងចាប់សកម្មជនប្រជាធិបតេយ្យ តែមិនត្រូវបានកាត់ទោសដោយតុលាការទេ។ ក៏ប៉ុន្តែគូប្រជែងនេះ អាចប្រើបញ្ហាសេដ្ឋកិច្ច វិបត្តិប្រាក់បំណុល និងការគ្រប់គ្រងធនធានធម្មជាតិមកឃោសនាវាយបកលើលោកJokowiបាន។

យុទ្ធនាការឃោសនានឹងប្រឈមគ្នាខ្លាំង ព្រោះការបន្លំព័ត៌មានស្ទុះកើនខ្លាំងតាំងពីមុនបើយុទ្ធនាការជាផ្លូវការ។ ការវាយប្រហារតាមប្រព័ន្ធសង្គម មានឥទ្ធិពលខ្លាំងជាងការបោះឆ្នោតមុខៗឆ្ងាយណាស់៕