អាកាសធាតុ៖ក្រុមប្រទេសកំពុងអភិវឌ្ឍន៍ចោទអាមេរិក និងសម្ព័ន្ធមិត្តអាមេរិកពីបទមិនគោរពពាក្យសន្យា
កិច្ចប្រជុំស្តីពីអាកាសធាតុរយៈពេល ១សប្តាហ៍ក្នុងទីក្រុងបាងកក ប្រទេសថៃរបស់ក្រុមអ្នកជំនាញមកពីគ្រប់ជ្រុងជ្រោយក្នុងលោកបានបិទបញ្ចប់នាថ្ងៃអាទិត្យ ទី៩ កញ្ញា។ គឺជាកិច្ចប្រជុំដើម្បីរៀបចំសន្និសីទអន្តរជាតិស្តីពីអាកាសធាតុ COP២៤ នាខែធ្នូខាងមុខនៅក្នុងប្រទេសប៉ូឡូញ។ នៅក្នុងពេលបិទកិច្ចប្រជុំ ក្រុមប្រទេសកំពុងអភិវឌ្ឍន៍ រួមជាមួយក្រុមប្រទេសក្រីក្រជាងគេក្នុងលោកបានចោទអាមេរិក និងក្រុមប្រទេសសម្ព័ន្ធមិត្តពីបទបំផ្លាញកិច្ចចរចារឿងអាកាសធាតុ និងមិនគោរពតាមការសន្យាដែលមានចែងនៅក្នុងកិច្ចព្រមព្រៀងក្រុងប៉ារីសស្តីពីអាកាសធាតុអនុម័តក្នុងឆ្នាំ ២០១៥។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ពេញមួយសប្តាហ៍ ក្រុមអ្នកជំនាញអាកាសធាតុមកពីគ្រប់ប្រទេសហត្ថលេខីលើកិច្ចព្រមព្រៀងក្រុងប៉ារីសស្តីពីអាកាសធាតុ COP២១ អនុម័តឆ្នាំ ២០១៥ បានជជែក និងពិភាក្សាគ្នាលើវិធានការជាក់ស្តែងមួយចំនួនដែលត្រូវអនុវត្តន៍។ គួររម្លឹកថា កិច្ចព្រមព្រៀងក្រុងប៉ារីសស្តីពីអាកាសធាតុឆ្នាំ ២០១៥ បានសម្រេចរក្សាសីតុណ្ហភាពក្នុងភពផែនដីនៅក្រោម ២អង្សារ ឬត្រឹម ១,៥អង្សារធៀបនឹងសម័យមុនឧស្សាហកម្ម។ ទន្ទឹមគ្នានេះ COP២១ ក៏បានតម្រូវឲ្យផ្តល់ជំនួយប្រចាំឆ្នាំចំនួន ១០០ ០០០លានដុល្លារពីពេលនេះដល់ឆ្នាំ ២០២០ ដល់ក្រុមប្រទេសក្រីក្រដើម្បីប្រយុទ្ធប្រឆាំងនឹងការឡើងកំដៅនៅក្នុងបរិយាកាស។
គឺរឿងលុយកាក់នេះឯងដែលបានក្លាយជាប្រធានបទតានតឹងខ្លាំងជាងគេនៅក្នុងកិច្ចប្រជុំក្នុងទីក្រុងបាងកកដែលបានបិទបញ្ចប់នាថ្ងៃអាទិត្យ ទី៩ កញ្ញា។ ក្រុមប្រតិភូតំណាងឲ្យក្រុមប្រទេសតូចតាច និងក្រុមប្រទេសក្រីក្រជាងគេក្នុងលោកបានដំឡើងសម្លេងចោទអាមេរិក និងសម្ព័ន្ធមិត្តអាមេរិកពីបទមិនគោរពពាក្យសន្យា និងជាអ្នកទទួលខុសត្រូវនៃវត្តមានឧស្ម័នពុលដ៏ច្រើនសម្បើមនៅក្នុងបរិយាកាសនាពេលកន្លងមក។ អ្វីដែលក្រុមប្រទេសកំពុងអភិវឌ្ឍន៍ត្រូវការនៅចំពោះមុខ គឺថវិកាដែលមានតម្លាភាព និងអាចព្យាករបាន។ ចំណែកក្រុមប្រទេសអាហ្វ្រិកបានថ្លែងថា ក្រុមប្រទេសអភិវឌ្ឍន៍មិនគោរពពាក្យសន្យារបស់ខ្លួន ព្រមទាំងបដិសេធមិននិយាយពីរឿងហិរញ្ញវត្ថុសម្រាប់ថ្ងៃខាងមុខ។
ជារួម ទោះបីជាមានភាពចម្រើនទៅមុខលើប្រធានរឿងមួយចំនួននាកិច្ចប្រជុំរយៈពេល ១សប្តាហ៍ក្នុងទីក្រុងបាងកកក៏ដោយ ក៏បញ្ហាហិរញ្ញវត្ថុនៅបន្តជាប្រធានបទចម្រូងចម្រាសដដែល។ អង្គការក្រៅរដ្ឋាភិបាលមួយឈ្មោះ ActionAid បានមើលឃើញថា កិច្ចព្រមព្រៀងក្រុងប៉ារីសស្តីពីអាកាសធាតុឆ្នាំ ២០១៥ កំពុងស្ថិតមាត់ជ្រោះ។ យ៉ាងណាក៏ដោយ ប្រទេសហត្ថលេខីទាំង ១៩០ប្រទេសមានពេលដល់ដំណាច់ឆ្នាំ ២០១៨ និងសន្និសីទអន្តរជាតិស្តីពីអាកាសធាតុលើកទី២៤ ក្នុងប្រទេសប៉ូឡូញនាពេលខាងមុខដើម្បីបញ្ចប់វិធានការជាក់ស្តែងដែលត្រូវដាក់ឲ្យអនុវត្តន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ