កាកបាទក្រហម និងអឌ្ឍចន្ទក្រហមទាញសញ្ញាអាសន្នពីវិបត្តិកង្វះស្បៀងអាហារនៅកូរ៉េខាងជើង
សីតុណ្ហភាពក្តៅហួតហែង និងភាពរាំងស្ងួតដែលបានគ្របដណ្តប់ទឹកដីកូរ៉េខាងជើងតាំងពី ១ខែកន្លះអាចបំផ្លាញការប្រមូលផលស្រូវ ពោត និងដំណាំផ្សេងៗមួយភាគធំ។ ព្រឹត្តិការណ៍មួយបានធ្វើឲ្យសហព័ន្ធអន្តរជាតិនៃកាកបាទក្រហម និងអឌ្ឍចន្ទក្រហមព្រួយបារម្ភជាពន់ពេក និងបានទាញសញ្ញាអាសន្នពីវិបត្តិកង្វះស្បៀងអាហារជាយថាហេតុដែលអាចបង្កឲ្យមានគ្រោះមហន្តរាយដល់ពលរដ្ឋកូរ៉េខាងជើងដែលកំពុងជួបការលំបាកស្រាប់។ លោក Joseph Muyambo ប្រធានកម្មវិធីសហព័ន្ធអន្តរជាតិនៃកាកបាទក្រហម និងអឌ្ឍចន្ទក្រហមប្រចាំកូរ៉េខាងជើងបានបញ្ជាក់ថា មានពលរដ្ឋជាច្រើនលាននាក់ពឹងផ្អែកទាំងស្រុងលើជំនួយស្បៀងអាហារ។
ចុះផ្សាយនៅថ្ងៃ៖
ស្តាប់ - ០១:៣៧
« ក្នុងចំណោមពលរដ្ឋកូរ៉េខាងជើងជាង ២៤លាននាក់ មាន ១០លាននាក់ត្រូវការជំនួយស្បៀងអាហារ ហើយមាន ៤០% ក្នុងចំនួនទាំង ១០លាននាក់កំពុងពឹងផ្អែកទាំងស្រុងលើជំនួយស្បៀងអាហារនេះ។ បើពួកគេមិនបានទទួលទេ នោះពួកគេនឹងទទួលផលវិបាកយ៉ាងធ្ងន់ធ្ងរ។
អ្នកដែលទទួលផលវិបាកខ្លាំងជាងគេនៅចំពោះមុខ គឺពលរដ្ឋរស់នៅតាមតំបន់ជនបទដែលបានពឹងផ្អែកទាំងស្រុងតែលើផលដំណាំរបស់ពួកគេ។ ខណៈនេះ រដ្ឋអំណាច និងអង្គការផ្សេងៗទៀតកំពុងធ្វើការវាយតម្លៃផលដំណាំដែលមានជាក់ស្តែង ពិសេសផលដំណាំដែលប្រើជាចំណីអាហារមូលដ្ឋានរបស់ពលរដ្ឋ។
ចំណែកសហព័ន្ធអន្តរជាតិនៃកាកបាទក្រហម និងអឌ្ឍចន្ទក្រហមបានរៀបចំដំឡើងម៉ាស៊ីនបូមទឹកដើម្បីបញ្ចូលទឹកទៅក្នុងដីស្រែ ចំការមួយភាគក្នុងចំនួនដីស្រែ ចំការដែលកំពុងស្ងួតហួតហែងចំនួន ៤០០ ០០០ហិចតា។ ប្រសិនបើគេពិនិត្យមើលស្ថានការណ៍ទូទៅនៅក្នុងប្រទេសនាពេលបច្ចុប្បន្ន គេមានក្តីបារម្ភខ្លាំងជាងគេចំពោះពលរដ្ឋដែលកំពុងរស់នៅតាមតំបន់ភ្នំ ព្រោះថា ពលរដ្ឋទាំងនោះគ្មានមធ្យោបាយនឹងបូមទឹកដាក់បញ្ចូលក្នុងដីស្រែ ចំការរបស់ពួកគេ ឬមួយក៏ពួកគេគ្មានអាងស្តុកទឹកនៅក្បែរនោះទេ។
គេអាចចោទជាសំណួរថា តើពលរដ្ឋទាំងអស់នោះនឹងក្លាយទៅជាយ៉ាងណា?។ ពួកគេអាចនឹងជួបហានិភ័យស្លាប់ដោយគ្មានអាហារបរិភោគ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ