ចិនចង់ធ្វើសមយុទ្ធជាមួយអាស៊ាន ដោយគ្មានប្រទេសទីបី ចូលពាក់ព័ន្ធ
ទីក្រុងប៉េកាំងចង់ធ្វើសមយុទ្ធរួមគ្នាជាមួយប្រទេសសមាជិកអាស៊ាន ប៉ុន្តែ ដោយគ្មានការចលរួមពីប្រទេសដែលមិនពាក់ព័ន្ធ។ នេះជាសំណើរបស់ភាគីចិន ដែលមាននៅក្នុងសេចក្តីព្រាងក្រមប្រតិបត្តិ ដែលចិនកំពុងចរចាជាមួយប្រទេសសមាជិកអាស៊ាន នៅកិច្ចប្រជុំថ្នាក់រដ្ឋមន្រ្តីការបរទេស នៅទីក្រុងសិង្ហបុរី កាលពីថ្ងៃព្រហស្បតិ៍ម្សិលមិញ។ ប្រទេសដែលមិនពាក់ព័ន្ធ ដែលចិនចង់សំដៅ គឺសហរដ្ឋអាមេរិកដែលចេញមុខគាំទ្រប្រទេសសមាជិកអាស៊ាន ដូចជាវៀតណាម ឬហ្វីលីពីន ដែលកំពុងជាប់ឈ្លោះជាមួយចិន នៅសមុទ្រចិនខាងត្បូង។
ចុះផ្សាយនៅថ្ងៃ៖
ស្តាប់ - ០២:៣៧
“យើងជឿថា ដោយគ្មានការរំខានពីប្រទេសខាងក្រៅ ការពិគ្រោះ ពិភាក្សា លើក្រមប្រតិបត្តិចិន និងអាស៊ាននឹងបោះជំហានលឿនទៅមុខ” នេះជាប្រសាសន៍របស់លោករដ្ឋមន្រ្តី ការបរទេសចិន វ៉ាង យី ទៅកាន់អ្នកកាសែត នៅក្រោយកិច្ចប្រជុំអាស៊ាន នៅថ្ងៃម្សិលមិញ នៅប្រទេសសិង្ហបុរី។
ទៅតាមខ្លឹមសារនៃសេចក្តីព្រាង ក្រមប្រតិបត្តិ ដែលដកស្រង់ដោយទីភ្នាក់ងារព័ត៌មានបារាំង AFP ប្រទេសចិនបានស្នើឲ្យមានសមយុទ្ធយោធា រួមគ្នាជាមួយអាស៊ាន ដែលបើតាមលោកវ៉ាង យី គឺអាចរៀបចំធ្វើឡើង នៅខែតុលាខាងមុខ។ នៅក្នុងសេចក្តីព្រាង ក្រមប្រតិបត្តិ ទីក្រុងប៉េកាំងបានស្នើផងដែរ ឲ្យប្រទេសសមាជិកអាស៊ានចូលរួមគ្នាជាមួយចិន ដើម្បីរុករក ប្រេង និងឧស្ម័ន នៅក្រោមសមុទ្រ ប៉ុន្តែ ចិនមិនបានបញ្ជាក់ថា សមុទ្រនោះ ជាសមុទ្រចិនខាងត្បូងនោះទេ។ តាមការចង់បានរបស់ចិន ទាំងសមយុទ្ធ ហើយនិងការរុករកប្រេង ឧស្ម័ននៅក្រោមសមុទ្រ រួមគ្នា (ចិន និងអាស៊ាន) ធ្វើឡើងដោយគ្មានចូលរួមពីប្រទេសខាងក្រៅ ឬបើមានត្រូវសុំការអនុញ្ញាត ភ្លើងខៀវពីប្រទេសដែលពាក់ព័ន្ធ។
សូមអាន៖ លោកស៊ីជីនពីងបំពេញទស្សនកិច្ច ដ៏ភ្ញាក់ផ្អើល នៅសមុទ្ទចិនខាងត្បូង
ដោយស្នើឲ្យមានសមយុទ្ធ និងរុករកអណ្តូងប្រេងរួមគ្នាជាមួយ អាស៊ាន ចិនចង់ផ្ញើសារ ទៅ ពិភពលោក និងជាពិសេសអាមេរិក ថា ចិន និងអាស៊ានអាចធ្វើការដោះស្រាយបញ្ហាខ្វែងគំនិតគ្នា នៅក្នុងសមុទ្រចិនខាងត្បូង ដោយមិនចាំបាច់ មានការលូកដៃ ពីអ្នកខាងក្រៅ។
ភាពតានតឹងនៅសមុទ្រចិនខាងត្បូងបានផ្ទុះឡើង នៅឆ្នាំ ២០១៤ នៅពេលចិនបានសាងសង់ ស្ថានីយ៍បូមប្រេង នៅក្នុងតំបន់ទឹក ដែលវៀតណាម ទាមទារជាម្ចាស់កម្មសិទ្ធិ។ ព្រុយណេ ម៉ាឡេស៊ី ហ្វីលីពីន តៃវ៉ាន់ និងវៀតណាម បានចេញមុខ តវ៉ា នៅពេលប្រទេសចិនប្រកាសធ្វើជាម្ចាស់ផ្តាច់មុខនៅសមុទ្រចិនខាងត្បូង។ ប៉ុន្តែ ដោយសារតែខ្លាចបាត់ជំនួយ និងទុនវិនិយោគរបស់ចិន បូកផ្សំនិងជំហរស្ទាក់ស្ទើររបស់រដ្ឋបាលលោកដូណាល់ ត្រាំ នៅអាស៊ី សមាជិកអាស៊ានមួយចំនួន លែងសូវហ៊ានចេញមុខប្រឈមតទល់ជាមួយទីក្រុងប៉េកាំង តួយ៉ាងដូចជាហ្វីលីពីន របស់ប្រធានាធិបតីបច្ចុប្បន្ន គឺលោកឌុយទែរតេ ដែលបានបត់ជំហរនយោបាយផ្ទុយស្រឡះ លែង រិះគន់ចោទវត្តមានចិន ដូចប្រធានាធិបតីមុន។
វៀតណាម ជាប្រទេសអាស៊ានតែមួយ ដែលនៅបន្តរិះគន់ និងតវ៉ាយុទ្ធសាស្រ្តពង្រីកវត្តមានរបស់យោធាចិន នៅក្នុងតំបន់ជម្លោះ នៅសមុទ្រចិនខាងត្បូង។ នៅក្នុងសេចក្តីព្រាងក្រមប្រតិបត្តិ វៀតណាមនៅបានបង្ហាញជំហរប្រឆាំងដាច់ខាតរាល់សកម្មភាពនានារបស់ចិន។ ដោយមិននិយាយចំៗតែប្រទេសចិន វៀតណាមបានអំពាវនាវឲ្យប្រទេសនានា ឈប់សាងសង់កោះសិប្បនិម្មិត និងបោះទីតាំងមូលដ្ឋានទ័ព នៅក្នុងសមុទ្រចិនខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ