ជំនួបរុស្ស៊ី-ជប៉ុនតាមរូបមន្ត ២+២ បានប្រព្រឹត្តទៅ នៅម៉ូស្គូ
ថ្ងៃ ៣១ កក្កដា នៅក្រុងម៉ូស្គូ មានប្រព្រឹត្តទៅ ជំនួបរុស្ស៊ី-ជប៉ុន តាមរូបមន្ត ២+២ ដោយមុន ដំបូង លោករដ្ឋមន្ត្រីការបរទេសរុស្ស៊ី Serguei Lavrov បានទទួលជួប សមភាគីជប៉ុន លោក Taro Kono បន្ទាប់មក ក៏មានការភ្ជាប់ខ្លួនចូលរួមដែរ នៃ រដ្ឋមន្ត្រីការពារជាតិរុស្ស៊ី និង រដ្ឋមន្ត្រីការពារជាតិជប៉ុន ក្រោយ ពីគេ បានជួបគ្នាដាច់ដោយឡែកទៅហើយ។ ។ កិច្ចចរចាក្នុងរូបភាព ២+២ បែបនេះ ចាត់ចែងឡើង ទៅ តាមការព្រមព្រៀងគ្នា រវាង លោកប្រធានាធិបតីរុស្ស៊ី វ៉្លាឌីមៀរ ពូទីន និង លោកនាយករដ្ឋមន្ត្រីជប៉ុន ស៊ីនហ្សូ អាបេ កាលពីខែឧសភា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៥
ទន្ទឹមនឹងបញ្ហាធ្វើសេដ្ឋកិច្ចរួមគ្នាលើប្រជុំកោះគួរីល កោះដែលភាគីជប៉ុន តែងទាមទារចង់បានពី រុស្ស៊ីវិញ គូភាគីក៏បានពិភាក្សាលើបញ្ហាពិភពលោកនិងបញ្ហាតំបន់ណា ដែលប្រកបដោយបច្ចុប្បន្នភាព។
ថ្លែងក្នុងសន្និសីទសារពត៏មាន បូកសរុបតុល្យាការជំនួបនោះ លោក រដ្ឋមន្ត្រីការបរទេសរុស្ស៊ី ស៊ែរហ្គៃ ឡាវ៉្រូវ កត់សម្គាល់ថាជំនួប បានប្រព្រឹត្តទៅ ក្នុងស្មារតីស្ថាបនាជាវិជ្ជមាន។ លទ្ធផលមួយ ដែលគាត់បានបង្ហើប ឲ្យដឹង គឺថា គូភាគី ឯកភាពគ្នា បើកធ្វើនៅលើកោះគួរីលតែម្តង ពីថ្ងៃ ១៦ ដល់ ២០ សីហាខាងមុខ ជា វេទិកា Business រុស្ស៊ី-ជប៉ុន ដើម្បីបន្ទាប់មក រាយការណ៍ជូនមេដឹកនាំប្រទេសទាំងពីរគឺលោកប្រមុខរដ្ឋរុស្ស៊ី វ៉្លាឌីមៀរ ពូទីន និង លោក នាយករដ្ឋមន្ត្រីជប៉ុន ស៊ីនហ្សូ អាបេ ដែលនឹងវត្តមានក្នុងវេទិកាសេដ្ឋកិច្ចបូព៏ា នៅ ក្រុងរុស្ស៊ី Vladivostok ពីថ្ងៃ ១១ ដល់ ១៣ កញ្ញា ។
រុស្ស៊ី និង ជប៉ុន ក៏បានព្រមព្រៀងគ្នា ទៅទល់ដំណាច់ ឆ្នាំនេះ បើកធ្វើកិច្ចពិគ្រោះនៃពួកអ្នកជំនាញប្រទេសទាំងពីរ ជុំវិញបញ្ហាសន្តិសុខ ដោយអំពាវនាវ ឲ្យគ្រប់តែ ភាគីពាក់ព័ន្ធ ចេះទប់ចិត្ត ដើម្បីកុំបណ្តោយឲ្យដាច់ដោចទៅ ដំណើររៀបរយ ស្ថានការណ៍នៅឧបទ្វីបកូរ៉េ ដែលនៅផុយស្រួយនៅឡើយ។
លោករដ្ឋមន្ត្រីការបរទេសជប៉ុន Taro Kono ដែលថ្លែងបន្ទាប់មក បានលើកឡើងពីចំហៀងមនុស្សធម៌ ដោយភាគិរុស្ស៊ី សម្រួលដល់ការធ្វើដំណើររបស់អ្នកស្រុកជប៉ុន ទៅថែទាំផ្នូរទាំងឡាយនៃសពសាច់ញាតិគេ ដែលកប់នៅលើកោះគួរីល។ គាត់ថា នេះជាភាគមួយ នៃផ្លូវឆ្ពោះទៅចុះ សន្ធិសញ្ញាសន្តិភាព ជាមួយ រុស្ស៊ី ។ គួរនិយាយថា ទូរទស្សន៍រុស្ស៊ី ដោយផ្សាយអំពីកិច្ចចរចាតាមរូបមន្ត ២+២ នេះ ចាប់អារម្មណ៍ថា រដ្ឋសភា ជប៉ុន បានអនុម័តទៅហើយ ច្បាប់ដែលចែងថា អំបូរកោះគួរីលខាងត្បូង ត្រូវក្រុងតូក្យ៉ូ ប្រកាសជាផ្លូវការ ថា ជាដែនដីខាងជើង របស់ជប៉ុន ដូចក្នុងសម័យមុនជប៉ុនចាញ់សង្គ្រាមលោកលើកទី២ ឆ្នាំ ១៩៤៥ អញ្ចឹង។
លោកប្រមុខការទូតជប៉ុន បានអះអាងមក ភាគីរុស្ស៊ីថា ប្រព័ន្ធខែលមីស៊ីលប្រឆាំងមីស៊ីល ដែល សរអា ដំឡើង នៅលើដែនដីជប៉ុន ឥតគម្រាមជាគ្រោះថ្នាក់អ្វីណាដល់ រុស្ស៊ីឡើយ ដ្បិតវា ទុកសម្រាប់តែ ការពារប្រទេស ជប៉ុន ប៉ុណ្ណោះ។
ចំណែកលោករដ្ឋមន្ត្រីការពារជាតិជប៉ុន Itsunori Onodera ថ្លែងថា ៖ ការរំសាយអាវុធនុយក្លេអ៊ែរ នៅ ឧបទ្វីបកូរ៉េ គឺពាំនាំជាផលប្រយោជន៍រួម សម្រាប់ម៉ូស្គូ និង ក្រុង តូក្យ៉ូ ដោយភាគីទាំងពីរ នឹងសហការគ្នា យ៉ាងជិតស្និទ្ធ ដើម្បីឲ្យមានការបំពេញឥតខ្ចោះ តាមសេចក្តីសម្រេចទាំងអម្បាលម៉ាន របស់ក្រុមប្រឹក្សា សន្តិសុខ អសប ស្តីអំពីការរឹតបន្តឹងទណ្ឌកម្មប្រឆាំងកូរ៉េខាងជើង។
លោករដ្ឋមន្ត្រីការពារជាតិរុស្ស៊ី Serguei Shoigu កត់សម្គាល់ថា កិច្ចសន្ទនា រវាងម៉ូស្គូ និង ក្រុង តូក្យ៉ូ គឺ ដើរតួសំខាន់ ក្នុងបុព្វហេតុធានាសន្តិសុខ និង ស្ថិរភាព នៅតំបន់អាស៊ី-ប៉ាស៊ីហ្វិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ