ចិននិងអង់គ្លេសគ្រោងនឹងបើកកិច្ចចរចានៅលើកិច្ចព្រមព្រៀងពាណិជ្ជកម្មសេរីទ្វេភាគី
ប្រទេសចិននិងអង់គ្លេស គ្រោងនឹងបើកកិច្ចចរចាគ្នាដើម្បីរកកិច្ចព្រមព្រៀងប្តោះប្តូរពាណិជ្ជកម្មដោយសេរី រវាងប្រទេសទាំង២ បន្ទាប់ពីទីក្រុងឡុងដ្រ៏ ផ្តាច់ខ្លួនចេញពីសហភាពអឺរ៉ុប។ នេះជាសេចក្តីថ្លែង របស់ប្រមុខការទូតថ្មីរបស់ប្រទេសអង់គ្លេសលោក Jeremy Hunt នៅទីក្រុងប៉េកាំងក្នុងថ្ងៃចន្ទនេះ។
ចុះផ្សាយនៅថ្ងៃ៖
ស្តាប់ - ០២:៤៤
លោក Jeremy Hunt ប្រមុខការទូតថ្មីរបស់ប្រទេសអង់គ្លេស បានឡើងកាន់មុខតំណែងនៅដើមខែកក្កដា ឆ្នាំ២០១៨នេះ ដើម្បីជំនួសលោក Boris Johnson អតីតរដ្ឋមន្ត្រីការបរទេសអង់គ្លេសដែលបានសុំលាលែងចេញពីមុខតំណែង ដោយហេតុផល ខ្វែងគំនិតគ្នា ជាមួយនឹងនាយករដ្ឋមន្ត្រីអង់គ្លេសលោកស្រី Theresa May នៅលើយុទ្ធសាស្រ្តរបស់គាត់ ពាក់ព័ន្ធ ពីការផ្តាច់ខ្លួន របស់អង់គ្លេសចេញពីសហភាពអឺរ៉ុប។
ក្នុងដំណើរទស្សនកិច្ចនៅក្រៅតំបន់អឺរ៉ុប ប្រមុខការទូតថ្មីរបស់អង់គ្លេស បានកក់ទុកមុនគេដំណើរទស្សនកិច្ចរបស់លោកនៅក្នុងប្រទេសចិន។ នៅឱកាសសន្និសីទសារព័ត៌មានមួយនៅទៅក្រុងប៉េកាំង ជាមួយលោក Wang yi ក្នុងថ្ងៃចន្ទនេះ ប្រមុខការទូតចិន លោក Hunt បានថ្លែងថា “ប៉េកាំង បានស្នើ សុំរកកិច្ចព្រមព្រៀងមួយ នៅលើប្តោះប្តូរពាណិជ្ចកម្មដោយសេរី រវាង អង់គ្លេស និងចិន នៅខណៈពេល ដែល អង់គ្លេស ត្រូវដកខ្លួនចេញពី រង្វង់សហភាពអឺរ៉ុបនៅចុងខែមីនាឆ្នាំ២០១៩។ ប្រមុខការទូតអង់គ្លេស បានគូសបញ្ជាក់ទៀតថា “អង់គ្លេស ក៏បានពិភាក្សាគ្នារូចរាល់ហើយដែរ នៅលើសំណើរបស់ប្រមុខការទូតចិន ដើម្បី រក កិច្ចព្រមព្រៀងពាណិជ្ចកម្មដោយសេរីមួយរវាងប្រទេសអង់គ្លេសនិងចិន ក្រោយ ពីអង់គ្លេសផ្តាច់ខ្លួនចេញពីសហភាពអឺរ៉ុប -នេះជាការថ្លែងបន្ថែមរបស់ប្រមុខការទូតអង់គ្លេស។
គួររំលឹកថា នាដើមឆ្នាំ ២០១៨ នេះ នៅក្នុងដំណើរទស្សនកិច្ចមួយនៅប៉េកាំង នាយករដ្ឋមន្ត្រីអង់គ្លេស លោកស្រី Theresa May បានរំលឹក អំពីការពន្លឿនលើកិច្ចពិភាក្សានានាដើម្បីលើករបាំងពាណិជ្ជកម្មវាងអង់គ្លេសនិងចិន។ ចិននិងអង់គ្លេស ដែលធ្លាប់បានប្រកាសថា “នារយៈពេលប៉ុន្មានឆ្នាំចុងក្រោយនេះ គឺជារយៈពេលដ៏សែនមនោរម្យនៅលើទំនាក់ទំនងរវាងប្រទេសចិននិងអង់គ្លេសឆ្លុះបញ្ជាំងតាមរយៈ ដំណើរទស្សកិច្ចផ្លូវរដ្ឋមួយរបស់ប្រធានាធិបតីចិនលោក Xi Jinping នៅប្រទេស អង់គ្លេសនាឆ្នាំ ២០១៥។ នៅក្នុងឱកាសនោះ ប្រមុខរដ្ឋចិន ត្រូវបានព្រះមហាក្សត្រិយានីអង់គ្លេស Elizabeth ទី ២ទទួលជួបប្រាស្រ័យយ៉ាងឱឡារឹក។
សូមបញ្ជាក់ថា ចាប់តាំងពីប្រជាជនអង់គ្លេសបោះប្រជាមតិនាខែមិថុនាឆ្នាំ២០១៦ សម្រេចចិត្តដកខ្លួនចេញពីសហភាពអឺរ៉ុប ទីក្រុងឡុងដ្រ៏ ក៏បានខិតខំបង្កើនទំនាក់ទំនងការទូតជាមួយទីក្រុងប៉េកាំងយ៉ាងមមាញឹកដើម្បីរៀបចំកិច្ចព្រមព្រៀងពាណិជ្ជកម្មមួយចំនួនដែលនឺងត្រូវដាក់ជំនួសលើកិច្ចព្រមព្រៀងពាណិជ្ជកម្មជាមួយទីក្រុង Bruxelles ។ ទន្ទឹមនេះ នៅប៉េកាំង លោក Hunt ក៏បានលើកពិភាក្សាគ្នាផងដែរ ពីបញ្ហាប្រទេសកូរ៉េខាងជើងនិងការប្រែប្រួលអាកាសធាតុ -នេះបើយោងតាមក្រសួងការបរទេសអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ