ប៉ូលីស៖ បុរសជនជាតិចិនម្នាក់ដាក់គ្រាប់បំផ្ទុះ នៅខាងក្រៅស្ថានទូតអាមេរិក
បុរសចិនវ័យ ២៦ ឆ្នាំម្នាក់ បានបំផ្ទុះគ្រឿងផ្លុះ នៅខាងក្រៅស្ថានទូតអាមេរិក ក្នុងទីក្រុងប៉េកាំង នាថ្ងៃព្រហស្បតិ៍នេះ។ ប៉ូលិសចិនបានឲ្យដឹងភ្លាមៗថា មិនមាននរណាម្នាក់រងគ្រោះដោយសារការបំផ្ទុះនេះទេ ហើយបុរសចិនដែលជាអ្នកបង្កហេតុ ត្រូវបានមន្ត្រីសន្តិសុខចិនចាប់ខ្លួនភ្លាមៗផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
បុរសចិនដែលដាក់គ្រាប់បំផ្ទុះ នៅខាងក្រៅស្ថានទូតអាមេរិក នាទីក្រុងប៉េកាំង នៅថ្ងៃព្រហស្បតិ៍នេះ មានឈ្មោះហៅក្រៅថា “ជាំង” និងមានប្រភពមកពីតំបន់ស្វ័យយ័តមានទីតាំងក្បែរប្រទេសម៉ុងហ្គូលី។ រហូតមកដល់ពេលនេះ ប៉ូលីសចិនមិនទាន់បានបញ្ជាក់ប្រាប់ពីមូលហេតុនៅពីក្រោយការបំផ្ទុះនេះទេ។ មន្ត្រីប៉ូលីសចិនគ្រាន់តែបង្ហើបប្រាប់ថា ការបំផ្ទុះធ្វើឡើងនៅក្បែរទីតាំង ដែលអ្នកដាក់ពាក្យសុំទិដ្ឋាការ ឈរតម្រង់ជួរចូលទៅស្ថានទូតអាមេរិក ដើម្បីធ្វើកិច្ចសម្ភាសន៍។
សូមជ្រាបថា ស្ថានទូតអាមេរិក មានទីតាំងនៅជាយក្រុងប៉េកាំង ហើយក៏ស្ថិតនៅក្បែរ ស្ថានទូតជាច្រើនដែលរួមមានទាំងស្ថានទូតឥណ្ឌានិងអ៊ីស្រាអែលផងដែរ។ បន្ទាប់ពីការផ្ទុះមិនយូរប៉ុន្មាន គេឃើញមានវីដេអូឃ្លីបជាច្រើនបង្ហាញពីផ្សែងនៅខាងក្រៅបរិវេណស្ថានទូតនៅលើបណ្តាញសង្គម។
សាក្សីម្នាក់ ដែលបដិសេធមិនបញ្ចេញអត្តសញ្ញាណ បានប្រាប់ថា យើងបានឮការផ្ទុះយ៉ាងខ្លាំងនៅប្រហែលម៉ោង ១ រសៀល (ម៉ោងនៅក្នុងប្រទេសចិន) ដូច្នេះយើងក៏បានចេញទៅមើលនៅតាមផ្លូវ ហើយភ្លាមៗនោះប៉ូលីសជាច្រើនបានហ៊ុំព័ទ្ធកន្លែងកើតហេតុនោះ។
ជុំវិញរឿងនេះដែរ សាក្សីម្នាក់ទៀតបានឲ្យដឹងថា នៅកន្លែងកើតហេតុ មានវត្តមានកងកម្លាំងសន្តិសុខចិនយ៉ាងច្រើន ធ្វើអន្តរាគមន៍យ៉ាងលឿន ប្រៀបដូចជាពួកគេបានដឹងពីហេតុការណ៍នេះមុនអីចឹង។
បន្ទាប់ពីហេតុការណ៍បំផ្ទុះ ប៉ូលិសចិនបានបិទកន្លែងកើតហេតុ។ ដោយឡែក រដ្ឋបាលចិនក៏រាំងខ្ទប់យ៉ាងឆាប់រហ័ស ដើម្បីរារាំងការស្វែងរកព័ត៌មានទាក់ទងនឹង "ស្ថានទូតអាមេរិក" លើបណ្តាញសង្គម Weibo ព្រមទាំងTwitter។
ជាទូទៅគេមើលឃើញថា នៅក្នុងសង្គមចិន មានបុគ្គលមួយចំនួនធំ ដែលមិនសប្បាយចិត្ត ចំពោះអំពើពុករលួយ ឬភាពអយុត្តិធម៌ជាច្រើន ដែលកំពុងមាននៅក្នុងប្រទេស ហើយពួកគេជាញឹកញយតែងតែបង្កជាហានិភ័យផ្សេងៗនៅក្នុងប្រទេស។
គួរកត់សម្គាល់ថា កាលពីខែមិថុនាឆ្នាំមុន មានឧបទ្ទវហេតុផ្ទុះគ្រាប់បែកដ៏អាក្រក់បំផុតមួយ បានសម្លាប់មនុស្ស ៨ នាក់ និងរងរបួសរាប់សិបនាក់ផ្សេងទៀត នៅខាងក្រៅសាលាមត្តេយ្យមួយនៅភាគខាងកើតប្រទេសចិន។ ហើយដែលកាលណោះ មន្ត្រីប៉ូលីសបានដាក់កំហុសទៅលើបុរសអាយុ ២២ ឆ្នាំម្នាក់ ដែលជាបុគ្គលមានបញ្ហាសុខភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ