ចិន៖លោកស៊ី ជីនពីងផ្តើមទស្សនកិច្ចមួយជុំតំបន់មជ្ឈិមបូព៌ា និងទ្វីបអាហ្រ្វិក
នៅថ្ងៃព្រហស្បតិ៍ ទី១៩ កក្កដា លោកប្រធានាធិបតីចិនស៊ី ជីនពីងផ្តើមទស្សនកិច្ចមួយជុំតំបន់មជ្ឈិមបូព៌ា និងទ្វីបអាហ្រ្វិក។ ទស្សនកិច្ចលោកស៊ី ជីនពីងនឹងត្រូវបញ្ចប់ជាមួយនឹងការចូលរួមនៅក្នុងជំនួបកំពូលនៃក្រុមប្រទេស Brics នាថ្ងៃទី២៥ និងទី២៦ កក្កដាខាងមុខក្នុងប្រទេសអាហ្រ្វិកខាងត្បូង។ អេមីរ៉ាតអារ៉ាប់រួមដែលជាដៃគូពាណិជជ្ជកម្មទី១ របស់ចិនជាប្រទេសអារ៉ាប់ដែលលោកប្រមុខរដ្ឋចិនបានទៅទស្សនកិច្ចមុនគេ។
ចុះផ្សាយនៅថ្ងៃ៖
ស្តាប់ - ០២:១៣
កម្មវត្ថុរបស់លោកស៊ី ជីនពីងក្នុងទឹកដីអេមីរ៉ាអារ៉ាប់រួម គឺការពង្រឹងកិច្ចសហប្រតិបត្តិការក្នុងវិស័យសេដ្ឋកិច្ចជាមួយប្រទេសអារ៉ាប់មួយនេះ។ ចំណែកភាគីអេមីរ៉ាអារ៉ាប់រួមក៏ចង់បានដូចគ្នានេះដែរ និងថែមទាំងបានសម្តែងក្តីសប្បាយរីករាយនៅមុនពិធីចុះហត្ថលេខាលើកិច្ចព្រមព្រៀងសំខាន់ៗជាច្រើនទៅទៀត។ លោកអាលី អូបៃ អាល់ ដាហ៊ីរី ឯកអគ្គរាជទូតអេមីរ៉ាអារ៉ាប់រួមប្រចាំប្រទេសចិនបានបញ្ជាក់ដោយសុទិដ្ឋិនិយមថា ការដោះដូរពាណិជ្ជកម្មរវាងទីក្រុងប៉េកាំង និងទីក្រុងអាប៊ូដាប៊ីដែលកំពុងមានទំហំទឹកប្រាក់ដល់ទៅ ៥០ ០០០លានដុល្លារនាពេលបច្ចុប្បន្ន នឹងកើនឡើងទ្វេដងនៅ ១០ឆ្នាំខាងមុខ។
ការហ៊ានអះអាងយ៉ាងដូចនេះរបស់លោកអាល់ ដាហ៊ីរីក៏ដោយសារតែលោកសំអាងលើការស្រេកឃ្លានខ្លាំងរបស់ចិនចំពោះប្រេងកាតអេមីរ៉ាអារ៉ាប់រួម។ សូមជម្រាបជូនថា ចិនត្រូវការថាមពលដើម្បីយកទៅចិញ្ចឹមបំប៉នកំណើនសេដ្ឋកិច្ចរបស់ខ្លួន។ នៅក្នុងប្រទេសអេមីរ៉ាអារ៉ាប់រួម មហាក្រុមហ៊ុនថាមពលចិនឈ្មោះ China National Petroleum ទើបទទួលបានការចូលរួមភាគហ៊ុនចំនួន ១០% ជាមួយក្រុមហ៊ុនបូមប្រេងអេមីរ៉ាអារ៉ាប់រួមចំនួន ២ សម្រាប់រយៈពេល ៤០ឆ្នាំ និងក្នុងតម្លៃជាង ១ ០០០លានដុល្លារ។ ក្រៅពីថាមពលបានមកពីប្រេងឆៅធម្មជាតិក្នុងដី ចិនក៏កំពុងសម្លឹងឃើញថាមពលបៃតងដែរ។
ជាក់ស្តែង ចិនកំពុងកសាងមជ្ឈមណ្ឌលស្រូបយកកំដៅព្រះអាទិត្យមួយក្នុងទីក្រុងឌូបៃដែលនឹងអាចផ្តល់ថាមពលអគ្គិសនីក្នុងបរិមាណ ៧០០មេហ្កាវ៉ាត់។ មជ្ឈមណ្ឌលមួយនេះត្រូវបានលោកស៊ី ជីនពីងចាត់ទុកជាមជ្ឈមណ្ឌលដ៏ធំជាងគេ និងទំនើបជាងគេក្នុងលោក។ សូមជម្រាបជូនថា ដើម្បីពង្រឹង និងពង្រីកឥទ្ធិពលរបស់ខ្លួននៅតំបន់មជ្ឈិមបូព៌ា ចិនបានប្រើគ្រប់មធ្យោបាយទាំងអស់ ពិសេសក្រដាសដុល្លារដោយសន្យាផ្តល់ប្រាក់កម្ចីចំនួន ២០ ០០០លានដុល្លារ។ មួយភាគធំនៃប្រាក់កម្ចីនេះនឹងត្រូវប្រើប្រាស់ដើម្បីស្តារឡើងវិញនូវអតីតផ្លូវមួយ ខ្សែក្រវ៉ាត់មួយ។ គឺជាគម្រោងដ៏សំខាន់របស់លោកស៊ី ជីនពីង និងដែលកំពុងទាក់ទាញប្រទេសអារ៉ាប់ជាច្រើន រួមទាំងប្រទេសផ្សេងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ