អាជ្ញាធរថៃ៖ ក្មេង១២នាក់ និងគ្រូបង្វឹកបាល់ ត្រូវបានរំដោះយកចេញអស់ពីក្នុងរូងភ្នំ
ក្មេងថៃ ៤នាក់ ហើយនិងគ្រូបង្វឹកបាល់ទាត់ថៃ ដែលស្ថិតនៅក្នុងក្រុមចុងក្រោយ ត្រូវរំដោះចេញពីក្នុងរូងភ្នំ ដោយសុវត្ថិភាព នៅថ្ងៃអង្គារ នេះ។ ដំណឹងនេះត្រូវបានប្រកាស នៅក្នុងទំព័រហ្វេសប៊ុករបស់កងកុម្មង់ដូរជើងទឹកថៃ នៅយប់ថ្ងៃអង្គារនេះ។ ជាសរុប មនុស្សទាំង១៣នាក់ ដែលក្នុងនោះ មានក្មេង១២នាក់ ហើយនិងគ្រូបង្វឹកបាល់ទាត់របស់ពួកគេ ដែលជាប់ក្នុងល្អាង ភ្នំតាំងពីថ្ងៃទី ២៣មិថុនា ត្រូវបានជម្លៀសយកចេញ ដោយសុវត្ថិភាព ពីក្នុងល្អាង នៅក្នុងប្រតិបត្តិការរំដោះយកក្មេង ដែលចាប់ផ្តើមតាំងពីថ្ងៃអាទិត្យរហូតដល់ថ្ងៃអង្គារនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
នៅថ្ងៃទី៣ នៃប្រតិបត្តិការជួយសង្រ្គោះក្មេងក្នុងរូងភ្នំ នៅថ្ងៃនេះ ក្រុមជួយសង្រ្គោះ បានចូលទៅជម្លៀសយកមនុស្ស៥នាក់ ចុងក្រោយ ពីក្នុងរូងភ្នំ ដែលនៅក្នុងនោះ មានក្មេង៤នាក់ និងម្នាក់ជាគ្រូបង្វឹកបាល់ទាត់។
ខុសពីថ្ងៃចន្ទ និងថ្ងៃអង្គារ ដែលអាជ្ញាធរចូលទៅរំដោះយកក្មេង៤នាក់ ក្នុងមួយថ្ងៃ នៅព្រឹកថ្ងៃអង្គារនេះ លោក ណារ៉ុងសាក់ អូសុទ្ធតាណាកន ប្រធានអង្គភាពសង្រ្គោះបន្ទាន់បាននិយាយប្រាប់អ្នកកាសែតថា មនុស្សទាំងអស់នឹងត្រូវរំដោះ យកចេញពីក្នុងរូងភ្នំនៅថ្ងៃនេះ។ ក្រៅតែពីក្មេង៤នាក់ ហើយនិងគ្រូបង្វឹកដែលត្រូវគេជម្លៀសចេញពីក្នុងរូងភ្នំ នៅថ្ងៃនេះ មានផងដែរ គ្រូពេទ្យ ម្នាក់ ហើយនិងកងកុម្មង់ដូរជើងទឹកថៃ ៣នាក់ ផ្សេងទៀត ដែលបានទៅប្រចាំការ នៅជាមួយ ក្មេងៗ ក្នុងល្អាងភ្នំចាប់តាំងពីថ្ងៃដែលអ្នកមុជទឹកអង់គ្លេស បានរកឃើញពួកគេ កាលពីដើមសប្តាហ៍មុន។
ក្មេងទាំង៨នាក់ ដែលគេបានរំដោះ ចេញពីក្នុងរូងភ្នំ កាលពីថ្ងៃចន្ទ និងថ្ងៃអង្គារត្រូវបានគេដឹកបញ្ជូន ទៅមន្ទីរពេទ្យឈៀងរ៉ៃ ដើម្បីទទួលការពិនិត្យ តាមដានសុខភាព។ លេខាអិចិន្ត្រៃយ៍របស់ក្រសួងសុខាភិបាលថៃ បាននិយាយប្រាប់អ្នកកាសែត នៅថ្ងៃ នេះ ក្មេងទាំង៨នាក់ មានសុខភាពល្អ គ្មានគ្រុនក្តៅ អ្វីទេ។ គ្រប់គ្នាមានសុខភាពផ្លូវចិត្តនឹងនរ។ ក្មេងខ្លះបានទាមទាររកនំប៉័ង ឬស្កសូកូឡា ឬសាច់ជ្រូក។ ប៉ុន្តែ គ្រូពេទ្យបានផ្តល់ឲ្យពួកគេតែ ទឹកបបរ ដោយសារមើលទៅលើប្រព័ន្ធរំលាយអាហារ របស់ក្មេង ដែលនៅជាប់គាំង គ្មានអាហារ អស់ជាច្រើនថ្ងៃ ក្នុងរូងភ្នំ។
យ៉ាងណាក៏ដោយ ក្មេងៗ ដែលមានអាយុ ពី ១១ ដល់១៦ឆ្នាំ ដែលបានរស់នៅជាង ២សប្តាហ៍ ក្នុងរូងភ្នំ ត្រូវបានគេយកទៅដាក់នៅបន្ទប់ ដាច់ឆ្ងាយ ពីគេឯង នៅមន្ទីរពេទ្យ រហូតដល់គ្រូពេទ្យច្បាស់ក្នុងចិត្តថា ពួកគេ គ្មានកើតជម្ងឺឆ្លង នៅពេលរស់នៅក្នុងរូងភ្នំនោះទេ។ អ្នកជំនាញព្រមានថា ក្មេងៗដែលអាចផឹកទឹក កខ្វក់ក្នុងល្អាង អាចប្រឈមនឹងជម្ងឺឆ្លងរាតត្បាត។ ប៉ុន្តែ ការថត Xray និងតេស្តឈាមបង្ហាញថា ក្មេងទាំងអស់មានសុខភាពល្អធម្មតា លើកលែងតែក្មេង២នាក់ ប៉ុណ្ណោះដែលមានជម្ងឺរលាកទងសួត។ ពួកគេទាំងពីរនាក់មានសុខភាពល្អប្រសើរវិញហើយបន្ទាប់ពីបានលេបថ្នាំ Antibiotics។ នេះបើតាមលេខាអចិន្ត្រៃយ៍របស់ក្រសួងសុខាភិបាលថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ