យុទ្ធនាការសង្គ្រោះក្មេងៗ១២នាក់ជាប់ក្នុងរូងភ្នំនៅថៃបន្តធ្វើ ក្តីសង្ឃឹមមានតិចតួច
គេនៅមិនទាន់មានដំណឹងអ្វីពីក្មេងៗ១២នាក់ និងគ្រូបង្វឹកបាល់ទាត់របស់ពួកគេ ដែលជាប់ក្នុងរូងភ្នំ លិចទឹកនៅភាគខាងជើងប្រទេសថៃនៅឡើយ។ ថ្ងៃអង្គារនេះ យុទ្ធនាការសង្គ្រោះបន្តធ្វើតាំងពីព្រឹកព្រលឹម ដោយមានមនុស្សចូលរួមរាប់រយនាក់។ ឪពុកម្តាយក្មេងៗបានរៀបចំបន់ស្រន់នៅកន្លែងកើតហេតុ។
ចុះផ្សាយនៅថ្ងៃ៖
ស្តាប់ - ០១:៣០
ហេតុការណ៍ក្មេងៗ១២នាក់ ដែលកំពុងជាប់ក្នុងរូងភ្នំ គឺកើតឡើងនៅរូង Tham Luang ក្នុងឧទ្យានដ៏ធំមួយ ស្ថិតនៅភាគខាងជើងប្រទេសថៃ ជាប់ព្រំដែនជាមួយប្រទេសភូមា។ ពួកគេជាប់ខ្លួន នៅក្នុងរូងភ្នំ៣ថ្ងៃមកហើយ គឺតាំងពីថ្ងៃសៅរ៍មក។ ក្មេងៗទាំង១២នាក់ មានអាយុពី១១ឆ្នាំ ទៅ១៦ឆ្នាំ ជាសមាជិកក្រុមបាល់ទាត់មួយក្រុម។ ពួកគេប្រហែលជាបានចូលទៅរូងភ្នំមួយនោះ ជាមួយគ្រូបង្វឹកបាល់ទាត់របស់ពួកគេ។ បញ្ហាគឺថា ពួកគេជាប់ក្រោមដី ក្នុងរូងភ្នំ ហើយដោយសារតែភ្លៀងធ្លាក់ខ្លាំង រូបភ្នំនោះបានលិចទឹក។
យុទ្ធនាការសង្គ្រោះថ្ងៃអង្គារនេះ បានចាប់ផ្តើមតាំងពីម៉ោង៨ព្រឹកក្នុងស្រុក ដោយមានការចូលរួមរបស់មនុស្សរាប់រយនាក់ មានទាំងកងមុជទឹកថៃផងដែរ ព្រោះដោយសារមានការជន់លិចទឹកនេះឯង។ អាជ្ញាធរគិតថា ពួកគេប្រហែលជាចូលទៅជ្រៅរាប់គីឡូម៉ែត្រក្នុងរូងភ្នំ ដើម្បីចៀសពីទឹកលិចនេះ ពោលគឺទឹកដែលកំពុងឡើងកម្ពស់ ដោយសារទឹកភ្លៀង។
ឪពុកម្តាយក្មេងៗព្រួយបារម្ភខ្លាំងណាស់ ដោយមិនទទួលបានតំរុយអ្វីសោះពីពួកគេ ក្រៅតែពីឃើញសម្ភារៈ ដូចជាកង់ រឺស្បែកជើងពួកគេ នៅមាត់រូងភ្នំនោះ។ ថ្ងៃអង្គារនេះ ឪពុកម្តាយក្មេងៗទាំងនេះបានរៀបចំពិធីបន់ស្រន់ នៅកន្លែងកើតហេតុ សុំអោយពួកគេបានសេចក្តីសុខ។ សូមបញ្ជាក់ថា ដោយសារតែមិនឃើញកូនប្រុសខ្លួនត្រលប់មកផ្ទះវិញ បន្ទាប់ពីហាត់ទាត់បាល់រួច កាលពីល្ងាចថ្ងៃសៅរ៍កន្លងទៅនោះ ទើបស្ត្រីជាម្តាយម្នាក់បានផ្តល់ដំណឹងទៅប៉ូលិស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ