ប្រធានាធិបតីកូរ៉េខាងត្បូងបំពេញទស្សនកិច្ចថ្នាក់រដ្ឋនៅរុស្ស៊ី
ប្រធានាធិបតីកូរ៉េខាងត្បូង លោក មូន ចៃ-អ៊ីន ថ្ងៃព្រហស្បត៏ ២១ មិថុនា បានអញ្ជើញមកដល់ប្រទេសរុស្ស៊ីជាទីដែលគាត់ត្រូវជួបចរចាជាមួយសមភាគីរុស្ស៊ី លោក វ៉្លាឌីមៀរ ពូទីន ក្នុងផ្ទៃនៃសកម្មភាពការទូតពុះខ្ជោលជុំវិញស្ថានការណ៍នៅឧបទ្វីបកូរ៉េ - សកម្មភាពការទូតនេះ មានលក្ខណៈកាន់តែមមាញឹកទៅទៀត ក្រោយពីជំនួបកំពូលសរអា-កូរ៉េខាងជើងនៅក្រុងសិង្ហបុរី ១០ថ្ងៃមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ជំនួប រវាងលោកមូន ចៃ-អ៊ីន និងបុរសខ្លាំងប្រទេសរុស្ស៊ី គ្រោងប្រព្រឹត្តទៅថ្ងៃសុក្រនេះ ហើយត្រូវចប់ទៅដោយការចុះហត្ថលេខាលើឯកសារទ្វេភាគីជាច្រើនច្បាប់- នេះបើតាមវិមានក្រេមឡាំង។
ក្នុងរបៀបវារៈ នៃការពិភាក្សារវាងមេដឹកនាំទាំងពីរ មានជាអាទ៏គឺ កិច្ចចរចាជាយថាហេតុត្រីភាគី រុស្ស៊ី-កូរ៉េ ខាងត្បូង ជាមួយកូរ៉េខាងជើងព្រមទាំងការរឹតចំណងសេដ្ឋកិច្ចម៉ូស្គូ-សេអ៊ូល - ដំណឹងនេះបង្ហើបឲ្យដឹងដោយអនុរដ្ឋមន្ត្រីការបរទេសរុស្ស៊ី ទទួលបន្ទុកមុខព្រួញអាស៊ី លោក Igor Morgoulov ដែលប្រសាសន៍គាត់លើកទៅផ្សព្វផ្សាយដោយទីភ្នាក់ងារពត៏មានរុស្ស៊ីនានា។
ថ្ងៃ ២១ មិថុនា ក្រោយពីអញ្ជើញមកដល់ មេដឹកនាំកូរ៉េខាងត្បូង ត្រូវបានទទួលជួបដោយប្រមុខរដ្ឋាភិបាល រុស្ស៊ី លោក ឌ្មីទ្រី មេដវេដេវ ។ សាច់រឿងនៃការពិភាក្សាគឺ អំពីវិនិយោគនិងសមិទ្ធិកម្មគម្រោងធំៗ រួមគ្នា របស់ប្រទេសទាំងពីរ។ គូភាគី ក៏មិនបានរំលងឡើយ អំពី ស្ថានការណ៍នៅឧបទ្វីបកូរ៉េ។
ប្រាកដណាស់ ដែលគូភាគីបាននិយាយប៉ះលើ World Cup-2018 ។ លោកនាយករដ្ឋមន្ត្រីរុស្ស៊ី បានជូនពរ ឲ្យក្រុមជម្រើសបាល់ទាត់កូរ៉េខាងត្បូង ទទួលបានជ័យជំនះ។ ថ្ងៃសៅរ ២៣ មិថុនា លោក មូន ចៃ-អ៊ីន នឹងវត្តមាននៅកីឡាដ្ឋាន ក្រុងរុស្ស៊ី Rostov មាត់ទន្លេ Don ជាទីដែលនឹងប្រព្រឹត្តទៅ ការប្រកួត រវាងក្រុមជម្រើស កូរ៉េខាងត្បូង និង Mexique ។
ប្រមុខការទូតរុស្ស៊ី លោក ស៊ែរហ្គៃ ឡាវ្រ៉ូវ ក្រោយពីទទួលជួបម្សិលមិញនៅម៉ូស្គូ ជាមួយលោក អគ្គលេខាធិការ អសប Antonio Guterres បានថ្លែងថា ក្នុងជំនួបនេះ គូភាគីបាននិយាយ អំពី “ ចំណុច ទាំងឡាយដែលនាំឲ្យមានសុទិដ្ឋិនិយមជាក់លាក់ ទាក់ទងនឹងស្ថានការណ៍នៅឧបទ្វីបកូរ៉េ។
លោកប្រធានាធិបតី វ៉្លាឌីមៀរ ពូទីន ក្នុងសប្តាហ៏មុន បានបញ្ជក់ម្តងទៀត ពី សេចក្តីអញ្ជើញ អគ្គមគ្គុទេសក៏ កូរ៉េខាងជើង លោក គិម ជុង អ៊ុន មកបំពេញទស្សនកិច្ចនៅរុស្ស៊ី ទាំងលំអិតថា ទស្សនកិច្ចនេះ អាចប្រព្រឹត្ត ទៅ ក្នុងក្របខ័ណ្ឌនៃ វេទិកាសេដ្ឋកិច្ចបូព៏ា ដែលនឹងធ្វើពីថ្ងៃ ១១ ដល់ ១៣ កញ្ញា នៅក្រុង Vladivostok ចុងបូព៏ារុស្ស៊ី ។
ប្រធានាធិបតីអាមេរិកាំង លោក ដូណាល់ ត្រាំ និង លោក គិម ជុង អ៊ុន បានជួបគ្នាដោយតតួតែពីរនាក់ ជាជំនួបប្រវត្តិសាស្ត្រ កាលពីថ្ងៃ ១២ មិថុនា នៅក្រុង សិង្ហបុរី ដែលបានចប់ទៅ ដោយការចុះហត្ថលេខា លើ់សេចក្តីថ្លែងការណ៍រួម ទាំងមិនផ្តោតណាស់ណាទេ ទៅលើ បញ្ហាគន្លឹះនៃ សក្តានុពលអាវុធនុយក្លេអ៊ែរ របស់ កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ