ប្រធានាធិបតីចិន ថ្លែងធានាការគាំទ្ររបស់ខ្លួនចំពោះ"កិច្ចព្រមព្រៀងនុយក្លេអ៊ែរអ៊ីរ៉ង់”
ប្រធានាធិបតីចិនលោកស៊ី ជីនពីង (XI Jinping) បានថ្លែងធានាដល់ប្រធានាធិបតីអ៊ីរ៉ង់លោក Hassan Rohani ការគាំទ្ររបស់ប្រទេសចិន នៅលើកិច្ចព្រមព្រៀងនុយក្លេអ៊ែរអ៊ឺរ៉ង់ឆ្នាំ ២០១៥ កិច្ចព្រមព្រៀងដែលអាមេរិកបានដកខ្លួនចេញកាលពីខែឧសភាមុន នេះបើយោងតាមទីភ្នាក់ងារព័ត៌មានចិនថ្មីនៅថ្ងៃចន្ទនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
ប្រធានាធិបតីទាំងពីររូបរបស់ប្រទេសចិននិងអ៊ីរ៉ង់ បានជួបសន្ទនាជាមួយគ្នាកាលពីថ្ងៃអាទិត្យម្សិលមិញនៅក្រៅក្របខណ្ឌនៃជំនួបកំពូលរបស់អង្គការសហប្រតិបត្តិការក្រុងសៀងហៃ (OCS) ដែលរួមប្រជុំដោយបណ្តាប្រទេសអាស៊ីជាច្រើន រួមទាំងប្រទេសរុស្ស៊ីផងនៅក្នុងទីក្រុងដ៏ធំមួយរបស់ប្រទេសចិន នៅ Qingdao ក្នុងភាគខាងកើត។
បើយោងតាមការគូសបញ្ជាក់របស់លោក ស៊ី ជីនពីង ដែលដកស្រង់ដោយទីភ្នាក់ងារព័ត៌មានផ្លូវការណ៍ចិន“កិច្ចព្រមព្រៀងនុយក្លេអ៊ែរអ៊ីរ៉ង់ដែលតម្រូវអោយ អ៊ីរ៉ង់ ធ្វើការកម្រិតសកម្មភាពនុយក្លេអ៊ែររបស់ខ្លួន ដើម្បីប្តូរនឹងការលើកទណ្ឌកម្មពីសហគមន៍អន្តរជាតិនោះ គឺជាសម្មិទ្ធិកម្មមួយដ៏សំខាន់ខ្លាំងណាស់ នៅលើពិភពលោក”។
ចំពោះប្រធានាធិបតីចិន “កិច្ចព្រមព្រៀងនុយក្លេអ៊ែរអ៊ីរ៉ង់ ដែល គាំទ្រ ចំពោះ ការរក្សាសន្តិភាពនិងស្ថិរភាពនៅតំបន់ដើមបូព៌ា និង មិនសាយភាយអាវុធនុយក្លេអ៊ែរ ត្រូវតែបន្តអនុវត្ត ឲ្យបានជាក់ស្តែងតទៅមុខទៀត” ។
រីឯប្រធានាធិបតីអ៊ីរ៉ង់ លោក Rohani វិញ បានអំពាវនាវ ដល់សហគមន៍អន្តរជាតិ រួមទាំងប្រទេសចិនផងដែរ សូមអោយ ដើរតួនាទី ជាវិជ្ជមានមួយ នៅក្នុងសំណុំរឿងនុយក្លេអ៊ែរអ៊ីរ៉ង់-នេះបើយោងតាមទីភា្នក់ងារព័ត៌មានផ្លូវការចិនដដែល។
គួររំលឹកថា ជាមួយ អាល្លឺម៉ង់ អាមេរិក បារាំង អង់គ្លេស និង រុស្ស៊ី ប្រទេសចិន ក៏ជាប្រទេសហត្ថលេខីមួយដែរនៃកិច្ចព្រមព្រៀងនុយក្លេអ៊ែរ ឆ្នាំ ២០១៥ ជាមួយ អ៊ីរ៉ង់។ ហើយការដែលលោកប្រធានាធិបតីអាមេរិក ដូណាល់ត្រំ បានដកខ្លួនចេញពីកិច្ចព្រមព្រៀងនេះ អ៊ឺរ៉ង់ ក៏ដូចជាសហគ្រាសបរទេសនៅក្នុងប្រទេសអ៊ីរ៉ង់ដែរនោះ កំពុងតែប្រឈមមុខនឹងទណ្ឌកម្មសេដ្ឋកិច្ច សារជាថ្មីពីសំណាក់រដ្ឋបាលអាមេរិក។
នៅក្នុងន័យនេះហើយ បានជា លោកប្រធានាធិបតីរុស្ស៊ី Poutine នៅថ្ងៃសៅរ៍មុន នៅក្នុងទីក្រុង Qingdao បានធ្វើការព្រមានដល់អាមេរិកថា “សេចក្តីសម្រេចចិត្តរបស់អាមេរិកបែបនេះ អាចនឹងជំរុញអោយស្ថានភាព រឹតតែ ពុំ ឋិតឋេរ ថែមទៀត"។
សូមបញ្ជាក់ថា នៅក្នុងកិច្ចសន្ទានា ទ្វេភាគី ជាមួយប្រធានាធិបតីរុស្ស៊ី ប្រធានាធិបតីអ៊ីរ៉ង់លោក Hassan Rohani បាន វាយតម្លៃបន្ថែមទៀត ថា “ កិច្ចពិភាក្សានានានឹងត្រូវតែបន្តធ្វើទៅមុខទៀតរវាងប្រទេសរុស្ស៊ីនិងអ៊ីរ៉ង់ បន្ទាប់ពីអាមេរិក បានដកខ្លួនចេញស្រេចតែអំពើចិត្តរបស់ខ្លួន ពីកិច្ចព្រមព្រៀង នុយក្លេអ៊ែអ៊ីរង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ