តើអ្វីខ្លះជាប្រធានបទនៃជំនួបរវាងលោកដូណាល់ ត្រាំ និងលោក គីម ជុងអ៊ុន ?
ចុះផ្សាយនៅថ្ងៃ៖
ស្តាប់ - ០៨:០៤
មួយថ្ងៃមុនបើកជំនួបកំពូលជាប្រវត្តិសាស្ត្រជាមួយលោកគីម ជុងអ៊ុន លោកដូណាល់ត្រាំបង្ហាញនូវសុទិដ្ឋិនិយមខ្លាំង។ កំពុងស្ថិតនៅក្នុងប្រទេសសិង្ហបុរី ប្រមុខដឹកនាំ ទាំងពីរ បានបញ្ជាក់អំពីមហិច្ឆតាចង់ត្រួសត្រាយផ្លូវនាំសន្តិភាពឱ្យឧបទ្វីបកូរ៉េ ដែលបើតាមភាសាបច្ចេកទេសនៅមានសង្គ្រាមនៅឡើយ។ សម្រាប់លោកដូណាល់ត្រាំ ជួបនិយាយមួយទល់នឹងមួយជាមួយលោក គីម ជុងអ៊ុន ជាឱកាសតែមួយគត់ នៃបុព្វហេតុសន្តិភាព ក៏ប៉ុន្តែ មានបញ្ហាដ៏សែនចម្រូងចម្រាសជាច្រើន នៅចំពោះមុខ ដែលភាគីទាំងពីរត្រូវរកដំណោះស្រាយ ដូចជាអំពីសំណុំរឿងលុបបំបាត់នុយក្លេអ៊ែរ សន្ធិសញ្ញាសន្តិភាព ទណ្ឌកម្ម សិទ្ធិមនុស្ស និងសន្តិសុខ។
រំសាយអាវុធនុយក្លេអ៊ែរ
ការលុបបាត់កម្មវិធីអាវុធនុយក្លេអ៊ែរកូរ៉េខាងជើង ជាបញ្ហាស្នូល។ ទាំងពីរភាគីសុទ្ធតែបង្ហាញឆន្ទៈរកសន្តិភាពឱ្យឧបទ្វីបកូរ៉េគ្មានអាវុធនុយក្លេអ៊ែរ ប៉ុន្តែនិយមន័យរបស់តួអង្គនយោបាយពីរនេះហាក់មិនដូចគ្នាទេ។
វ៉ាស៊ីនតោន ទាមទារឱ្យកូរ៉េខាងជើង រំសាយកម្មវិធីនុយក្លេអ៊ែរ ទាំងស្រុង និងដោយមិនអាចបកក្រោយវិញកើត ហើយអាចផ្ទៀងផ្ទាត់បាន។ ឯកូរ៉េខាងជើងច្រានចោលគំនិតរំសាយអាវុធនុយក្លេអ៊ែរជាឯកតោភាគី និងរំលឹកជំហរចាស់ថាអាមេរិកត្រូវដកទ័ពនិងខែលនុយក្លេអ៊ែរចេញទឹកដីកូរ៉េខាងត្បូងជាថ្នូរ។ តែអាមេរិកថា រឿងដកទ័ពគ្មានក្នុងរបៀបវារៈនេះការចរចានេះទេ។
ថ្វីបើព្យុងយ៉ាងខ្លួនឯងផ្ទាល់ក៏បានធ្វើការប្តេជ្ញាចិត្តឥតឈប់ ចង់សម្រេចតាមកម្មវត្ថុធ្វើឱ្យឧបទ្វីបកូរ៉េជាតំបន់គ្មានអាវុធនុយក្លេអ៊ែរ។ ប៉ុន្តែការប្តេជ្ញា ជាពាក្យ ដែលងាយនឹងធ្វើការបកស្រាយណាស់ ! ហើយរហូតមកទល់នឹងពេលនេះ គេនៅតែមិនដឹងសោះឡើយថាតើអ្វីជាសម្បទានរបស់កូរ៉េខាងជើងដែលត្រៀមយកបញ្ហារំសាយអាវុធនុយក្លេអ៊ែរមកចរចានោះ។
បើតាមការប៉ាន់ស្មានរបស់សេអ៊ូល កូរ៉េខាងជើង មានសារធាតុភ្លុយតូនីញ៉ូមដល់ទៅ៥០គីឡូក្រាម ល្មមគ្រាន់នឹងអាចផលិតគ្រាប់បែកបរមាណូបានជាង១០ និងមានសមត្ថភាពគួរឱ្យកត់សម្គាល់ខ្លាំង ខាងផលិតអាវុធប្រើធាតុអ៊ុយរ៉ាញ៉ូម។ កិច្ចព្រមព្រៀងមុនៗ សុទ្ធតែរលាយរលត់ទៅវិញទាំងអស់ ហើយគ្មានអ្នកជំនាញណាម្នាក់ហ៊ានភ្នាល់ថាមេដឹកនាំកូរ៉េខាងជើងមានឆន្ទៈផ្តាច់ខ្លួនចេញព្រមបោះបង់ទ្រព្យសំណព្វអាវុធប្រល័យលោកដ៏សក្តិសិទ្ធរបស់គេឡើយ។
ម្យ៉ាងវិញទៀត ដើម្បីរំសាយអាវុធនុយក្លេអ៊ែរ ដែលគេលួចអភិវឌ្ឍន៍យ៉ាងសម្ងាត់ តាំងពីជាច្រើនទសវត្សរ៍មកនោះ គេត្រូវការពេលវេលាយូរ និងពិបាកធ្វើការត្រួតពិនិត្យខ្លាំងណាស់។ អ្នកឯកទេសអាមេរិកដ៏ល្បីល្បាញម្នាក់ បានប្រកាសថា ការលុបបំបាត់អាវុធនុយក្លេអ៊ែរកូរ៉េខាងជើង ភ្លាម និងទាំងស្រុង ជាអ្វីដែលមិនអាចស្រមៃបានទេ ! ព្រោះវាមានន័យស្មើនឹងកូរ៉េខាងជើងសុំចុះចាញ់។
ការចុះសន្ធិសញ្ញាបញ្ចប់សង្រ្គាមកូរ៉េ
ការចុះសន្ធិសញ្ញាសន្តិភាពនៅកូរ៉េត្រូវបានលោកត្រាំមើលឃើញជាចំណុចស្រួលសម្រេចជាងគេ។ សហរដ្ឋអាមេរិក ត្រៀមខ្លួននឹងធ្វើជាប្រទេសហត្ថលេខីនៃសន្ធិសញ្ញាសន្តិភាពនោះ។ កូរ៉េខាងជើងនិងខាងត្បូង មិនបានចុះកិច្ចព្រមព្រៀងសន្តិភាពនឹងគ្នា បិទបញ្ចប់សង្គ្រាមឆ្នាំ១៩៥០-៥៣ទេ ! គឺមានត្រឹមចុះកិច្ចឈប់បាញ់ប៉ុណ្ណោះ ព្រោះកាលណោះប្រធានាធិបតីកូរ៉េខាងត្បូងមិនព្រមចុះហត្ថលេខា ដោយបានបង្កើតត្រឹមតំបន់គ្មានកងទ័ពខណ្ឌចែកកូរ៉េជាពីររហូតមកទល់សព្វថ្ងៃ។
ប៉ុន្តែក្រោយជំនួបដ៏កម្រកាលពីខែមេសា ប្រមុខដឹកនាំកូរ៉េខាងជើង និងខាងត្បូង លោក គីម ជុងអ៊ុន និងលោក មូន ចែអ៊ីន បានព្រមព្រៀងស្វែងរកសន្ធិសញ្ញាសន្តិភាព និងបានប្រកាសបើកកិច្ចចរចាត្រីភាគី អាមេរិកនិងកូរ៉េខាងទាំងពីរ។ ប៉ុន្តែការចរចាអាចស្មុគស្មាញជាងការគិត។ ដើម្បីឱ្យសន្ធិសញ្ញាមានទម្រង់ត្រឹមត្រូវ និងយកជាការបាន គេត្រូវហៅចិនឱ្យមកចូលរួមដែរ ព្រោះចិនជាភាគីហត្ថលេខីនៃបទឈប់បាញ់ និងជាអ្នកគាំទ្រព្យុងយ៉ាងក្នុងអំឡុងពេលសង្គ្រាម។
ទណ្ឌកម្មរបស់អង្គការសហប្រជាជាតិ
ចំពោះបញ្ហាភ្ជាប់ទំនាក់ទំនងការទូត និងការដកទណ្ឌកម្មវិញ លោកដូណាល់ត្រាំ បានសម្តែងកាយវិការបែបទាក់ទាញ ចង់មានទំនាក់ទំនងជាធម្មតាជាមួយអតីតគូសត្រូវ ដោយគ្រោងនឹងអញ្ជើញលោកគីមជុងអ៊ុន ឱ្យទៅលេងវ៉ាស៊ីនតោន ផង។ ប៉ុន្តែការនេះទំនងមិនមែនជាអាទិភាពរបស់គីមជុងអ៊ុនប៉ុន្មានទេ ! ប្រមុខដឹកនាំកូរ៉េខាងជើង ចាប់អារម្មណ៍លើបញ្ហាទណ្ឌកម្មរបស់អង្គការសហប្រជាជាតិ ដែលភាគីទាំងពីរមានទស្សនៈផ្ទុយគ្នាស្រឡះ។ ព្យុងយ៉ាងចង់ឱ្យមានការបន្ធូរបន្ថយជាដំណាក់ៗទៅតាមល្បឿននៃការរំសាយនុយក្លេអ៊ែរ។ឯអាមេរិកតាំងជំហរដកទណ្ឌចេញពីព្យុងយ៉ាង ដរាបណាតែកម្មវិធីអាវុធនុយក្លេអ៊ែរត្រូវលុបបំបាត់ទាំងស្រុង ព្រោះអាមេរិកក៏ដូចជាអ្នកសង្កេតការណ៍ជាច្រើន សង្ស័យខ្លាំងថាកូរ៉េខាងជើងប្រឹងធ្វើគ្រប់យ៉ាងមកនេះ គឺក្នុងកម្មវត្ថុតែមួយ ស្វែងរកការលើកទណ្ឌកម្មចេញពីប្រទេស។ អាមេរិកត្រៀមចាំទទួលលទ្ធផលវិជ្ជមាននិងអវិជ្ជមានរួចស្រេចទៅ ហើយ។
ការធានាសន្តិសុខ
នៅក្នុងជំនួបស្អែកនេះ លោក ដូណាល់ត្រាំ ទំនងជាត្រូវបញ្ជាក់ជាថ្មីថាអាមេរិកបញ្ឈប់នយោបាយស្អប់ខ្ពើមកូរ៉េខាងជើង និងផ្តល់ការធានារក្សាសន្តិសុខជូនដល់របបព្យុងយ៉ាង ហើយក៏មិនត្រូវទាមទារឱ្យកូរ៉េខាងជើងប្តូរផ្លាស់របបដឹកនាំទេ ! លោក ប៉ុមប៉េអូ រដ្ឋមន្ត្រីការបរទេសអាមេរិក ធា្លប់បានប្រកាសសន្យាម្តងដែរ ក្រោយពេលមានលោក គីម ជុងអ៊ុន ផ្ទុះកំហឹងចង់ក្រលះចិត្តលុបជំនួបថ្ងៃទី១២មិថុនា នៅពេលទីប្រឹក្សាសន្តិសុខជាតិរបស់លោកដូណាល់ ត្រាំ និយាយអំពីគំរូរំសាយអាវុធនុយក្លេអ៊ែរកូរ៉េខាងជើង ដូចនៅលីប៊ី។
នេះជាពាក្យធានាចេញពីខាងអាមេរិក ! ប៉ុន្តែតើលោកគីមជុងអ៊ុននឹងជឿទុកចិត្តលើពាក្យធានារបស់លោកត្រាំប៉ុណ្ណា ! នេះជាបញ្ហា និងជាការព្រួយបារម្ភរបស់អ្នកវិភាគ ដែលចោទសួរខ្លួនឯងថា តើកូរ៉េខាងជើងអាចទុកចិត្តបានយ៉ាងដូចម្តេច បើមួយរយៈកន្លងមកនេះ លោកត្រាំបានដកខ្លួនចេញពីកិច្ចព្រមព្រៀងអន្តរជាតិច្រើន ដូចជាហែកចោលកិច្ចព្រមព្រៀងនុយក្លេអ៊ែរអ៊ីរ៉ង់ ដែលភាគីផ្សេងទៀតនាំគ្នាគោរព។
បញ្ហាសិទ្ធិមនុស្ស
នាយកអង្គការការពារសិទ្ធិមនុស្សHuman Rights Watch ប្រចាំអាស៊ី យល់ថា លោកត្រាំចាំបាច់ត្រូវតែនិយាយអំពីបញ្ហាសិទ្ធិមនុស្ស ព្រោះការរំលោភសិទ្ធិមានជាលក្ខណៈទូទៅទៅ ហើយនៅកូរ៉េខាងជើង។ ថ្វីបើការចរចាជាទង្វើវិជ្ជមានមែន ប៉ុន្តែគេមិនត្រូវភ្លេចទេថាលោក គីម ជុងអ៊ុន ជាមេដឹកនាំផ្តាច់ការមានប្រព័ន្ធគាបសង្កត់បង្ក្រាបស្ទើរតែខ្លាំងជាងគេបំផុតនៅលើលោក។ នេះបើតាមរំលឹករបស់អង្គការដែលបញ្ជាក់ទៀតថាមានអ្នកទោសមនសិកាប្រមាណ១២ម៉ឺននាក់ កំពុងជាប់ទោសរកទណ្ឌកម្មក្នុងជំរំលត់ដំ។
ជប៉ុន សម្ព័ន្ធមិត្តរបស់អាមេរិក បានស្នើសុំឱ្យលោកប្រធានាធិបតីអាមេរិក សួរនាំបញ្ហា លោកគីមជុងអ៊ុន អំពីជោគវាសនារបស់ពលរដ្ឋជប៉ុនដែលកូរ៉េខាងជើងបានចាប់ខ្លួនជំរិតយកទៅ នៅក្នុងអំឡុងឆ្នាំ១៩៧០-៨០ ដើម្បីបង្រៀនភ្នាក់ងារចារកិច្ចកូរ៉េខាងជើងអំពីភាសានិងទំនៀមទម្លាប់ជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ