ចិន៖ ផលិតផលឧស្សាហកម្មកើនឡើង នៅពេលការចំណាយក្នុងស្រុកធ្លាក់ចុះ
ផលិតផលឧស្សាហកម្មចិនបានកើនឡើងហួសពីការព្យាករទុក ដល់ទៅ ៧ភាគរយ នៅខែមេសា។ នេះបើតាមតួលេខរបស់ការិយាល័យស្ថិតិជាតិចិន ចេញផ្សាយនៅថ្ងៃអង្គារនេះ។ វិស័យឧស្សាហកម្មរបស់ចិនមានកំណើនកើនឡើងមែន ប៉ុន្តែ ការប្រើប្រាស់ក្នុងស្រុកវិញកំពុងធ្លាក់ចុះ ដែលជាដំណើរវិវឌ្ឍផ្ទុយពីការចង់បានរបស់រដ្ឋាភិបាលក្រុងប៉េកាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
វិស័យឧស្សាហកម្មចិន នៅខែមេសានេះ មានកំណើន ដល់៧% គឺកើនឡើងថែម ១ភាគរយទៀត បើប្រៀបធៀបនឹងខែមីនា។ វិស័យឧស្សាហកម្មចិនបានស្គាល់កំណើនលឿន ហួសពីការគ្រោងទុក ដោយសារកត្តាពីរយ៉ាង។ ទីមួយ រោងចក្រឧស្សាហកម្មចិនបានចាប់ផ្តើមសម្រុកសកម្មភាពផលិតរបស់ខ្លួន បន្ទាប់ពីបានបិទ អស់ប៉ុន្មានខែ ដោយសារតែវិធានការរបស់រដ្ឋាភិបាល ក្នុងការរឹតបន្តឹង ការបញ្ចេញផ្សែងពុល នៅរដូវរងាកន្លងទៅ។ ទី២ រោងចក្រឧស្សាហកម្មចិនបានបង្កើនការផលិតរបស់ខ្លួន ដើម្បីឆ្លើយតបទៅនឹង ការនាំចេញ ដែលបានកើនឡើងប្រមាណ ១៣ភាគរយ នៅខែមេសា។
សម្រាប់អ្នកជំនាញរបស់ទីភ្នាក់ងារ Bloomberg កំណើនក្នុងវិស័យឧស្សាហកម្មនឹងមិនផ្តល់ប្រយោជន៍ដល់សេដ្ឋកិច្ចចិនភ្លាមនោះទេ ព្រោះវាកើតឡើងនៅខណៈពេលដែលការចំណាយក្នុងស្រុកបានធ្លាក់ចុះ បើប្រៀបធៀបនឹងខែមីនា។ រដ្ឋាភិបាលក្រុងប៉េកាំងធ្លាប់បានប៉ង ចង់ពឹងផ្អែកលើការចំណាយក្នុងស្រុក ធ្វើជាមូលដ្ឋានគ្រឹះនៃគំរូសេដ្ឋកិច្ចចិន ប៉ុន្តែ វិធានការរបស់រដ្ឋាភិបាល ដើម្បីកាត់បន្ថយប្រាក់បំណុល តាមរយៈ ការរឹតបន្តឹងលើប្រាក់កម្ចីពីធនាគារ កំពុងទៅរំខាន បន្ទុចបង្អាក់ ការវិនិយោគក្នុងស្រុក ជាពិសេស វិស័យសំណង់ហេដ្ឋារចនាសម្ព័ន្ធ ដែលជាក្បាលម៉ាស៊ីនសំខាន់នៃសេដ្ឋកិច្ច។
ការបញ្ចេញតួលេខនៃការកើនឡើងហួសលឿននៃវិស័យឧស្សាហកម្មចិន កើតមានឡើង នៅចំពេលដែលការនាំចេញរបស់ចិនកំពុងប្រឈមនឹងអនាគតមិនច្បាស់លាស់ ដោយសារតែការដាក់សម្ពាធពីទីក្រុងវ៉ាស៊ីនតោន។ នៅថ្ងៃទី ២២ឧសភាខាងមុខ រដ្ឋាភិបាលលោកដូណាល់ត្រាំ នឹងអនុវត្ត លើការដាក់កំហិត បង្កើនតម្លៃពន្ធលើផលិតផលនាំចូលពីចិន ដែលមានតម្លៃ ៥០ពាន់លានដុល្លារអាមេរិក។
លោកលីវ ហេ Liu He ទីប្រឹក្សាសេដ្ឋកិច្ចរបស់លោកប្រធានាធិបតីចិន ស៊ី ជីនពីងនឹងធ្វើដំណើរនៅថ្ងៃអង្គារនេះ ទៅក្រុងវ៉ាស៊ីតោន ដើម្បីបើកការចរចាពាណិជ្ជកម្ម ជាមួយភាគីអាមេរិក រហូតដល់ថ្ងៃសៅរ៍។ ទីក្រុងប៉េកាំងធ្លាប់បានព្យាករ កំណត់កំណើនសេដ្ឋកិច្ចជាតិ ប្រមាណ ៦,៥%សម្រាប់ឆ្នាំ ២០១៨ ពោលគឺធ្លាក់ចុះបន្តិច បើប្រៀបធៀបនឹងឆ្នាំ ២០១៧ (៦,៩%)។ កំណើនសេដ្ឋកិច្ចរបស់ចិន នៅឆ្នាំនេះ នឹងអាចប្រែប្រួល រងប៉ះពាល់ខ្លាំង បើសិនមហាអំណាចសេដ្ឋកិច្ចចិន និងអាមេរិក អាចនឹងផ្ទុះសង្រ្គាមពាណិជ្ជកម្មណាមួយជាមួយគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ