កូរ៉េខាងជើង-ចិន៖លោកគីម ជុងអ៊ុនបានទៅជួបលោកស៊ី ជីនពីងជាថ្មី និងបានបង្ហាញពីភាពស្និទ្ធស្នាលរវាងគ្នាកាន់តែខ្លាំង
មេដឹកនាំកូរ៉េខាងជើងលោកគីម ជុងអ៊ុនបានទៅធ្វើទស្សនកិច្ចជាលើកទី២ រយៈពេល ២ថ្ងៃនៅក្នុងប្រទេសចិន។ ទស្សនកិច្ចលើកទី២ ក្នុងថ្ងៃចន្ទ និងថ្ងៃអង្គារ ទី៨ ឧសភាបានធ្វើឡើងនៅតាលានដែលជាទីក្រុងកំពង់ផែស្ថិតប៉ែកភាគឦសានប្រទេសចិន។ ក៏ដូចជានៅក្នុងដំណើរទស្សនកិច្ចលើកទី១ នាដំណាច់ខែមីនាកន្លងទៅ លោកគីម ជុងអ៊ុនបានជួបសន្ទនាជាមួយលោកប្រធានាធិបតីចិនស៊ី ជីនពីង និងដែលឥស្សរជនទាំងពីរបានបង្ហាញចេញនូវភាពស្និទ្ធស្នាលកាន់តែខ្លាំង។ កំណត់សម្គាល់មួយទៀត វត្តមានជាថ្មីរបស់មនុស្សខ្លាំងកូរ៉េខាងជើងក្នុងទឹកដីចិនពេលនេះបានកើតមានឡើង មុននឹងលោកគីម ជុងអ៊ុនជួបលោកប្រធានាធិបតីអាមេរិកដូណាល់ ត្រាំនៅចុងខែឧសភា ឬដើមខែមិថុនាខាងមុខ។
ចុះផ្សាយនៅថ្ងៃ៖
ស្តាប់ - ០២:០៤
ព័ត៌មាន និងរូបភាពស្តីពីដំណើរទស្សនកិច្ចលើកទី២ របស់លោកគីម ជុងអ៊ុនក្នុងប្រទេសចិនត្រូវបានចាក់បញ្ចាំងដោយទូរទស្សន៍រដ្ឋចិនឈ្មោះ CCTV។ CCTV បានបង្ហាញឲ្យឃើញនូវរូបលោកគីម ជុងអ៊ុន និងរូបលោកស៊ី ជីនពីងដែលកំពុងដើរទន្ទឹមគ្នានៅក្នុងឧទ្យានមួយក្បែរមាត់សមុទ្រ និងបានអង្គុយជជែកគ្នាជុំវិញតុមួយ។
« ក្រោយពីជំនួបលើកទី១ ជាមួយសមមិត្តលោកគីម ជុងអ៊ុន ទំនាក់ទំនងរវាងចិន និងសាធារណរដ្ឋប្រជាមានិតប្រជាធិបតេយ្យកូរ៉េខាងជើងបានស្គាល់ភាពវិជ្ជមាន រួមទាំងស្ថានភាពនៅឧបទ្វីបកូរ៉េ។ ខ្ញុំសប្បាយចិត្តខ្លាំងណាស់ » នេះជាឃ្លាសាទររបស់លោកស៊ី ជីនពីងដែលដកស្រង់ដោយកាសែតស៊ីនហួរ។ កាសែតចិននេះដដែលក៏បានស្រង់ចម្លើយរបស់លោកគីម ជុងអ៊ុនចំពោះលោកស៊ី ជីនពិងវិញយ៉ាងដូច្នេះថា « មានលទ្ធផលវិជ្ជមានជាច្រើននៅក្នុងជំនួបជាប្រវត្តិសាស្រ្តរវាងខ្ញុំ និងសមមិត្តអគ្គលេខាធិការស៊ី ជីនពីង »។
ក៏ដូចជានៅក្នុងដំណើរទស្សនកិច្ចលើកទី១ របស់លោកគីម ជុងអ៊ុនក្នុងប្រទេសចិននាដំណាច់ខែមីនាដែរ មធ្យោបាយឃោសនាមហាជនចិនត្រូវរង់ចំាការវិលត្រឡប់របស់លោកគីមចូលស្រុកវិញសិនទើបផ្សព្វផ្សាយព័ត៌មានជាផ្លូវការ។ ពេញមួយថ្ងៃអង្គារ ទី៨ ឧសភា សារព័ត៌មានជប៉ុន និងកូរ៉េខាងត្បូងបានត្រឹមទម្លាយព័ត៌មានថា ទីក្រុងតាលានបានរៀបចំទទួលថ្នាក់ដឹកនាំជាន់ខ្ពស់កូរ៉េខាងជើងម្នាក់ ដោយមិនអាចបញ្ជាក់ថាជាមនុស្សខ្លាំងកូរ៉េខាងជើងទេ។ ចំណែកក្រសួងការបរទេសចិនក៏ហាក់មិនចង់បញ្ជាក់ ឬក៏ទាត់ចោលលើព័ត៌មានមួយនេះដែរ។
យ៉ាងណាក៏ដោយ ទស្សនកិច្ចលើកទី២ ក្នុងរយៈពេលតែ ១ខែកន្លះរបស់លោកគីម ជុងអ៊ុនក្នុងទឹកដីចិនពេលនេះជាផ្នែកមួយនៃកិច្ចខិតខំប្រឹងប្រែងរវាងចិន និងកូរ៉េខាងជើងដើម្បីបង្កើនភាពស្និទ្ធស្នាលរវាងគ្នា។ ភាពស្និទ្ធស្នាលដែលបានធ្លាក់ចុះដោយសារតែក្រុងប៉េកាំងបានគាំទ្រទណ្ឌកម្មអន្តរជាតិដាក់លើក្រុងព្យុងយ៉ាងក្នុងសំណុំរឿងនុយក្លេអ៊ែរ។ ទន្ទឹមគ្នានេះ ចិនក៏មិនចង់ស្ថិតនៅក្រៅសៃវៀននៃភាពល្អូកល្អឺនរវាងកូរ៉េខាងជើងជាមួយប្រទេសផ្សេង ពិសេសគម្រោងជំនួបជាប្រវត្តិសាស្រ្តរបស់លោកគីម ជុងអ៊ុន និងលោកប្រធានាធិបតីអាមេរិកដូណាល់ ត្រាំនាពេលខាងមុខដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ