សាធារណរដ្ឋដូមីនិកផ្តាច់ខ្លួនពីតៃវ៉ាន់ ទៅអោបចិន
នៅថ្ងៃអង្គារទី ១ ឧសភា ២០១៨នេះ សាធារណរដ្ឋដូមីនិក ដែលជាសម្ព័ន្ធមិត្តរបស់តៃវ៉ាន់ បានប្រកាសភ្ជាប់ទំនាក់ទំនងការទូតជាមួយប្រទេសចិន។ ពិធីចុះកិច្ចព្រមព្រៀងភ្ជាប់ទូតគ្នាត្រូវបានចុះហត្ថលេខា ដ៏ឱឡាឫក ដោយរដ្ឋមន្ត្រីក្រសួងការបរទេសចិន និងសាធារណរដ្ឋដូមីនិក នៅទីក្រុងប៉េកាំង និងក្រោមក្រសែភ្នែកខកចិត្តរបស់តៃវ៉ាន់។ គិតមកត្រឹមពេលនេះ មានប្រទេសមិនដល់២០ទេនៅលើភពផែនដី ដែលទទួលស្គាល់ និងមានភ្ជាប់ទំនាក់ទំនងការទូតជាមួយតៃវ៉ាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
បន្ទាប់ពីកូស្តារីកា នៅឆ្នាំ២០០៧ ហ្កំប៊ី នៅឆ្នាំ២០១៣ សៅតូម៉េ នៅឆ្នាំ២០១៦ និងប៉ាន់ណាម៉ា នៅឆ្នាំ២០១៧ នៅថ្ងៃនេះ តៃវ៉ាន់បានរបូតសម្ព័ន្ធមិត្តម្នាក់ទៀតហើយ ! សាធារណរដ្ឋដូមីនិក ទើបប្រកាសទទួលស្គាល់ថានយោបាយចិនតែមួយ ដោយចាត់ទុកតៃវ៉ាន់ជាចំណែកមួយរបស់សាធារណរដ្ឋប្រជាមានិតចិន (ចិនដីគោក) និងបានចុះហត្ថលេខាភ្ជាប់ទូតជាមួយប៉េកាំង នៅថ្ងៃអង្គារនេះ នៅទីក្រុងប៉េកាំង។
មានទីតាំងនៅក្នុងតំបន់ប្រជុំកោះការ៉ាអ៊ីប មានប្រជាជនសរុបជាង១០លាននាក់ រស់រំពឹងខ្លាំងលើវិស័យកសិកម្មនិងទេសចរណ៍ សាធារណរដ្ឋដូមីនិក បានថ្លែងអំណរគុណចំពោះកិច្ចសហប្រតិបត្តិការជាមួយតៃវ៉ាន់កន្លងមក ប៉ុន្តែប្រវត្តិសាស្ត្រនិងការពិតនៃសង្គមនិងសេដ្ឋកិច្ច បានជំរុញឱ្យដូមីនិកត្រូវតែប្តូរនយោបាយ ដែលផ្តល់ប្រយោជន៍ដ៏មហាសែនវិជ្ជមានដល់អនាគតប្រទេស។ កិច្ចព្រមព្រៀងភ្ជាប់ទូតនេះ គឺជាការផ្តល់ឱកាសធំក្រៃដល់ការអភិវឌ្ឍន៍ប្រទេសសាធារណរដ្ឋដូមីនិក និងជាការផ្តល់សន្ទុះថ្មីដល់ទំនាក់ទំនងរវាងចិននិងអាមេរិកឡាទីន។ នេះជាសម្រែកអបអររបស់ប៉េកាំង តាមរយៈប្រសាសន៍របស់លោករដ្ឋមន្ត្រីការបរទេស Wang Yi។
ប៉ុន្តែសម្រាប់តៃវ៉ាន់ តៃប៉ិខកចិត្តយ៉ាងខ្លាំងនឹងសេចក្តីសម្រេចចិត្តរបស់ដូមីនិក និងបានបរិហារនយោបាយរបស់ចិន ជះលុយទាក់យកសាធារណរដ្ឋដូមីនិក ដែលជាសម្ព័ន្ធមិត្តចំណាស់៧៧ឆ្នាំរបស់រដ្ឋាភិបាលតៃវ៉ាន់។ ជាទឹកលុយដ៏សន្ធឹកសន្ធាប់ណាស់ ដែលតៃវ៉ាន់មិនអាចប្រៀបជាមួយបានឡើយ។
សូមបញ្ជាក់ថា តាំងពីឆ្នាំ១៩៤៩មក ចិនប៉េកាំង និងចិនតៃវ៉ាន់ មានរបបដឹកនាំពីរដាច់ឡែកពីគ្នា។ តៃវ៉ាន់ជាកោះស្វយ័ត តែពុំធ្លាប់បានទាមទារឯករាជ្យទេ។ របបក្រុងប៉េកាំងតែងដាក់គំនាបលើគ្រប់ប្រទេសជាដៃគូ មិនឱ្យមានទំនាក់ទំនងជាផ្លូវការជាមួយតៃវ៉ាន់ឡើយ និងអូសទាញមួយម្តងៗសម្ព័ន្ធមិត្តតៃវ៉ាន់ ឱ្យទទួលស្គាល់របបកុម្មុយនិស្តចិន ក្រោមផ្លាក “ចិនតែមួយ”។
ជាមួយនឹងការប្តូរទិសដៅនយោបាយរបស់ដូមីនិក គេរាប់ឃើញ មានសល់តែ១៩ប៉ុណ្ណោះទៅ លើភពផែនដី ដែលទទួលស្គាល់តៃវ៉ាន់ជាប្រទេសនិងមានភ្ជាប់ទូតគ្នា និងដែលសុទ្ធសឹងជាប្រទេសតូចៗ ដូចជា វ៉ាទីកង់ ប្រទេសនៅក្នុងមហាសមុទ្ទប៉ាស៊ីហ្វិក នៅតំបន់អាមេរិកឡាទីន ((ក្វាតាម៉ាឡា នីការ៉ាហ្គ័រ ប៉ារ៉ាហ្កាយ សាំងលុយស៊ី សាវ៉ាដរ...) និងមួយនៅអាហ្វ្រិក (បួរគីណាហ្វាសូ)។ ហៃទី ប្រទេសព្រំដែននិងនៅលើកោះតែមួយជាមួយដូមីនិក នៅតែស្មោះស្ម័គ្រនឹងតៃវ៉ាន់ជានិច្ច។ ប៉ុន្តែគេមិនដឹងថាតើភាពស្មោះស្ម័គ្រនេះអាចបន្តយូរអង្វែងដល់ពេលណាទេ ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ