ជំនួបកំពូលរវាងឥណ្ឌានិងចិននៅ Wuhan ដើម្បីរកការបន្ធូរបន្ធយភាពតានតឹងព្រំដែន
លោក Narendra Modi និង លោក Xi Jinping ថ្នាក់ដឹកនាំនៃប្រទេសឥណ្ឌានិងចិន បានរួមប្រជុំគ្នាចំនួន២ថ្ងៃគឺនៅថ្ងៃសុក្រនេះរហូតទៅដល់ថ្ងៃសៅរ៍ស្អែកនៅក្រុងWuhan ដើម្បី រកការបន្ធូរបន្ធយនូវភាពតានតឹងព្រំដែនរវាងប្រទេសទាំងពីរនិងជម្រុញឲ្យទំនាក់ទំនងរវាងចិននិងឥណ្ឌា មានភាពកក់ក្តៅឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ថ្នាក់ដឹកនាំឥណ្ឌានិងចិន អង្គុយកៀកគ្នានៅលើទូកមួយដែលធ្វើដំណើរឆ្លងកាត់បឹងដែលមានទឹកល្អក់ នោះហើយគឺជារូបភាពរវាងលោក Narendra Modi និងលោក Xi Jinping ដែលត្រូវបានគេមើលឃើញនៅលើទំព័រមុខនៃកាសែតចិនឈ្មោះមួយ Global Times ។
នៅក្នុងជំនួបកំពូលនេះ ចិននិងឥណ្ឌា មានបំណងចង់រកការសម្រុះសម្រួលគ្នា ក៏ប៉ុន្តែភាគីទាំងពីរនេះនៅតែគិតផលប្រយោជន៍ប្រទេសគេរៀងៗខ្លួន។
លោក Xi Jinping កំពុងប្រឈមមុខនឹងការគំរាមកំហែងសង្គ្រាមពាណិជ្ជកម្មមួយនិងក៏ត្រូវខិតខំនិយាយបញ្ចុះបញ្ចូលមហាយក្ខឥណ្ឌា អោយដកខ្លួនចេញឆ្ងាយពីអាមេរិក។
ចំណែកនាយករដ្ឋមន្ត្រីឥណ្ឌាលោក Modii វិញ ដែលនឹងត្រូវប្រឈមមុខនឹងហិបសន្លឹកឆ្នោតនៅឆ្នំាក្រោយនឹងត្រូវខិតខំប្រឹងប្រែងធ្វើយ៉ាងណាដើម្បីឲ្យសេដ្ឋកិច្ចឥណ្ឌាមានការលូតលាស់រុងរឿង។
មួយវិញទៀត សំណុំរឿងខ្វែងគំនិតគ្នា ក៏មិនខ្វះដែរនៅក្នុងរបៀបវារៈនៃជំនួបប្រាស្រ័យគ្នានេះដែលធ្វើឡើងនៅក្បែរមាត់បឹងនៃក្រុង Wuhan ។ គួររំលឹកថា កាលពីរដូវក្តៅឆ្នាំមុន ទាហានឥណ្ឌានិងចិននៅតំបន់ព្រំដែន បានប្រឈមមុខដាក់គ្នានៅលើតំបន់ខ្ពង់រាប Dokhlam ក្នុងតំបន់ភ្នំ Himalaya។
ប្រទេស Bhoutan វិញដែលជារាជាណាចក្រដ៏តូចមួយ បានអំពាវនាវដល់ឥណ្ឌាប្រទេសជិតខាងរបស់ខ្លួននោះ ឲ្យជួយអន្តរាគមន៍ដើម្បីកុំអោយ bulldozers របស់ចិន មកធ្វើការឈូសឆាយដី ដើម្បីសាងសង់ផ្លូវមួយនៅលើទឹកដីជាប់ជម្លោះ។
នៅក្នុងទំនាស់មួយផ្សេងទៀតដែលពាក់ព័ន្ធនឹងប្រទេសប៉ាគីស្ថាន ប្រទេសឥណ្ឌា ពុំមានការទុកចិត្តអ្វីទេនៅលើសម្ព័ន្ធភាពរវាងចិននិងប៉ាគីស្ថាន។ពីព្រោះ ប៉ាគីស្ថាន គឺជាប្រទេសដែលឥណ្ឌា ចាត់ទុកថាជាចំណុចដ៏សំខាន់នៃផ្លូវខ្សែក្រវាត់សូត្រចិនដែលទីក្រុងប៉េកាំងបានចំណាយលុយអស់រាប់សិបពាន់លានអ៊ឹរ៉ូ។
ក៏ប៉ុន្តែកាសែតចិន Global Times បានធ្វើការប្រៀបធៀបរួចជាស្រេចហើយថា ជំនួបកំពូលរវាងលោក Xi និង លោក Modi មានលក្ខណៈដូចគ្នា ទៅនឹងជំនួបកំពូលប្រវត្តិសាស្ត្រមួយ រវាងលោក Deng Xiaoping និងលោក Radjiv Gandhi នៅក្នុងឆ្នាំ ១៩៨៨ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ