រុស្សីបណ្តេញមន្រ្តីទូតមកពី២៣ប្រទេស ដើម្បីជាការសងសឹកទល់នឹងអង់គ្លេស ព្រមទាំងសម្ព័ន្ឋមិត្ត
នៅថ្ងៃសៅរ៍ ទី ៣១ មីនា នេះ ប្រទេសរុស្ស៊ី បានបណ្តេញមន្ត្រីការទូត មកពីប្រទេសលោកខាងលិចចំនួន ២៣ ដើម្បីជាការសងសឹក ដែលប្រទេសទាំងនោះបានសហការគ្នា បណ្តេញមន្ត្រីទូតរុស្សីចំនួនជាង ១៥០ នាក់ ចេញពីប្រទេសរបស់ពួកគេ ទាក់ទងនឹងសំណុំរឿងប៉ុនប៉ង បំពុលសម្លាប់អតីតភ្នាក់ងារចារកិច្ចរុស្សី និងកូនស្រី នៅក្នុងប្រទេសអង់គ្លេស កាលពីដើមខែ មីនានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ក្រសួងការបរទេសរុស្ស៊ី បាននិយាយថា ខ្លួនបានកោះហៅប្រធានបេសកកម្មមកពី ២៣ ប្រទេស ដើម្បីប្រាប់ពួកគេថា មន្ត្រីការទូតរបស់ពួកគេចំនួន ៥០ នាក់ ត្រូវចាកចេញពីរុស្សី។ ការណ៍នេះ ជំរុញឲ្យ សង្គ្រាមការទូត រវាងប្រទេសអង់គ្លេស ព្រមទាំងសម្ព័ន្ឋមិត្ត ទល់នឹងរុស្សីពាក់ពន្ឋ័សំណុំរឿងប៉ុនប៉ងបំពុលសម្លាប់អតីតភ្នាក់ងារចារកិច្ចរុស្សី ដែលធ្វើការស៊ើបអង្កេតឲ្យអង់គ្លេស កំពុងតែកើនកំដៅជាខ្លំាង។
ទាក់ទងនឹង ការបណ្តេញចេញរបស់រុស្សី ទៅលើមន្ត្រីទូតប្រទេសលោកខាងលិច នេះ លោករដ្ឋមន្រ្តីក្រសួងការបរទេស ហូឡង់ បញ្ជាក់ថា វាមិនមែនជារឿងដ៏គួរឲ្យភ្ញាក់ផ្អើលនោះទេ។ ចំនែកឯ ប្រទេសបារាំង អាឡឺម៉ង់ កាណាដានិងប៉ូឡូញ វិញ បានលើកឡើងដោយឡែកពីគ្នាថា ប្រទេសរុស្ស៊ី កំពុងបណ្តេញមន្ត្រីការទូត របស់ពួកគេ ចំនួន៤ នាក់។ ក្រៅពីនេះ បណ្តាប្រទេសផ្សេងទៀតរួមមាន អ៊ុយក្រែន ហូឡង់ ស៊ុយអែត សាធារណរដ្ឋឆែក ហ្វាំងឡង់ លីទុយអានី និងន័រវែស ក៏ត្រូវបានរដ្ឋាភិបាលវិមានក្រឹមឡាំង ប្រាប់ឱ្យចាកចេញផងដែរ។
ចលនា បណ្តេញមន្ត្រីការទូត គ្នាទៅវិញទៅមកនេះ បានរីករាលដាលកាន់តែធំឡើង ហើយនាពេលកន្លងទៅថ្មីៗនេះ លោក ប្រធានាធិបតីរុស្សី វ៉្លាឌីមៀរ ពូទីន បានពិភាក្សាជាមួយមន្ត្រីរបស់ខ្លួន អំពីវិធីសាស្ត្រសងសឹកថ្មីៗបំផុត ប្រឆាំងនឹងអង់គ្លេសនិងសម្ព័ន្ធមិត្ត។ ទន្ទឹមគ្នានេះ អ្នកនាំពាក្យវិមានក្រឹមឡាំង បាននិយាយថា ប្រទេសរុស្ស៊ី មិនមែនជាអ្នកចាប់ផ្តើមសង្គ្រាមការទូតមុនឡើយ។
គួររំឭកជូនថា ជម្លោះផ្នែកការទូតរវាងអង់គ្លេស និង រុស្សី ចាប់ផ្តើមឡើង នៅដើម ខែមីនា គឺក្រោយដែលពីលោក Sergei Skripal អតីតភ្នាក់ងារចារកិច្ចរុស្សី ដែលធ្វើការឲ្យអង់គ្លេស និង កូនស្រី ត្រូវបានគេបំពុល ក្នុងទឹកដីអង់គ្លេស។ បន្ទាប់ពីការប៉ុនប៉ង សម្លាប់ដោយសារធាតុពុល នេះ អង់គ្លេស អង្គការអូតង់ បណ្តាប្រទេសទ្វីបអឺរ៉ុប ព្រមទាំងប្រទេសប្រមាណជា ២០ ប្រទេស ដែលរួមមានទាំង សហរដ្ឋអាមេរិក កាណាដា បារាំងជាដើម បានប្រកាសថាខ្លួននឹងបណ្តេញ មន្ត្រីការទូតរបស់រុស្សីចេញពីប្រទេសពួកគេរៀងៗខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ