លេខាបក្សកុម្មុយនិស្តវៀតណាមបំពេញទស្សនកិច្ចនៅបារាំង
ប្រធានបក្សកុម្មុយនិស្តវៀតណាម លោក Nguyen Phu Trong ដែលជាប្រមុខដឹកនាំកំពូលរបស់វៀតណាម កំពុងបំពេញទស្សនកិច្ចបីថ្ងៃនៅប្រទេសបារាំង និងត្រូវបានប្រធានាធិបតីបារាំងទទួលជួប នៅថ្ងៃទី ២៧ មីនា ម្សិលមិញ។ នៅក្នុងអំឡុងពេលទស្សនកិច្ចនេះ កិច្ចព្រមព្រៀងពាណិជ្ជកម្មជាច្រើនរវាងក្រុមហ៊ុនបារាំងនិងវៀតណាមត្រូវបានចុះហត្ថលេខា។ ប៉ុន្តែប្រធានាធិបតីបារាំង មិនសូវចេញមុខចេញមាត់បន្ទោសរឿងសិទ្ធិមនុស្សទេ ទោះបីមានក្តីអំពាវនាវខ្លាំងពីសំណាក់អង្គការការពារសិទ្ធិមនុស្សជាច្រើនក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
គ្មានមួយម៉ាត់សោះ ទាក់ទងនឹងការគាបសង្កត់ បំបិទសេរីភាពនយោបាយនៅក្នុងប្រទេសវៀតណាម ! រដ្ឋាភិបាលកុម្មុយនិស្តដែល បានរឹតបន្តឹង និងបង្កើនគំនាបលើពីក្រុមអ្នកចង់បះបោរ យ៉ាងខ្លាំងជាហេតុធ្វើឱ្យសកម្មជនសិទ្ធិមនុស្សភាគច្រើននាំគ្នារត់គេចពីប្រទេស។ នេះបើយោងតាមរបាយការណ៍ឆ្នាំ២០១៧-២០៨របស់ Amnesty International និងបើតាមរបាយការណ៍របស់អង្គការការពារសិទ្ធិមនុស្ស Human Right Watch មានមនុស្សប្រមាណ១២៩នាក់ កំពុងជាប់ឃុំឃាំងនៅវៀតណាម ពីបទបានតវាប្រឆាំង និងរិះគន់រដ្ឋាភិបាល។
វិមានប្រធានាធិបតីបារាំង បានត្រឹមអះអាងថា បញ្ហាសិទ្ធិមនុស្សពិតជាត្រូវបានបារាំងលើកមកនិយាយជាមួយប្រធានបក្សកុម្មុយនិស្ត ក្នុងជំនួបជាឯកជន ប៉ុន្តែជាសាធារណៈ លោកម៉ាក្រុង ជ្រើសរើសសង្កត់ធ្ងន់តែលើវិស័យសេដ្ឋកិច្ច។
ប្រទេសមានជោគជ័យដ៏អស្ចារ្ស ! ផលិតផលសរុបក្នុងស្រុក កើនមួយជាបី ក្នុងរយៈពេល១០ឆ្នាំ ! នេះជាសេចក្តីថ្លែងការណ៍របស់លោក អេម៉ាណុយអែល ម៉ាក្រុង នៅវិមានប្រធានាធិបតីអេលីហ្សេ ក្បែរប្រធានបក្សកុម្មុយនិស្ត Nguyen Phu Trong ដែលបានអះអាងទៀតថា វៀតណាមបានធ្វើកំណែទម្រង់ដ៏សំខាន់ផ្នែកនីតិរដ្ឋ តែយើងអាចធ្វើឱ្យកាន់តែប្រសើរជាងនេះទៀត !
គម្រោងកិច្ចសហប្រតិបត្តិការ ២០១៨-២០១៩ ត្រូវបានចុះហត្ថលេខា រវាងរដ្ឋមន្ត្រីក្រសួងយុត្តិធម៌បារាំងនិងវៀតណាម។ កិច្ចសន្យាពាណិជ្ជកម្ម ក្នុងវិស័យទូរគមនាគមន៍ និងសំណង់ផ្លូវដែកក្រោមដីនៅក្រុងហាណូយ តម្លៃ ១,៥ពាន់លានដុល្លារ ព្រមទាំងគម្រោងកិច្ចព្រមព្រៀង ក្នុងវិស័យថាមពល អាកាសចរណ៍ ជាច្រើនពាន់លានដុល្លារទៀត ត្រូវបានចុះហត្ថលេខា នាឱកាសទស្សនកិច្ចរបស់លោកប្រមុខបក្សកុម្មុយនិស្តវៀតណាមនៅទីក្រុងប៉ារីសនេះ។
វៀតណាម រីករាយនិងចង់បានកិច្ចសហប្រតិបត្តិការ និងការផ្តោះប្តូរពាណិជ្ជកម្ម ឱ្យបានកាន់តែច្រើនជាមួយបារាំង ព្រមទាំងពង្រឹកទំនុកចិត្តនយោបាយលើគ្នា ប៉ុន្តែមិនចង់ឃើញមានការជ្រៀតជ្រែកកិច្ចការផ្ទៃក្នុងរបស់វៀតណាមទេ ! នេះជាប្រសាសន៍តបរបស់លោក។
សម្រាប់បារាំង របបកុម្មុយនិស្តវៀតណាម ជាច្រកទ្វារសម្រាប់ចូលទៅកាន់តំបន់អាស៊ីអាគ្នេយ៍។ លោកម៉ាក្រុង បានប្រកាសថានឹងអញ្ជើញទៅបំពេញទស្សនកិច្ចផ្លូវរដ្ឋ នៅក្រុងហាណូយ នៅឆ្នាំ ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ