rfi

កំពុងផ្សាយ
  • ផ្សាយផ្ទាល់
  • នាទីព័ត៌មាន
  • RFI ជាភាសាបារាំង
ព្រឹត្តិការណ៍អន្តរជាតិប្រចាំថ្ងៃ
rss itunes

តើ​ប្រមុខ​ដឹកនាំ​កូរ៉េខាងជើង​លោក​គីម ជុងអ៊ុន​បាន​ទៅ​ទស្សនកិច្ច​នៅ​ចិន​ដោយ​ស្ងាត់ៗ ឬ​?

ដោយ គួច គន្ធារ៉ា

នៅ​ថ្ងៃ​អង្គារ ទី២៧ មីនា​នេះ អ្នក​នាំពាក្យ​នៃ​ក្រសួង​ការបរទេស​ចិន​លោកស្រី​ហួរ ជុនយីង​បាន​ចេញ​មុខ​បដិសេធ​លើ​ព័ត៌មាន​ដែល​ថា ប្រមុខ​ដឹកនាំ​កូរ៉េខាងជើង​លោក​គីម ជុងអ៊ុន​ប្រហែល​ជា​បាន​ទៅ​បំពេញ​ទស្សនកិច្ច​ស្ងាត់ៗ​នៅ​ក្នុង​ប្រទេស​ចិន។ តែ​លោកស្រី​បាន​បន្ថែម​ថា លោកស្រី​នឹង​ផ្តល់​ព័ត៌មាន​ជុំវិញ​រឿងនេះ​ក្នុង​ពេល​ដ៏​សមស្រប​មួយ។ សូម​ជម្រាប​ជូន​ថា ដំណឹង​ទស្សនកិច្ច​ស្ងាត់ៗ​ជា​យថាហេតុ​របស់​លោក​គីម ជុងអ៊ុន​នៅ​ចិន​ពេល​នេះ​ត្រូវ​បាន​ទម្លាយ​ដោយ​កាសែត​ជប៉ុន​ក្យូដូ។

តាម​កាសែត​ក្យូដូ គេ​បាន​ឃើញ​រថភ្លើងពិសេស​មួយ​ខ្សែ​ធ្វើ​ដំណើរ​ចេញ​ពី​ទឹកដី​កូរ៉េខាងជើង​ឆ្លង​ព្រំដែន​ប្រទេស​ចិន​ចូល​ទៅ​ចត​នៅ​ស្ថានីយ៍​រថភ្លើង​ក្នុង​ទីក្រុង​ប៉េកាំង​នា​យប់​ថ្ងៃ​ចន្ទ ទី២៦ មីនា ហើយ​រថភ្លើងពិសេស​នោះ​បាន​ចាក​ចេញ​ពី​ទឹកដី​ចិន​នៅ​ថ្ងៃ​អង្គារ ទី២៧ មីនា។

ក្រៅ​ពី​កាសែត​ជប៉ុន​ក្យូដូ ព័ត៌មាន​ស្តីពី​ទស្សនកិច្ច​ជា​យថាហេតុ​របស់​លោក​គីម ជុងអ៊ុន​នៅ​ចិន​ក៏​ត្រូវ​បាន​ចុះ​ផ្សាយ​ដោយ​ទូរទស្សន៍​ជប៉ុន​មួយ​ឈ្មោះ NNN។ ទូរទស្សន៍ NNN បាន​បញ្ចាំង​រូបភាព​រថភ្លើងពិសេស​មាន​ពណ៌បៃតង នង​មាន​បិទ​ទ្រេ​ពណ៌លឿង​មួយ​ខ្សែ​បាន​ឆ្លង​ព្រំប្រទល់ដែន​ខ័ណ្ឌចែក​ទឹកដី​កូរ៉េខាងជើង និង​ទឹកដី​ចិន​ចូល​ទៅ​ចត​នៅ​ក្នុង​ស្ថានីយ៍​រថភ្លើង​មួយ​ក្នុង​ទីក្រុង​ប៉េកាំង​នា​រសៀល​ថ្ងៃ​ចន្ទ ទី២៦ មីនា។ ក្រៅ​ពី​បង្ហាញ​រូបភាព​រថភ្លើងពិសេស​នោះ កាសែត​ជប៉ុន​ក្យូដូ និង​ទូរទស្សន៍​ជប៉ុន NNN ក៏​បាន​បង្ហាញ​ឲ្យ​ឃើញ​នូវ​រូបភាព​នៃ​វត្តមាន​ថ្នាក់ដឹកនាំជាន់ខ្ពស់​កូរ៉េខាងជើង​ម្នាក់​ដែល​ត្រូវ​បាន​ទទួល​យ៉ាង​រាក់ទាក់ និង​មាន​ការ ការពារ​សន្តិសុខ​យ៉ាង​រឹងមាំ​ពី​កម្លាំង​ប៉ូលិស និង​កងសន្តិសុខ​ដ៏​ច្រើន​សន្ធឹកសន្ធាប់​មិន​ធ្លាប់​មាន​នៅ​ស្ថានីយ៍​រថភ្លើង​នោះ។

គេ​នៅ​មិន​ទាន់​ដឹង​ថា តើ​ថ្នាក់ដឹកនាំជាន់ខ្ពស់​កូរ៉េខាងជើង​រូប​នោះ​ជា​នរណា​ពិត​ប្រាកដ​ទេ អ្វី​ដែល​គេ​ដឹង រថភ្លើងពិសេស​នោះ​មាន​រូបភាព​ដូច​គ្នា​បិះបិទ​នឹង​រថភ្លើង​ដែល​ធ្លាប់​បាន​ដឹក​លោក​គីម ជុងអ៊ីល អតីត​ប្រមុខ​ដឹកនាំ​កូរ៉េខាងជើង និង​ជា​ឳពុក​របស់​លោក​គីម ជុងអ៊ុន​ទៅ​ទស្សនកិច្ច​នៅ​ចិន​ក្នុង​ឆ្នាំ ២០១០។ ព័ត៌មាន​ស្តីពី​ទស្សនកិច្ច​របស់​លោក​គីម ជុងអ៊ីល​កាលណោះ​ក៏​បាន​ត្រឹម​លេច​ឮ​ជា​ពាក្យ​ចចាមអារ៉ាម​ដូច​លោក​គីម ជុងអ៊ុន​ពេល​នេះ​ដែរ។

គេ​ត្រូវ​រង់ចាំ​ដល់​ការ​ត្រឡប់​ចូល​ប្រទេស​វិញ​របស់​លោក​គីម ជុងអ៊ីល​ទើប​ព័ត៌មាន​មួយ​នេះ​ត្រូវ​បាន​បញ្ជាក់​ជា​ផ្លូវការ​ពី​ចិន និង​កូរ៉េខាងជើង។ កាសែត​ជប៉ុន​កូដ្យូ​ចេញ​ផ្សាយ​ថ្ងៃ​អង្គារ ទី២៧ មីនា​ឲ្យ​ដឹង​ថា រថភ្លើងពិសេស​នោះ​បាន​ធ្វើ​ដំណើរ​ត្រឡប់​ចូល​ទឹកដី​កូរ៉េខាងជើង​វិញ​ហើយ​នៅ​ថ្ងៃ​អង្គារ ទី២៧ មីនា។ តែ​សំណួរ​កំពុង​ចោទ​ថា តើ​លោក​គីម ជុងអ៊ុន​មាន​បាន​ទៅ​ទស្សនកិច្ច​នៅ​ចិន ឬ​អត់?។ គ្មាន​នរណា​ម្នាក់​ហ៊ាន​ឆ្លើយ​ទេ សូម្បី​តែ​កូរ៉េខាងត្បូង​ដែល​ធ្លាប់​ទទួល​បាន​ព័ត៌មាន​ជាក់ច្បាស់​ពី​ខាងជើង​ក៏​បាន​ត្រឹម​បញ្ជាក់​ថា កំពុង​តាមដាន​ព័ត៌មាន​មួយ​នេះ។ អ្នក​ដែល​អាច​ឆ្លើយ​សំណួរ​នេះ​បាន មាន​តែ​ចិន និង​កូរ៉េខាងជើង។

បើ​លោក​គីម ជុងអ៊ុន​ទៅ​ចិន តើ​ទៅ​ក្នុង​គោលដៅ​អ្វី?

តាំង​ពី​ស្នង​តំណែង​ពី​ឳពុក​នា​ដំណាច់ឆ្នាំ ២០១១ មនុស្សខ្លាំង​កូរ៉េខាងជើង​វ័យ​៣០ឆ្នាំ​ប្លាយ​មិន​ដែល​បាន​ចាកចេញ​ពី​ប្រទេស​ទេ សូម្បី​តែ​ចិន​ដែល​ជា​ប្រទេស​ជិតខាង ជា​សម្ព័ន្ធមិត្ត​ចាក់​ទឹកមិន​លេចនិង​ជា​ខ្នងបង្អែក​សេដ្ឋកិច្ច​ដ៏​ធំ​ក៏​លោក​គីម ជុងអ៊ុន​មិន​ដែល​ដាក់​ជើង​ជាន់​ដែរ។ ខុស​ពី​លោក​គីម ជុងអ៊ីល​ដែល​ជា​ឳពុក​បាន​ធ្វើ​ដំណើ​ទៅ​កាន់​ប្រទេស​ចិន​ដល់​ទៅ​២ដង​ក្នុង​ឆ្នាំ ២០១០។ អ្វី​ដែល​បាន​ធ្វើ​ឲ្យ​គ្រប់​គ្នា​ឆ្ងល់​កាន់​តែ​ខ្លាំង​ទៀត​នោះ គឺ​អវត្តមាន​របស់​លោក​គីម ជុងអ៊ុន​នៅ​ក្នុង​ពិធី​ចូល​កាន់​តំណែង​ប្រធានាធិបតី​ចិន​អាណត្តិ​ទី១ របស់​លោក​ស៊ី ជីនពីង។

តែ​គេ​ត្រូវ​ហ៊ាន​ទទួល​ស្គាល់​ថា បរិបទ និង​កាលៈទេសៈ​ក្នុង​ជំនាន់​ឳពុក និង​កូន គឺ​មិន​ដូច​គ្នា​ទេ រួម​ទាំង​កិរិយាមាយាទ កាយវិការ និង​អកប្បកិរិយា​ផង។ ម្យ៉ាង​ទៀត គេ​ក៏​សង្កេត​ឃើញ​ជា​រួម​ថា ជំហរ​របស់​ចិន​ចំពោះ​កូរ៉េខាងជើង​ក្នុង​ជំនាន់​ឳពុក និង​កូន​ក៏​មិន​ដូច​គ្នា​ដែរ។ នៅ​ក្នុង​ជំនាន់​លោក​គីម ជុងអ៊ុន​សព្វថ្ងៃ ចិន​ហាក់​បាន​ដក​ខ្លួន​បន្តិច​ដោយ​មិន​សូវ​ការពារ​ផ្កាប់​មុខ​ដូច​ជំនាន់​លោក​គីម ជុងអ៊ីល។ ជាក់ស្តែង ទីក្រុង​ប៉េកាំង​បាន​គាំទ្រ​ទណ្ឌកម្ម​អន្តរជាតិ​ប្រឆាំង​ក្រុង​ព្យុងយ៉ាង​ក្នុង​រឿង​កម្មវិធី​នុយក្លេអ៊ែរ ក៏​ដូច​ជា​ការ​បាញ់​សាកល្បង​គ្រាប់មីស៊ីលបាលីស្ទិក។ លោក​គីម ជុងអ៊ុន​បាន​យល់​ច្បាស់​ណាស់​ចំពោះ​រឿង​នេះ តែ​លោក​គ្មាន​ជម្រើស​អ្វី​ក្រៅ​ពី​បន្ត​ឱបជើង​ចិន​ទេ។

វត្តមាន​ជា​យថាហេតុ​របស់​លោក​គីម ជុងអ៊ុន​នៅ​ចិន​ពេល​នេះ​មិនមែន​ជា​រឿង​ចៃដន្យ​ទេ ព្រោះ​ទី១ ចំ​ពេល​ដែល​លោក​គីម ជុងអ៊ុន​មាន​គម្រោង​ជួប​ជាមួយ​លោក​ប្រធានាធិបតី​កូរ៉េខាងត្បូង​មូន ចៃអ៊ីន​ក្នុង​ខែ​មេសា និង​ទី២ លោក​គីម ជុងអ៊ុន​ក៏​មាន​គម្រោង​ជួប​លោក​ប្រធានាធិបតី​អាមេរិក​ដូណាល់ ត្រាំ​នា​ដំណាច់​ខែ​ឧសភា។ គម្រោង​ជំនួបកំពូល​ទាំង​ពីរ​នេះ គឺ​សំខាន់​ខ្លាំង​ណាស់​សម្រាប់​លោក​គីម ជុងអ៊ុន ព្រោះ​វា​អាច​ជា​ការ​កំណត់​វាសនា​អនាគត​នៅ​ឧបទ្វីបកូរ៉េ និង​ជា​ការ​កំណត់​អនាគត​នៃ​ទំនាក់ទំនង​រវាង​ក្រុង​ព្យុងយ៉ាង និង​ក្រុង​វ៉ាស៊ីនតោន។

លោក​គីម ជុងអ៊ុន​ពិត​ជា​យល់​មិន​ច្រឡំ​ទេ​ថា ដើម្បី​អាច​ឲ្យ​គម្រោង​ជំនួបកំពូល​ទាំង​ពីរ​ប្រព្រឹត្ត​ទៅ​ដោយ​រលូន និង​ជោគជ័យ លោក​ត្រូវ​ការ​សួរ​យោបល់ និង​សុំដំបូលន្មាន​ពី​បងធំ​ចិន​ដោយ​មិន​អាច​មើល​រំលង​បាន។

ចិន​ត្រូវ​បាន​អូស​ចូល​ត្រឡប់​ក្នុង​ឆាក​ការទូត​ឡើង​វិញ

គេ​ត្រូវ​រង់​ចាំ​មើល​ថា តើ​លោក​គីម ជុងអ៊ុន​ពិត​ជា​បាន​ទៅ​ទស្សនកិច្ច​នោ​ចិន​ឬ​អត់ ហើយ​បើ​មាន​មែន តើ​លោក​បាន​ជួប​សន្ទនា​ជាមួយ​ឥស្សរជន​ចិន​ណា​ខ្លះ ពិសេស​តើ​មាន​បាន​ជួប​ពិភាក្សា​ជាមួយ​បុរសខ្លាំង​ចិន​លោក​ស៊ី ជីនពីង​ដែរ ឬ​ទេ។ ប្រសិន​បើ​ព័ត៌មាន​ចចាមអារ៉ាម​មួយ​នេះ​ត្រូវ​បាន​បញ្ជាក់​ជា​ផ្លូវការ​នា​ពេល​ខាង​មុខ នេះ​ពិត​ជា​រឿង​មួយ​ដែល​បាន​ធ្វើ​ឲ្យ​ចិន​សប្បាយ​ចិត្ត​រក​អ្វី​ប្រៀប​ពុំ​បាន។ ចូរ​កុំ​ភ្លេច​ថា គំនិត​ផ្តួចផ្តើម​ឲ្យ​មាន​គម្រោង​ជំនួបកំពូល​រវាង​លោក​គីម ជុងអ៊ុន​ជាមួយ​លោក​ប្រធានាធិបតី​កូរ៉េខាងត្បូង​មូន ចៃអ៊ីន ឬ​មួយ​ក៏​ជាមួយ​លោក​ប្រធានាធិបតី​អាមេរិក​ដូណាល់ ត្រាំ​នា​ពេល​ខាង​មុខ គឺ​ជា​ការ​សម្រេច​ចិត្ត​របស់​លោក​គីម ជុនអ៊ុន​តែ​ឯង​ដោយ​មិន​បាន​ពិភាក្សា សួរយោបល់ ឬ​មួយ​ក៏​ជូន​ដំណឹង​ជា​ផ្លូវការ​ដល់​បងធំ​ចិន​ទេ។

ចិន​ដែល​ជា​សម្ព័ន្ធមិត្ត ជា​អ្នក​ចេញ​មុខ​ការពារ និង​ជា​ខ្នង​បង្អែក​សេដ្ឋកិច្ច​របស់​កូរ៉េខាងជើង​បែរ​ជា​ត្រូវ​បាន​លោក​គីម ជុងអ៊ុន​ទុក​ចោល​មួយ​កន្លែង​ទៅ​វិញ។ អ្វី​ដែល​ចិន​បារម្ភ​ខ្លាំង គឺ​ខ្លាច​តែ​ខ្លួន​ត្រូវ​បាន​គេ​ដាក់​ឲ្យ​នៅ​ក្រៅ​ឆាក​ក្នុង​ពេល​ដែល​លោក​ដូណាល់ ត្រាំ និង​លោក​គីម ជុងអ៊ុន​ល្អូកល្អឺន​ដាក់​គ្នា។ ភាព​ល្អូកល្អឺន​ជា​យថាហេតុ​រវាង​ក្រុង​ព្យុងយ៉ាង និង​ក្រុង​វ៉ាស៊ីតោន​ដែល​អាច​ជះ​ឥទ្ធិពល​អាក្រក់ និង​ធ្វើ​ឲ្យ​ក្រុង​ប៉េកាំង​ខាត​ប្រយោជន៍​ធំធេង​ណាស់​នៅ​ក្នុង​តំបន់។ ដូច្នេះ​សម្រាប់​ចិន ការ​ដែល​លោក​គីម ជុងអ៊ុន​បាន​សុខចិត្ត​មក​រក​ខ្លួន​ពេល​នេះ ជា​សក្ខីកម្ម​មួយ​ដែល​បញ្ជាក់​ពី​វិល​ត្រឡប់​ចូល​ឆាក​ការទូត​របស់​ចិន​នៅ​ក្នុង​ដំណោះស្រាយ​ឲ្យ​វិបត្តិ​នៅ​ឧបទ្វីប​កូរ៉េ៕

ប្រធានាធិបតីកាហ្សាក់ស្ថាន លាលែង​ពី​តំណែង​ ក្រោយ​៣០ឆ្នាំ​នៃ​អំណាច

អ.ស.ប.៖​មាន​មនុស្ស​ជាង ២ ០០០លាននាក់​ក្នុង​លោក​កំពុង​បន្ត​ខ្វះ​ទឹកស្អាត​ប្រើប្រាស់

ទិន្នន័យ​នៃ​ប្រអប់ខ្មៅ​បង្ហាញពី​មូលហេតុ​ស្រដៀងគ្នា​នៃ​ការធ្លាក់យន្តហោះ​របស់​អេត្យូពី​និង​ឥណ្ឌូណេស៊ី​

ហ្វីលីពីន​ជា​​ប្រទេស​ទី២​ដែល​បាន​ដក​សមាជិកភាព​ចេញ​ពី​​តុលាការព្រហ្មទណ្ឌអន្តរជាតិ​ក្រុង​ឡាអេ​

ក្រោយ​ហេតុការណ៍​បាញ់រះ ​​នូវែលសេឡង់ សន្យា​​​ធ្វើ​​កំណែ​ទ​ម្រង់​​ច្បាប់​កាន់​កាប់អាវុធ

ខ្មាន់កាំភ្លើង​បាញ់រះ សម្លាប់​មនុស្ស​៤៩នាក់ នៅ​វិហារអ៊ីស្លាម នៅនូវែលសេឡង់

អាកាសធាតុ៖ អង្គការ​៤ រួមគ្នា​ប្តឹង​រដ្ឋ​បារាំង ពី​ “ភាព​យឺតយ៉ាវ និង​ភាព​អសកម្ម”

Brexit៖​ច្រកចេញ​របស់​អង់គ្លេស​ពី​សហភាពអឺរ៉ុប​កំពុង​បន្ត​ស្រពិចស្រពិល​កាន់​តែ​ខ្លាំង

ប្រធានាធិបតី​អាល់ហ្សេរី​ឈប់​ឈរឈ្មោះ សម្រាប់​អាណត្តិទី ៥ ប៉ុន្តែ ប្រជាជន​នៅតែ​មិនទុកចិត្ត

ប្រទេសមួយ​ចំនួន​ផ្អាក​ប្រើ​យន្តហោះ​Boeing737max ​ក្រោយ​គ្រោះថ្នាក់​នៅ​អេត្យូពី

ខួប៦០ឆ្នាំ​នៃ​បដិវត្ត​ទីបេ ៖ ប៉េកាំង​ថា​សម្តេច​សង្ឃ​ដាឡៃ​ឡាម៉ា គ្មាន​នាំ​ប្រយោជន៍​ឱ្យ​ទីបេ

លោក​ដូណាល់ ត្រាំ ចង់​ទារប្រាក់​ចំណាយ​បន្ថែម ពី​ប្រទេស​ដែល​មាន​មូលដ្ឋាន​ទ័ព​អាមេរិក

បារាំង​ប្រារព្ធ​ទិវាសិទ្ធិនារី៨មីនា ដោយ​ផ្តោត​លើ​​ វិសមភាព​ប្រាក់ខែ

តុលាការ​ធម្មនុញ្ញថៃ​សម្រេច​រំលាយ​គណបក្ស​ថៃរ៉ាក់សាឆាត​ដែលស្និទ្ធនឹង​លោកថាក់ស៊ីន​

កូរ៉េខាងជើងកំពុងសាងសង់​ឡើងវិញ នូវ​ស្ថានីយ៍​បាញ់​រ៉ុកែត​ Sohae

សេដ្ឋកិច្ច និង​សង្គម​ជា​សំណុំរឿង​អាទិភាព​នៃ​សម័យប្រជុំពេញអង្គ​លើកទី១៣ របស់​សភាប្រជាជនចិន

វ៉េណេស៊ុយអេឡា ៖ លោក ហ្កៃដូ ត្រលប់​ចូល​ស្រុកវិញ ជា​ហានិភ័យ ឬ​ជា​ការទម្លាយ​វិបត្តិ ?

សហរដ្ឋអាមេរិក និង​កូរ៉េខាងត្បូង​បញ្ឈប់​សមយុទ្ធ​ប្រចាំឆ្នាំ​​ជា​សម្បទាន​​ឆ្ពោះ​​ទៅ​​រំសាយ​អាវុធនុយក្លេអ៊ែរ​កូរ៉េខាងជើង?

NASA និង SpaceX បាញ់បញ្ជូន​យាន​ Dragon ដោយ​ជោគជ័យ​ទៅកាន់​ស្ថានីយ​អវកាស​អន្តរជាតិ​

កូរ៉េខាង​ជើង​សុំ​បន្តចរចា ទាំង​អះអាង​ថា ខ្លួន​មិន​បាន​សុំឲ្យ​ដក​ទណ្ឌកម្ម​ទាំងស្រុង​ទេ