ប៉េកាំងធ្វើសមយុទ្ធមួយខ្សែថ្មីនៅសមុទ្ទចិនខាងត្បូង
ចិនក្រោមការដឹកនាំរបស់លោកស៊ីជីនពីង មានកម្មវិធីធ្វើទំនើបកម្មវិស័យយោធា យ៉ាងខ្លាំងក្លាណាស់ និងផ្តល់អាទិភាពជាពិសេសទៅវិស័យយោធាជើងអាកាសនិងជើងទឹក។ ថ្ងៃអាទិត្យទី ២៥ មីនា នេះ យោធាជើងអាកាសរបស់កងប្រដាប់អាវុធចិន បានប្រកាសនៅ ថាបានធ្វើសមយុទ្ធមួយខ្សែថ្មីទៀត នៅក្នុងសមុទ្ទចិនខាងត្បូង និងនៅភាគខាងលិចនៃមហាសមុទ្ទប៉ាស៊ីហ្វិក បន្ទាប់ពីបានបញ្ចប់សមយុទ្ធនៅក្នុងនៅច្រកសមុទ្ទមីយ៉ាកូរួច។
ចុះផ្សាយនៅថ្ងៃ៖
ស្តាប់ - ០១:៤២
កាលបរិច្ឆេទពិតប្រាកដនៃការធ្វើសមយុទ្ធនេះ មិនត្រូវបានយោធាជើងអាកាសចិនប្រកាសបញ្ជាក់ឱ្យដឹងទេ។ នៅក្នុងសេចក្តីថ្លែងការណ៍ យោធាអាកាសចិន បានត្រឹមអះអាងថា សមយុទ្ធនេះគឺជាលំហាត់សមត្រៀមធ្វើសង្គ្រាមនាពេលអនាគត និងដើម្បីត្រៀមលក្ខណៈបានប្រសើរឡើងនៅពេលចេញប្រយុទ្ធ។ ចិនត្រូវមានជំហរនិងជាតំណាងកម្លាំងយោធាដ៏សំខាន់អាចគ្រប់គ្រងស្ថានការណ៍បាន និងអាចទប់ទល់រាល់គ្រប់សង្គ្រាម ហើយនឹងត្រូវយកឈ្នះលើគ្រប់សមរភូមិ។ នេះជាខ្លឹមសារលម្អិតបន្ថែមនៅក្នុងសេចក្តីថ្លែងការណ៍។
សម្រាប់ប៉េកាំង ហេតុផលនៃសមយុទ្ធត្រូវបានពន្យល់ជាញឹកញាប់មកហើយ និងក្នុងន័យដដែលៗថា កម្មវត្ថុនៃសមយុទ្ធមិនមែនធ្វើឡើងដើម្បីបង្ហាញភាពស្អប់ខ្ពើមប្រឆាំងនឹងប្រទេស ឬអ្នកជិតខាងណាម្នាក់ឡើយ។ ប៉ុន្តែជម្រើសធ្វើលំហាត់យោធា នៅក្នុងសមុទ្ទចិនខាងត្បូង និងជុំវិញកោះតៃវ៉ាន់ បានធ្វើប្រទេសជិតខាងជាប់ជម្លោះ និងសហរដ្ឋអាមេរិក នៅមិនស្រណុកឡើយ។
ចិនតែងតែអះអាង និងទាមទារគ្រប់គ្រងតែម្នាក់ឯងមួយធំនៃសមុទ្ទចិនខាងត្បូង ដែលជាច្រកពាណិជ្ជកម្មផ្លូវទឹកដ៏សំខាន់ ព្រមទាំងមានសម្បត្តិធម្មជាតិក្រោមទឹកយ៉ាងសម្បូរបែប ដូចជាប្រេងនិងឧស្ម័នជាដើម។ ការទាមទារនេះបានបង្កឱ្យប្រទេសជិតខាងជាប់ជម្លោះក្នុងសមុទ្ទចិនខាងត្បូង ដូចយ៉ាង ហ្វីលីពីន និងម៉ាឡេស៊ីជាដើម ក្តៅក្រហាយយ៉ាងខ្លាំង។ ចំណែកអាមេរិក ដែលចាត់ទុកមហិច្ឆតានៅសមុទ្ទចិនខាងត្បូង ថាជាដើមហេតុបង្កឱ្យមានភាពតានតឹងក្នុងតំបន់ ក៏បានចេញមុខធ្វើសកម្មភាពការពារក្រោមហេតុផលការពារសេរីភាពនៃចរាចរណ៍ផ្លូវសមុទ្ទអន្តរជាតិ។
កាលពីថ្ងៃសុក្រ នាវាចម្បាំងអាមេរិកមួយគ្រឿង បានបង្ហាញខ្លួនយ៉ាងកៀកកើយបំផុត ទៅនឹងកោះសម្បនិម្មិតមួយរបស់ចិន ក្នុងក្របខ័ណ្ឌនៃប្រតិបត្តិការដែលមានឈ្មោះថា សេរីភាពនៃចរាចរណ៍ផ្លូវទឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ