ចិនបានទាមទារឲ្យអាមេរិកកែកំហុសរបស់ខ្លួនស្តីពីកោះតៃវ៉ាន់
ប្រទេសចិនបានទាមទារឲ្យអាមេរិកកែកំហុសរបស់ខ្លួនទាក់ទងនឹងកោះតៃវ៉ាន់។ សំណើទាមទារនេះត្រូវបានធ្វើឡើងដោយក្រសួងការបរទេសចិនតាមរយៈសេចក្តីប្រកាសព័ត៌មានមួយចេញផ្សាយនាថ្ងៃសៅរ៍ ទី១៧ មីនា។ អ្វីដែលទីក្រុងប៉េកាំងចង់បាន គឺសុំឲ្យទីក្រុងវ៉ាស៊ីតោនដកច្បាប់ « Taiwan Travel Act » ដែលលោកប្រធានាធិបតីអាមេរិកដូណាល់ ត្រាំទើបបានអនុម័តឲ្យប្រើប្រាស់។ សម្រាប់ប៉េកាំង ច្បាប់មួយនេះបានរំលោភបំពានលើគោលការណ៍ចិនតែមួយ។
ចុះផ្សាយនៅថ្ងៃ៖
ស្តាប់ - ០១:១១
ច្បាប់ « Taiwan Travel Act » ដែលបានអនុម័តដោយសភា និងព្រឹទ្ធសភាអាមេរិកមានកម្មវត្ថុពង្រឹងទំនាក់ទំនងរវាងអាមេរិក និងតៃវ៉ាន់ដោយលើកទឹកចិត្តថ្នាក់នាំអាមេរិកឲ្យធ្វើដំណើរទៅតៃវ៉ាន់ដើម្បីជួបសមភាគីតៃវ៉ាន់។ តែចិនតាមរយៈសេចក្តីប្រកាសព័ត៌មានរបស់អ្នកនាំពាក្យក្រសួងការបរទេសលោកលូ កាងបានប្រឆាំងលើច្បាប់នោះយ៉ាងដាច់អហង្ការ និងបានចាត់ទុកច្បាប់នោះថា ជាការរំលោភបំពានលើគោលការណ៍ចិនតែមួយ និងជាការផ្តល់សញ្ញាអាក្រក់ដល់ក្រុមអ្នកទាមទារផ្តាច់ទឹកដីនិយមនៅតៃវ៉ាន់។
« យើងស្នើឲ្យអាមេរិកកែកំហុសឆ្គងរបស់ខ្លួន និងបញ្ឈប់រាល់ទំនាក់ទំនងផ្លូវការជាមួយតែវ៉ាន់ទោះក្រោមរូបភាពណាក៏ដោយ » នេះជាការបញ្ជាក់បន្ថែមរបស់លោកលូ កាងនៅក្នុងសេចក្តីប្រកាសព័ត៌មាន។ ការអំពាវនាវដូចគ្នានេះក៏មានពីក្រសួងការពារជាតិចិនតាមរយៈសេចក្តីប្រកាសព័ត៌មាន និងបានយល់ឃើញថា ច្បាប់ « Taiwan Travel Act » របស់អាមេរិកជាការលូកដៃចូលជ្រៀតជ្រែកកិច្ចការផ្ទៃក្នុងរបស់ប្រទេសចិន។ ទន្ទឹមគ្នានេះ ក្រសួងការពារជាតិចិនក៏ស្នើអាមេរិកឲ្យឈប់លក់អាវុធឲ្យតៃវ៉ាន់ដើម្បីចៀសវាងការធ្លាក់ចុះនៃទំនាក់ទំនងយោធារវាងចិន និងអាមេរិក។
គួររម្លឹកជូនថា អាមេរិកគ្មានទំនាក់ទំនងការទូតជាមួយតៃវ៉ាន់ទេ តែអាមេរិកបានបន្តរក្សាទំនាក់ទំនងពាណិជ្ជកម្ម និងការបន្តលក់អាវុធឲ្យតៃវ៉ាន់។ ក្រោយការជាប់ឆ្នោតជាប្រធានាធិបតីអាមេរិក លោកដូណាល់ ត្រាំបានយល់ព្រមទទួលទូរស័ព្ទសាទរពីលោកស្រីប្រធានាធិបតីតៃវ៉ាន់ ហើយនារដូវក្តៅឆ្នាំ ២០១៧ លោកត្រាំបានយល់ព្រមលក់អាវុធឲ្យតៃវ៉ាន់ក្នុងទឹកប្រាក់ ១ ៣០០លានដុល្លារ។ សម្រាប់ចិន កោះតៃវ៉ាន់ដែលបានផ្តាច់ខ្លួនចេញពីចិនក្រោយសង្រ្គាមស៊ីវិលឆ្នាំ ១៩៤៩ នៅជាដែនដីរបស់ខ្លួន និងបានព្រមានថា នឹងប្រើកម្លាំងបាយវាយប្រហារបើតៃវ៉ាន់ហ៊ានប្រកាសឯករាជ្យនៅថ្ងៃណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ