អូស្រ្តាលី៖ជនជាតិអាហ្វ្រិកខាងត្បូង ស្បែកសក្តិសមនឹងទទួលបានទិដ្ឋាការពិសេស
រដ្ឋាភិបាលអភិរក្សនិយមរបស់អូស្ត្រាលីគ្រោងនឹង ផ្តល់ទិដ្ឋាការពិសេសដល់កសិករស្បែកស អាហ្វ្រិកខាងត្បូង ដែលកំពុងរងការធ្វើទុក្ខបុកម្នេញ នៅអាហ្វ្រិកខាងត្បូង។ រដ្ឋមន្រ្តីក្រសួងមហាផ្ទៃអូស្ត្រាលី លោកPeter Dutton បាននិយាយនៅថ្ងៃព្រហស្បតិ៍នេះថា ក្រសួងកំពុងពិចារណា លើការបង្កើតទិដ្ឋាការពិសេស សម្រាប់ជនជាតិអាហ្វ្រិកខាងត្បូង ស្បែកស ដែលចង់រត់គេចខ្លួនពីការធ្វើបាប នៅអាហ្វ្រិកខាងត្បូង និងដែលចង់ស្វែងរកជំរកថ្មី នៅក្នុងទឹកដីស៊ីវិល័យ ដូចជាអូស្ត្រាលី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
រដ្ឋមន្រ្តី ក្រសួងមហាផ្ទៃអូស្ត្រាលី លោកPeter Dutton បាននិយាយថា ជនជាតិអាហ្វ្រិកខាងត្បូង ស្បែកស សក្តិសមនឹងទទួលឲ្យរស់នៅអូស្ត្រាលី តាមរយៈ ទិដ្ឋាការពិសេស ដែលរដ្ឋាភិបាលធ្លាប់ផ្តល់ទៅឲ្យជនភៀសខ្លួន ឬទៅក្រុមមនុស្សដែលរងការធ្វើទុក្ខបុកម្នេញ ដោយប្រការណាមួយ នៅក្នុងប្រទេសកំណើតរបស់ខ្លួន។ តើអូស្ត្រាលីកំពុងរើសអើង និងជ្រើសរើសក្រុមជនភៀសខ្លួន? អូស្ត្រាលីធ្លាប់ បាន បដិសេធដាច់ណាត់ មិនទទួលជនភៀសខ្លួនមកពី អាស៊ី និងដើមបូព៌ា។ ពួកគេទាំងនោះ រាប់ពាន់នាក់ ដែលធ្វើដំណើរតាមទូកសំដៅ អូស្ត្រាលី ត្រូវបានអាជ្ញាធរអូស្ត្រាលី ចាប់បញ្ជូន យកទៅដាក់ ក្នុងជំរំភៀសខ្លួន នៅទឹកដីបរទេស ក្រៅទឹកដីអូស្ត្រាលី។
សូមអាន៖អង្គការAmnesty និង HRW ដៀលយុទ្ធសាស្ត្រឃុំជនភៀសខ្លួនរបស់អូស្ត្រាលី
ក្នុងករណីជនជាតិស្បែកស នៅអាហ្វ្រិកខាងត្បូង រដ្ឋមន្រ្តីក្រសួងមហាផ្ទៃ បាននិយាយយោងដល់ព័ត៌មានរបស់កាសែតដែលថា សហគមន៍ស្បែកស នៅក្នុងទឹកដីអាហ្វ្រិកខាងត្បូង កំពុងខាតបង់ រងគ្រោះ ដោយសារការដកហូតដីធ្លី ដោយខុសច្បាប់ ហើយនិងអំពើហិង្សាលើរូបរាងកាយ។ សម្រាប់រដ្ឋមន្រ្តីក្រសួងមហាផ្ទៃ និងអន្តោប្រវេសន៍អូស្ត្រាលី ជនជាតិអាហ្វ្រិកខាត្បូង ស្បែកសប្រឹងធ្វើការធ្ងន់ ដែលសក្តិសមនឹងទទួលបានជំនួយពិសេស ពីប្រទេសដែលមានអរិយធម៌ខ្ពស់ដូចជាអូស្ត្រាលី។
អ្នកនាំពាក្យរបស់រដ្ឋាភិបាលអាហ្វ្រិកខាងត្បូង នៅថ្ងៃព្រហស្បតិ៍នេះវិញ បានបដិសេធថា គ្មានការធ្វើទុក្ខបុកម្នេញ លើជនជាតិ ស្បែកស នៅអាហ្វ្រិកខាងត្បូងនោះទេ។
នៅ សប្តាហ៍មុននេះ លោកស៊ីរីល រ៉ាម៉ាហ្វូហ្សា ដែលបានចូលកាន់តំណែងជាប្រធានាធិបតី ថ្មីរបស់អាហ្វ្រិកខាងត្បូង កាលពីខែកុម្ភៈ បានសន្យា កែកំហុសអតីតកាល ដែលអយុត្តិធម៌ សម្រាប់ជនជាតិស្បែកខ្មៅនៅអាហ្វ្រិកខាងត្បូង។ លោកបានប្រកាសធ្វើកំណែទម្រង់ លើការគ្រប់គ្រងដីធ្លី តាមរយៈ ការចែករំលែកដីមួយចំនួនរបស់សហគមន៍អ្នកមាន ស្បែកស ទៅឲ្យជនជាតិអាហ្វ្រិកខាងត្បូង ស្បែកខ្មៅ ដែលក្រីក្រ។ តាមជំរឿនរបស់រដ្ឋាភិបាលអាហ្វ្រិកខាងត្បូង ដីកសិកម្មប្រមាណ៧០ភាគរយ ស្ថិតក្នុងដៃគ្រប់គ្រងរបស់ជនជាតិស្បែកស ចំណែកជនជាតិអាហ្វ្រិកខាងត្បូង ស្បែកខ្មៅ កាន់កាប់តែ៤ភាគរយប៉ុណ្ណោះនៃដីកសិកម្មអាហ្វ្រិកខាងត្បូង។ គណបក្សកាន់អំណាច អាហ្វ្រិកខាងត្បូងវិញ គាំទ្រ ចំណាត់ការដកហូតដីធ្លីពីសហគមន៍ស្បែកស ដោយគ្មានការបង់សងជម្ងឺចិត្ត។
សម្រាប់ អនុប្រធានប្រតិបត្តិវេទិកាជនជាតិអាហ្រ្វិក ដែលតំណាងឲ្យសហគមន៍ស្បែកស នៅអាហ្វ្រិកខាងត្បូង ជំហររបស់រដ្ឋាភិបាលអូស្ត្រាលី ដែលចង់ផ្តល់ទិដ្ឋាការពិសេស ដល់ជនជាតិអាហ្វ្រិកខាងត្បូងស្បែកស នឹងអាចជាសញ្ញា ដាស់តឿន រដ្ឋាភិបាលអាហ្វ្រិកខាងត្បូង ឲ្យពិចារណាឲ្យបានល្អិតល្អន់ ពីការខាតបង់ផ្នែកសេដ្ឋកិច្ច បើសិនរដ្ឋាភិបាលបែរខ្នង រំលោភសិទ្ធិគ្រប់គ្រងដីធ្លី របស់ជនជាតិរបស់ខ្លួន ប៉ុន្តែ ស្បែកស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ