ឥណ្ឌារៀបចំជំនួបកំពូលនៃសម្ព័ន្ធព្រះអាទិត្យអន្តរជាតិ
ផ្តួចផ្តើមគំនិតដោយបារាំង និងឥណ្ឌានៅក្រោយកិច្ចព្រមព្រៀងក្រុងប៉ារីស ស្តីពីអាកាសធាតុ នៅ ឆ្នាំ ២០១៥ ជំនួបកំពូល នៃសម្ព័ន្ធព្រះអាទិត្យអន្តរជាតិ ត្រូវបើកធ្វើជាលើកទី១ នៅទីក្រុងញូវដេលី នៅថ្ងៃអាទិត្យទី១១មីនានេះ។ ប្រធានាធិបតី បារាំងលោកអេម៉ានុយអែល ម៉ាក្រុង នឹងទៅចូលរួមបើកជំនួបកំពូល មុននឹងបញ្ចប់ទស្សនកិច្ចបីថ្ងៃរបស់លោក នៅប្រទេសឥណ្ឌា នៅថ្ងៃ ចន្ទស្អែក។
ចុះផ្សាយនៅថ្ងៃ៖
សម្ព័ន្ធព្រះអាទិត្យអន្តរជាតិមានគោលដៅប្រមូលផ្តុំប្រទេស១២១ ដែលស្ថិតនៅមិនឆ្ងាយប៉ុន្មានពីខ្សែបន្ទាត់អេក្វាទ័រ។ ក្នុងចំណោមប្រទេស ៦០ដែលបានចុះហត្ថលេខាលើកិច្ចព្រមព្រៀង មានពាក់កណ្តាលដែលបានផ្តល់សច្ចាប័ន ចូលជាសមាជិករបស់សម្ព័ន្ធព្រះអាទិត្យអន្តរជាតិ។
ផ្តួចផ្តើមគំនិតដោយបារាំង និងឥណ្ឌា សម្ព័ន្ធព្រះអាទិត្យអន្តរជាតិ បានកើតចេញជារូបរាងឡើង ដោយសារតែ គេកត់សំគាល់ឃើញថា បណ្តាប្រទេសដែលនៅក្បែរខ្សែបន្ទាត់អេក្វាទ័រ ដែលទទួលពន្លឺព្រះអាទិត្យដល់ទៅ ៣០០ថ្ងៃក្នុងមួយឆ្នាំ គ្មានជំនាញ មធ្យោបាយហិរញ្ញវត្ថុ និងបច្ចេកវិទ្យា ដើម្បីទាញយកប្រយោជន៍ពីកំដៅព្រះអាទិត្យ។ ជាពិសេសទៅទៀត ប្រជាជនរបស់ប្រទេសទាំងនោះ ពី២០ ទៅ៥០ភាគរយ គ្មានបានទទួលប្រើប្រាស់ ភ្លើងអគ្គិសនី។
ទិសដៅរបស់សម្ព័ន្ធព្រះអាទិត្យអន្តរជាតិគឺជួយប្រទេសក្រីក្រ និងកំពុងអភិវឌ្ឍឲ្យមានឧបករណ៍ស្រូបកំដៅព្រះអាទិត្យ ដើម្បីយកទៅធ្វើជាថាមពលអគ្គសនី។ ឧបសគ្គសំខាន់នៃការដំឡើងផ្ទាំងស្រូបកំដៅព្រះអាទិត្យ គឺថវិកា និងការវិនិយោគ។ សម្ព័ន្ធព្រះអាទិត្យ សង្ឃឹមថា នឹងអាចប្រមូល រៃអង្គាសថវិកា ១០០០ ពាន់លានដុល្លារ ពីពេលនេះ ដល់ឆ្នាំ ២០៣០។ ក្រុមហ៊ុនវិនិយោគឯកជន ហើយនិងស្ថាប័នហិរញ្ញវត្ថុ ដូចជាទីភ្នាក់ងារបារាំង ដើម្បីអភិវឌ្ឍ ឬធនាគារពិភពលោកជាដើម នឹងដើរតួជាដៃគូសំខាន់សម្រាប់គម្រោងធ្វើអាជីវកម្ម លើថាមពលដែលបានមកពីផ្ទាំងស្រូបកំដៅព្រះអាទិត្យ។ គេរំពឹងថា ក្នុងរយៈពេល ៥ឆ្នាំ ទៅមុខ គេត្រូវបណ្តុះបណ្តាលយុវជនជំនាញប្រមាណ ១សែននាក់ ដើម្បីអាចមានសមត្ថភាពដំឡើង និងថែទាំផ្ទាំងស្រូបកំដៅព្រះអាទិត្យ។
សូមអាន៖ ឥណ្ឌាអភិវឌ្ឍន៍ថាមពលព្រះអាទិត្យ តែមិនបោះបង់ថាមពលធ្យូងថ្ម
ឥណ្ឌាដែលជាប្រទេសធំទី៣ខាងបញ្ចេញឧស្ម័នផ្ទះកញ្ចក់ ប្តេជ្ញាចិត្តចង់ចាប់យកថាមពលបានមកពីព្រះអាទិត្យ សម្រាប់តម្រូវការសេដ្ឋកិច្ច ដែលរហូតមកដល់សព្វថ្ងៃ ពឹងផ្អែកខ្លាំងទៅលើថាមពលបានមកពីធ្យូងថ្ម។ រដ្ឋាភិបាលឥណ្ឌារបស់លោកណារិនដ្រា ម៉ូឌី ចង់បង្កើនការផលិតថាមពលបានមកពីកំដៅព្រះអាទិត្យ ពី១៣ ទៅដល់១០០ជីហ្គាវ៉ាត នៅឆ្នាំ ២០២២។ ផែនការរបស់លោកបានបង្កឲ្យមានការព្រួយបារម្ភព្រោះថា ជាជាងដំឡើងនៅតាមភូមិ ទីជនបទ ជាលក្ខណៈតូចៗ លោកម៉ូឌីចង់បង្កើតឧទ្យានផ្ទាំងស្រូបកំដៅព្រះអាទិត្យ។ គេបារម្ភថា ការប្រមូលផ្តុំផ្ទាំងកញ្ចក់ស្រូបកំដៅព្រះអាទិត្យ ដែលត្រូវការទឹកច្រើន នឹងប៉ះពាល់ធ្វើឲ្យស្រទាប់ទឹកក្រោមដីត្រូវខះ ដោយសារតែឧទ្យានផ្ទាំងស្រូបកំដៅព្រះអាទិត្យ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ