rfi

កំពុងផ្សាយ
  • ផ្សាយផ្ទាល់
  • នាទីព័ត៌មាន
  • RFI ជាភាសាបារាំង
ព្រឹត្តិការណ៍អន្តរជាតិប្រចាំថ្ងៃ
rss itunes

បារាំង​ចុះកិច្ច​ព្រមព្រៀង អនុញ្ញាត​ឲ្យ​ឥណ្ឌា ប្រើ​មូលដ្ឋានទ័ព​បារាំង នៅ​មហាសមុទ្រ​ឥណ្ឌា

ដោយ ឈាង បុប្ផា

កិច្ចព្រមព្រៀង និង​កិច្ចសន្យា​វិនិយោគ​ចំនួន ២០ ដែល​មាន​តម្លៃ ១៣​ពាន់​លាន​អឺរ៉ូ ត្រូវ​បាន​ចុះហត្ថលេខា នៅថ្ងៃ​សៅរ៍នេះ នៅក្នុងអំឡុង​ទស្សនកិច្ច​របស់​ប្រធានាធិបតី បារាំង លោក​អេម៉ានុយអែល ម៉ាក្រុង បារាំង នៅ​ប្រទេស​ឥណ្ឌា។ នៅ​ក្រោយ​ការទទួល​យ៉ាងរាក់ទាក់​ពី លោក​នាយករដ្ឋមន្រ្តី ឥណ្ឌា ណារិនដ្រា ម៉ូឌី នៅទីក្រុង​ញូវដេលី លោក​ប្រធានាធិបតី​បារាំង បាន​ចុះ​ហត្ថលេខា លើ​កិច្ចព្រមព្រៀង ពង្រឹង​ការសហការ​យោធា ឥណ្ឌា និង​បារាំង នៅ មមហាសមុទ្រ​ឥណ្ឌា។

 

នៅក្នុង​សន្និសីទ​កាសែត​ជាមួយ​នាយករដ្ឋមន្រ្តី​ឥណ្ឌា ណារិនដ្រា ម៉ូឌី នៅ​ថ្ងៃ​ដំបូង នៃ​ទស្សនកិច្ច​ផ្លូវរដ្ឋ នៅ​ប្រទេស​ឥណ្ឌា លោកប្រធានាធិបតី បារាំង​បាន​ប្រកាស​ ថា លោក​ចង់​ឲ្យ​បារាំង ក្លាយ​ជា​ប្រទេស​ដៃគូ ល្អជាងគេ​របស់​ឥណ្ឌា នៅ​សហភាព​អឺរ៉ុប។ នៅ​មុន​ធ្វើ​ដំណើរ​ទៅ​ប្រទេស​ឥណ្ឌា នៅថ្ងៃ​សុក្រ​ម្សិលមិញ ប្រមុខរដ្ឋ​បារាំង បាន​និយាយ​ប្រាប់​ទស្សនាវដ្តី​ឥណ្ឌា India Today លោក​ចង់​បាន​ឥណ្ឌា​ជា​ប្រទេស​ដៃគូ​យុទ្ធសាស្រ្ត​សំខាន់​ជាងគេ​របស់​បារាំង នៅ​អាស៊ី។ ប្រធានាធិបតី​បារាំង ដែល​ឆ្លៀតពេល​ដែល​អង់គ្លេស ដើរចេញ​ពី​សហភាព​អឺរ៉ុប ចង់ឲ្យ​បារាំង​ជំនួស​កន្លែង របស់​អង់គ្លេស និង​រុស្ស៊ី ក្នុង​នាម​ជា​ប្រទេស​ដៃគូ​សំខាន់​របស់​ឥណ្ឌា។

នៅ​ខែ​មករា លោក​ប្រធានាធិបតី​បារាំង​បាន​ធ្វើ​ទស្សនកិច្ច​ទៅ​ប្រទេស​ចិន មហាអំណាច​សេដ្ឋកិច្ច​ទី​២ និង​ប្រទេស​ដែល​មាន​ប្រជាជន​ច្រើន​ជាងគេ​លើ​លោក។ លោក​អេម៉ានុយអែល ម៉ាក្រុង​បានជ្រើសរើស​ឥណ្ឌា បន្ទាប់​ពី​ចិន ដើម្បី​ទៅធ្វើ​ទស្សនកិច្ច​ផ្លូវរដ្ឋ។ បើ​និយាយ​ពី​សេដ្ឋកិច្ច ឥណ្ឌា មិនមែន​ជាដៃគូ នាំមុខ​របស់​បារាំង នោះទេ។ ការដោះដូរ​ពាណិជ្ជកម្ម​រវាង​បារាំង និង​ចិន មានទំហំ ទឹកប្រាក់​ច្រើន​ជាង​ការដោះដូរ​ពាណិជ្ជកម្ម​បារាំង និង​ឥណ្ឌា​ឆ្ងាយ​ណាស់។ ប៉ុន្តែ លោក​ប្រធានាធិបតី​បារាំង លោក​ចង់​បាន​ឥណ្ឌា ជា​ប្រទេស​ដៃគូ​សំខាន់ របស់​បារាំង នៅ​អាស៊ី។ លោក​ម៉ាក្រុង​ចង់​សំដៅ​ ទៅដល់​ការសហការ ចាប់​ដៃគូ​រវាង​ប្រទេស​ទាំងពីរ នៅក្នុង​វិស័យ ការពារ សន្តិសុខ​ទៅវិញទេ។

ចូរកុំភ្លេចថា ទំនាក់ទំនង​បារាំង ឥណ្ឌា គឺ​បោះជំហាន​ទៅមុខ ច្រើន ក្នុង​វិស័យ​ការពារ​សន្តិសុខ​នេះឯង។ បារាំង រហូតមក​បាន​ទៅ​ចែចង់ លក់​សព្វាវុធ​របស់ខ្លួន ដល់​ឥណ្ឌា ដែល​ជាប្រទេស​ទិញ នាំចូល​អាវុធ​ច្រើន​ជាងគេ​នៅក្នុង​លោក។ នៅ​ឆ្នាំ ២០១៦ ឥណ្ឌា បាន​ចុះ​កិច្ចសន្យា​ទិញ យន្តហោះ​ចម្បាំង​Rafale ដ៏​ល្បី​ឈ្មោះ​របស់​បារាំង ៣៦​គ្រឿង ហើយ​និង​នាវាមុជទឹក​៦​គ្រឿង ដែល​ដើរ​ដោយ​ថាមពល​នុយក្លេអ៊ែរ។ តាមរយៈ​ទស្សនកិច្ច​របស់​លោក​ម៉ាក្រុងទៅ ឥណ្ឌា​លើកនេះ រដ្ឋាភិបាល​បារាំង​សង្ឃឹម​នឹង​បញ្ចុះបញ្ចូល​ឲ្យ​ឥណ្ឌា​ទិញបន្ថែម​ទៀត ឧទ្ធម្ភាគចក្រ​ចម្បាំង និង​នាវាមុជទឹក​ជាច្រើន​គ្រឿងទៀត។

បារាំង​នឹង​អនុញ្ញាត​ឲ្យ​នាវាចម្បាំង​ឥណ្ឌា​ចូលប្រើ​មូលដ្ឋាន​ទ័ព​របស់​បារាំង នៅ កោះ​Réunion របស់​បារាំង

បារាំង​ទោះ​ជា​ជាប់​ចំណាត់ថ្នាក់ ជា​ប្រទេស​មហាអំណាច​សេដ្ឋកិច្ច នៅក្រោយ​ឥណ្ឌា​ទៅទៀតនោះ ប៉ុន្តែ បារាំង ត្រូវ​បាន​ឥណ្ឌា របស់​លោក​នាយករដ្ឋមន្រ្តី​ណារិនដ្រា ម៉ូឌី ចាត់ទុកជា​ប្រទេស​ដៃគូ​យុទ្ធសាស្រ្ត​យោធា​ដ៏សំខាន់​របស់​ឥណ្ឌា នៅ​មហាសមុទ្រ​ឥណ្ឌា។

នៅថ្ងៃ​សៅរ៍នេះ បារាំង និង​ឥណ្ឌា​សម្រេច​ចុះបាន​កិច្ចព្រមព្រៀង ដើម្បី​ពង្រឹង​ការសហការ​រវាង​ប្រទេស​ទាំងពីរ​នៅក្នុង​មហាសមុទ្រ​ឥណ្ឌា។ ទៅតាម​កិច្ចព្រមព្រៀង ដែល​ចុះ​ហត្ថលេខា​ដោយ​ប្រធានាធិបតី​បារាំង និង​នាយក​រដ្ឋមន្រ្តី ឥណ្ឌា ប្រទេស​ទាំងពីរ​យល់ព្រម​បើក​មូលដ្ឋាន​ទ័ព ឲ្យ​កប៉ាល់ចម្បាំង ឥណ្ឌា និង​បារាំង អាច​ចូលចត បាន​គ្រប់ពេល។

នៅស្ថានភាព​ជាក់ស្តែង ឥណ្ឌា នឹង​អាច​ចូល​ទៅប្រើ​មូលដ្ឋានទ័ព​របស់​បារាំង ដែល​មាន​នៅ​កោះ​Réunion ឬ​មូលដ្ឋាន​ទ័ព បារាំង នៅ​ប្រទេស​ជីប៊ូទី។ អ្នកជំនាញ​ជាច្រើន​វាយតម្លៃថា ដោយ​ចូល​ប្រើ​មូលដ្ឋានទ័ព​របស់​បារាំង នៅ​មហាសមុទ្រ​ឥណ្ឌាំ ឥណ្ឌា​ចង់​បង្កើន​វត្តមាន​នាវា​ចម្បាំង របស់ខ្លួន ដើម្បីប្រឈម​ទប់ទល់​នឹង​ការពង្រីកឥទ្ធិពល​យោធា​របស់​ចិន នៅ​មហាសមុទ្រ​ឥណ្ឌា និង​នៅ​សមុទ្រ​ចិន​ខាងត្បូង។

នៅពេល​ចូលកាន់តំណែង​ជា​នាយករដ្ឋមន្រ្តី​ឥណ្ឌា លោក​ណារិនដ្រា ម៉ូឌី បាន​និយាយ​ថា ការពង្រីក​ឥទ្ធិពល​របស់​ឥណ្ឌា នៅ​ក្នុង​តំបន់​ជិតខាង​របស់​ឥណ្ឌា គឺ​ជា​អាទិភាព​របស់​រដ្ឋាភិបាល​របស់លោក។ ការបើកភ្លើងខៀវ ពី​ប្រធានាធិបតី បារាំង ដើម្បី ឲ្យ​នាវាចម្បាំង​ឥណ្ឌា បាន​ចូលចត នៅ​មូលដ្ឋាន​ទ័ព​បារាំង គឺ​ប្រៀប​បាន​នឹង​អំណោយ​ដ៏ថ្លៃថ្លា សម្រាប់​លោកនាយករដ្ឋមន្រ្តី​ម៉ូឌី ដែល​កំពុង​សំលឹង​ចង់​កាន់​តំណែង​ជា​នាយករដ្ឋមន្រ្តី​ឥណ្ឌា​មួយ​អាណត្តិ​បន្តទៀត។ អ្នកវិភាគ​នយោបាយ​ឥណ្ឌា​មួយចំនួន​និយាយថា ជាមួយ នឹង​ដំណឹង​វិជ្ជមាន​នៅក្នុង​អំឡុង​ទស្សនកិច្ច​របស់​លោកប្រធានាធិបតី បារាំង លោក​ម៉ូឌី ដែល​ត្រូវ​បញ្ចប់​អាណត្តិ​នៅ​ឆ្នាំ ២០១៩ អាច​នឹង​មាន​អំណះអំណាង​ច្រើន ដើម្បី​ការពារ​នយោបាយ​ជាតិនិយម​របស់លោក នៅក្នុង​អំឡុង​ឃោសនា​បោះឆ្នោត។ ដើម្បី​កុំ​ឲ្យ​អ្នកបោះឆ្នោត​ឥណ្ឌា ភ្លេច​ពីដំណឹង​ល្អនេះ លោក​ណារិនដ្រា ម៉ូឌី អាច​ប្រកាស​រំលាយ​សភា ដើម្បី​បោះឆ្នោត​មុន​កាលកំណត់​ក៏​អាច​ថាបាន។

បារាំង​ចង់ចែចង់​លក់​បច្ចេកវិទ្យា ថាមពល​នុយក្លេអ៊ែរ ដល់​ឥណ្ឌា

បារាំង​ចង់​ជំរុញ​ការចរចា​លក់​សព្វាវុធ​បន្ថែម ដល់​ប្រទេស​ឥណ្ឌា ប៉ុន្តែ វិមាន​ប្រធានាធិបតី​បារាំង មិន​បាន​លើកឡើង​ពី​កិច្ចសន្យា​លក់​សព្វាវុធ នៅក្នុង​ដំណើរ​ទស្សនកិច្ច​របស់លោក​ម៉ាក្រុង ទៅ​ឥណ្ឌា​នោះទេ។ កិច្ចសន្យា និង​កិច្ចព្រមព្រៀង ចំនួន ២០ ដែល​មាន​តម្លៃ ១៣ពាន់​លាន​អឺរ៉ូ ដែល​បារាំង និង​ឥណ្ឌា​បាន​ចុះជាមួយគ្នា នៅថ្ងៃ សៅរ៍​នេះ ភាគច្រើន​គឺ​ផ្តោតលើ​វិស័យ​ថាមពល ហេដ្ឋារចនាសម្ព័ន្ធ ហើយ​និង​បច្ចេកវិទ្យា។ នៅ​ឥណ្ឌា បារាំង​មិន​សង្ឃឹម​ផ្តោតសំខាន់​តែ​លើការលក់​អាវុធ​ឲ្យ​ឥណ្ឌានោះទេ។

ឥណ្ឌា ដែល​មាន​ប្រជាជន ១ពាន់ ២រយលាននាក់ ជាប្រទេស​ដែល​កំពុង​អភិវឌ្ឍ ជា​ទីផ្សារ​ដ៏សំខាន់ សម្រាប់​ផលិតផល និង​អ្នកវិនិយោគ​របស់​បារាំង។ ឥណ្ឌា​របស់​លោក​ណារិនដ្រា ម៉ូឌី កំពុង​ត្រូវការ​ធនធាន ចំណេះជំនាញ​ធ្វើ និង​បច្ចេកវិទ្យា សម្រាប់​បំពាក់ ហេដ្ឋារចនាសម្ព័ន្ធ ដូចជា​ផ្លូវរទេះភ្លើង ឬ​សម្រាប់ បង្កើន បង្កើត​ថាមពល ដែល​ឥណ្ឌា​ត្រូវការ​សម្រាប់​ជំរុញ​កំណើន​សេដ្ឋកិច្ច​របស់ខ្លួន។ បារាំង មាន​ជំនាញខាង​បង្កើត​រោងចក្រ​អគ្គសនី​ដើរដោយ​ថាមពល​នុយក្លេអ៊ែរ ហើយ​និងថាមពល​ព្រះអាទិត្យ។ ជំនាញ​នេះ ឆ្លើយតប​តែម្តង ទៅ​នឹង​តម្រូវការ​របស់​ឥណ្ឌា។ ឥណ្ឌា ដែល​ជា​ប្រទេស​ធំទី ២ ខាងបញ្ចេញ​ផ្សែងពុល​បរិយាកាស កំពុង​ចង់​ដោះដៃ ពី​ថាមពល​ដើរដោយ​ធ្យូងថ្ម។ ឥណ្ឌា ដែលបាន​ឃើញ​ច្បាស់​ពី​ផលប៉ះពាល់​នៃផ្សែងពុល ហើយ​និង​ការប្រែប្រួល​អាកាសធាតុ​ទៅ​លើ​ដំណាំកសិកម្ម បាន​ប្តេជ្ញាចិត្ត ចូលរួម​ជាមួយ​បារាំង ដើម្បី​ធ្វើ​ជាម្ចាស់ផ្ទះ រៀបចំ​សន្និសីទ ជំនួបកំពូល​ស្តីពី​សម្ព័ន្ធ ដើម្បី​ថាមពល​មិនចេះរីងស្ងួត ដែល​ត្រូវ​បើកធ្វើ នៅ​ថ្ងៃ​អាទិត្យ៕

 

វិបត្តិជនភៀសខ្លួន៖ ប្រទេស​អឺរ៉ុប​ប្រជុំ​បន្ទាន់ បើ​ទោះ​បី​គ្មាន​សង្ឃឹម​ថា​មាន​ដំណោះស្រាយ​រួម

គោលដៅ​នៃ​ទស្សនកិច្ច​​រយៈពេល​ ៤ថ្ងៃ​របស់​ប្រមុខ​រដ្ឋាភិបាល​បារាំង​នៅ​ក្នុង​ប្រទេស​ចិន

កិច្ចប្រជុំOPEC៖ ប្រទេស​ផលិតប្រេង​បន្ត​ខ្វែងគំនិត​គ្នា ពីរឿង​បង្កើន​ការផលិតប្រេង

ទំហំ​ព្រៃ​ធម្មជាតិ​ទូទាំង​​ពិភពលោក កាន់តែ​​​បាត់បង់​​ហិនហោច គួរឲ្យ​​ព្រួយ​បារម្ភ

ពិភពលោក​ប្រារព្វ​ទិវា​ជនភៀសខ្លួនអន្តរជាតិ ចំ​ពេល​អឺរ៉ុប​និង​អាមេរិក​​​មាន​បញ្ហាអន្តោប្រវេសន៍​

តើបារាំង និងអាល្លឺម៉ង់​អាច​ជំនះលើ​និន្នាការមិន​ស្វាគម​ជនអន្តោប្រវេសន៍​ដែរឬទេ?

កូឡុំប៊ី​មាន​ប្រធានាធិបតី​ថ្មី​ជា​អ្នក​ប្រឆាំង​នឹង​កិច្ចព្រមព្រៀង​សន្តិភាព​ជាមួយ​ហ្វាក

ហេតុអ្វី បានជា​ អូទ្រីស​ចោទអាល្លឺម៉ង់​ថា លួច​យកការណ៍​សម្ងាត់​ពីខ្លួន?

ជម្លោះពាណិជ្ជកម្ម​ អាមេរិក-ចិន​ឡើង​តានតឹង​ជាថ្មី

របាយការណ៍៖ អតីត​មេFBI​រំលោភច្បាប់ និង​មិន​គោរព​ថ្នាក់លើ

រុស្ស៊ី៖​ការ​ប្រកួតបាល់ទាត់​ពិភពលោក​លើក​ទី២១​ចាប់​ផ្តើម​ជាមួយ​នឹង​វិធានការ​សន្តិសុខ​ខ្ពស់

កូរ៉េ​ខាងជើង អបអរ​មហា​ជោគជ័យ​របស់​លោក​ គីម ជុងអ៊ុន​

សេចក្តីថ្លែងការណ៍​​រួម​រវាង​លោកត្រាំ និង​លោកគីមចែង​ពី​អ្វី​ និង​អាច​បិទបញ្ចប់​អធិករ​រវាង​គ្នា​​​​​ឬ​ទេ?

តើអ្វីខ្លះ​ជាប្រធានបទ​នៃ​ជំនួប​រវាង​លោក​ដូណាល់ ត្រាំ និងលោក គីម ជុងអ៊ុន ?

ភាពប្រេះឆា​ក្នុង​ចំណោម​ក្រុម​ប្រទេស​មហាអំណាចឧស្សាហកម្ម G7

G៧ ៖ លោក ត្រាំ ទាមទារ​ហៅ​រុស្ស៊ី​ឱ្យ​មក​ចូល​ក្រុម​វិញ

តើ​​គេ​អាច​​​​សង្ឃឹម​​អ្វីខ្លះ​ ពី​​ជំនួប​​កំពូល​​មេដឹកនាំ​​G៧​ នៅ​​កាណាដា?​ ​

ប្រធានាធិបតីបារាំង និងនាយករដ្ឋមន្ត្រីកាណាដា ជួប​និយាយ​គ្នា​​ដើម្បី​​រក​​គោល​​ជំហរ​​ទល់នឹង​​អាមេរិក

មជ្ឈិមបូព៌ា៖​វិបត្តិ​រវាង​កាតា និង​អារ៉ាប៊ីសាអូឌីត​បាន​ធ្វើ​ឲ្យ​មាន​ការ​បែកបាក់​ផ្ទៃក្នុង​កាន់​តែ​ខ្លាំង​នៅ​ក្នុង​តំបន់​ឈូងសមុទ្រពែក្ស

អ៊ីរ៉ង់​​ប្រកាស​បង្កើន​​​សមត្ថភាព​​ចម្រើន​ធាតុ​​អ៊ុយរ៉ាញ៉ូម​ ដាក់​​សម្ពាធ​​សហគមន៍​​​អន្តរជាតិ​​