សនិ្នសីទអន្តរជាតិលើកទី២ បានបើកនៅទីក្រុងកាប៊ូល ដើម្បីស្វែងរកសន្តិភាពនៅអាហ្វហ្កានីស្ថាន
នៅថ្ងៃទី២៨កុម្ភៈនេះ ទីក្រុងកាប៊ូល បានបើកសន្និសីទអន្តរជាតិមួយដើម្បីសន្តិភាពនៅក្នុងប្រទេសអាហ្វហ្កានីស្ថាន។ គឺជាសន្និសីទលើកទី២ បន្ទាប់ពីសន្និសីទលើកទីមួយនៅខែមិថុនាមុន។ ប្រធានាធិបតីអាហ្វហ្កានីស្ថាន នៅលើកនេះ សន្យាថានឹងបង្ហាញពី”ផែនការសន្តិភាពទូលំទូលាយមួយ"។ រហូតមកដល់ពេលនេះ គឺរយៈពេល១៧ឆ្នាំមកហើយដែល អាមេរិក បានធ្វើសង្គ្រាមនៅអាហ្វហ្កានីស្ថាននិងបានកំចាត់របបអ៊ីស្លាមតាលីបង់ចេញពីប្រទេស។ សព្វថ្ងៃនេះទឹកដីអាហ្វហ្កានីស្ថានជិត៤០% ត្រូវស្ថិតនៅក្រោមកណ្តាប់ដៃពួកតាលីបង់ដែលធ្វើការវាយប្រហារជារឿយៗ ប្រឆាំងនឹងកងទ័ពអាហ្វហ្កានីស្ថាននិងបរទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
សន្និសីទអន្តរជាតិនៅទីក្រុងកាប៊ូលដើម្បីសន្តិភាពនៅប្រទេសអាហ្វហ្កានីស្ថាន ត្រូវបានប្រព្រឹត្តទៅនៅថ្ងៃពុធនេះ ដោយអវត្តមានពួកតាលីបង់។ ចូលរួមនៅជុំវិញតុចចារ មានគណៈប្រតិភូប្រទេសក្នុងតំបន់ចំនួន២៥ ដែលក្នុងនោះក៏មានឥណ្ឌានិងប៉ាគីស្ថានដែរ។ ប៉ាគីស្ថាន ដែលជារឿយៗ ត្រូវបានសហរដ្ឋអាមេរិក ចោទថាជួយគាំពារពួកឧទ្ទាមអ៊ីស្លាមជ្រុលនិយមតាលីបង់។ មិនតែប៉ុណ្ណោះ ប៉ាគីស្ថាន ថែមទាំងត្រូវទទួលរងសម្ពាធយ៉ាងខ្លាំងពីអាមេរិកអស់រយៈពេលជាច្រើនខែកន្លងមកហើយ ដើម្បីជំរុញឲ្យប៉ាគីស្ថានធ្វើការវាយប្រយុទ្ធប្រកបដោយប្រសិទ្ធភាព ក្នុងការកំចាត់អំពើភេរវនិយមនៅលើទឹកដីខ្លួន។
អ.ស.ប.ក៏ព្រមទាំងអាមេរិក ក៏បានចូលរួមនៅក្នុងសន្និសីទអន្តរជាតិដើម្បីសន្តិភាពនៅអាហ្វហ្កានីស្ថាននេះដែរ ដែលនៅលើកទីមួយត្រូវបានធ្វើឡើងនៅខែមិថុនាកន្លងទៅ តែពុំបានចេញជាលទ្ធផលអ្វីមួយឡើយ។ នៅលើកនេះ ប្រធានាធិបតីអាហ្វហ្កានីស្ថាន បានថ្លែងថាលោកនឹងបញ្ហាញពី”ផែនការសន្តិភាពទូលំទូលាយមួយរបស់លោក។ ចាប់តាំងពីជាង២ឆ្នាំកន្លងមកហើយ ការចរចាសន្តិភាពជាមួយពួកតាលីបង់ ត្រូវជាប់គាំង ដោយពួកអ៊ីស្លាមជ្រុលនិយមមួយនេះ តែងតែបដិសេធជានិច្ច គំនិតធ្វើកិច្ចចរចាស្វែងរកសន្តិភាពនៅអាហ្វហ្កានីស្ថាន។
ពួកតាលីបង់ តែងតែយកលេសថា” ដរាបណាកម្លាំងបរទេសនៅតែដាក់តាំងក្នុងទឹកដីអាហ្វហ្កានីស្ថាន ពួកគេក៏នៅតែមិនព្រមធ្វើកិច្ចចរចាសន្តិភាពនោះឡើយ។ តែនៅពេលនេះ ពួកតាលលីបង់ បានផ្លាស់ប្តូរជំហររបស់ខ្លួនទាំងស្រុង ដោយបានផ្សព្វផ្សាយសារមួយនៅតាមអាស័យដ្ឋានអ៊ីនធឺរណែត ដែលអះអាងថា "ចាប់ពីអំណេះទៅក្រុមតាលីបង់ បានត្រៀមខ្លួនជាស្រេច ដើម្បីចូលរួមក្នុងកិច្ចចរចាសន្តិភាព។ ក៏ប៉ុន្តែសារពួកតាលីបង់នេះ ត្រូវបានផ្ញើជូនតែអាជ្ញាធរអាមេរិកប៉ុណ្ណោះគត់ ដោយសារតែពូកតាលីបង់ មិនព្រមទទួលស្គាល់ជាដាចឲ់ខាត ភាពស្របច្បាប់របស់រដ្ឋាភិបាលអាហ្វហ្កានីស្ថាននិងបានចាត់ទុកដូចជាអាយ៉ងនៅក្នុងកណ្តាប់ដៃរបស់អាមេរិកតែប៉ុណ្ណោះ។
ហើយបើ យោងតាមអ្នកជំនាញខ្លះៗវិញ ការផ្លាស់ប្តូរជំហរទាំងស្រុងរបស់ពួកតាលីបង់នេះ គឺក៏ដោយសារតែ អាជ្ញាធរអាហ្វហ្កានីស្ថាននិងអាមេរិក បានដាក់សម្ពាធយ៉ាងខ្លាំងក្លាទៅលើរដ្ឋាភិបាលប្រទេសកាតាដើម្បីជំរុញឲ្យប្រទេសនេះ បិទទ្វារការិយាល័យរបស់ពួកតាលីបង់ដែលដាក់នៅក្នុងទីក្រុង Doha ប្រទេសកាតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ