កំណើនសេដ្ឋកិច្ចឥណ្ឌា កំរើកឡើងវិញ នៅត្រីមាសមុន និងងើបឡើងខ្លាំងនៅឆ្នាំមុខ
កំណើនសេដ្ឋកិច្ចឥណ្ឌា ពិតជាបានកំរើកកើនឡើងវិញ តាំងពីត្រីមាសទីបួន ពីខែតុលា-ធ្នូនៃឆ្នាំ២០១៧មក។ កំណើនដែលបានអូសទាញផលិតផលសរុបក្នុងស្រុកឱ្យមានកំរិត ដល់ទៅ ៧,២% គិតក្នុងរយៈពេលមួយឆ្នាំ ពីថ្ងៃទី ១មេសា ២០១៧ ដល់ថ្ងៃ៣១មីនា ២០១៨។ នេះបើតាមតួលេខផ្លូវការ ផ្សព្វផ្សាយនៅថ្ងៃពុធទី ២៨កុម្ភៈ២០១៨។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
បន្ទាប់ពីបន្ថយល្បឿនអស់ជាច្រើនត្រីមាស កំណើនសេដ្ឋកិច្ចឥណ្ឌាបានស្ទុះឡើងវិញ តាំងពីខែកក្កដា-កញ្ញាមកម្ល៉េះ និងត្រូវបានបញ្ជាក់កាន់តែច្បាប់នៅត្រីមាសចុងក្រោយកន្លងទៅនេះ។ ផលិតផលសរុបក្នុងស្រុក ហេដ្ឋារចនាសម្ព័ន្ធ និងផលិតផលឧស្សាហកម្ម សុទ្ធតែមានកំណើនទាំងអស់ ហើយនឹងបន្តពន្លឿនកំណើនសេដ្ឋកិច្ច កាន់តែខ្លាំងបន្ថែមទៀតនៅឆ្នាំក្រោយ ក្នុងកំរិត ពី៧ទៅ៧,៥% នៅឆ្នាំ២០១៨-២០១៩។ នេះបើតាមការអះអាងរបស់អ្នកជំនាញសេដ្ឋកិច្ច និងរបាយការណ៍ប្រចាំឆ្នាំរបស់រដ្ឋាភិបាលឥណ្ឌា។
សូមបញ្ជាក់ថា នៅក្នុងរបាយការណ៍មុន ឥណ្ឌាបានព្យាករមានកំណើនសេដ្ឋកិច្ចប្រចាំឆ្នាំ២០១៧-១៨ ត្រឹមតែ៦,៥% ទល់នឹង៧,១% នៅឆ្នាំ២០១៦-១៧ មានន័យថាជាកំរិតទាបបំផុតមិនធ្លាប់មានទេ គិតតាំងពីលោកមូឌី អ្នកជាតិនិយមឥណ្ឌូ ឡើងកាន់អំណាចមក។ មានមូលហេតុពីរដែលបញ្ជាក់ភាពទន់ខ្សោយនេះ គឺដោយសារឥទ្ធិពលនៃការលុបក្រដាលលុយ៥០០និង១០០០រ៉ូពី ឈប់ឱ្យប្រើប្រាស់ ដែលជាហេតុធ្វើឱ្យខ្វះដាច់លុយធ្វើចរាចរណ៍ទីផ្សារជាតិ។ បន្ទាប់មកទៀត រដ្ឋាភិបាលបានដាក់ដំណើរការប្រព័ន្ធពន្ធដារថ្មីលើទំនិញ ឬហៅថាពន្ធលើតម្លៃបន្ថែម ដែលបង្កភាពវឹកវរយ៉ាងខ្លាំង។
ក្រោយឥទ្ធិពលអវិជ្ជមាន សេដ្ឋកិច្ចឥណ្ឌាក៏ចាប់ងើបឡើងវិញ។ នេះជាការសម្គាល់របស់ភ្នាក់ងារវាយតម្លៃហានិភ័យសេដ្ឋកិច្ច ក្នុងសេចក្តីថ្លែងការណ៍ និងបានប្រកាសដំឡើងចំណាត់ថ្នាក់ឥណ្ឌាជាលើកទីមួយ គិតចាប់តាំងពីឆ្នាំ២០០៤ មួយកំរិត តែស្ថិតក្នុងចង្កោមអ្នកមធ្យមទាបដដែល។
ប៉ុន្តែបើតាមការយល់ឃើញរបស់ធនាគារកណ្តាល កំណើនសេដ្ឋកិច្ចឥណ្ឌាពេលនេះ នៅតែមានលក្ខណៈផុយស្រួយ ព្រោះការឡើងថ្លៃនៃទំនិញហូបចុក ព្រមទាំងប្រេងដែលឥណ្ឌានាំចូលយ៉ាងសន្ធឹកសន្ធាប់។ តម្លៃទំនិញបានកើនឡើង នៅខែមករា ដល់ទៅ៥,០៧%សម្រាប់រយៈពេលមួយឆ្នាំ ខណៈដែលធនាគារកណ្តាលជាតិកំរិតត្រឹមតែ៤%។ ម្យ៉ាងទៀត ឥណ្ឌាបន្តប្រឈមមុននឹងការវិនិយោគឯកជនមិនស្វាហាប់ ដោយហេតុតែពិបាកខ្ចីលុយវិនិយោគពីធនាគារ ដែលមានប្រព័ន្ធដំណើរការមិនសូវល្អ។
លោកមូឌី បានឡើងកាន់អំណាចនៅឆ្នាំ២០១៤ ជាមួយពាក្យសន្យាផ្តល់កំណើនសេដ្ឋកិច្ចស្វាហាប់ដល់ជាតិ ដើម្បីមានទឹកមាត់នៅលើពិភពលោក និងផ្តល់អាទិភាពដល់ការបង្កើតការងារដល់យុវជន។ មានទំនោរផ្អៀងផ្អងរវាងសេរីនិយម និងការពារប្រយោជន៍ជាតិនិយម ការធ្វើកំណែទម្រង់របស់លោក បានទទួលការស្វាគមន៍ជាទូទៅពីសំណាក់សហគមន៍អន្តរជាតិ ដោយយល់ថាលោកមូឌី ជាមនុស្សសម័យនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ